Read songe Yoano 15 Bible Online

Yoano 15 - songe bible

Yoano 15

¹Ami nyi mulundo wa nfinyo wa binyibinyi; Shami nyi mudimi au.

²Lutabi lwoso lwi kwandjimi lushi aluha bikubankalolo, akelukasha: anka lutabi lwoso aluha bikuba, akelusoswela’shi, aluhe bikuba bihwimi.

³Binobino anwe nwibatoshibwe, ha mwanda wa mwisambo unenulungwile.

⁴Ikalai mwandji, n’ami namu munda mwenu. Bu bishiabiuku lutabi kuhela bikuba lu na mwinyi, anka su ndulamata ku mulundo u na mwinyi; n’anwe namu mpamune, anka su anukekala mwimi.

⁵Ami nyi mulundo wa nfinyo, anwe nyi ntabi yao: awa akekala mwimi, ami namu mwadi, e akaha bikuba bibungi; su tanwi nami tanukakitshi kintu.

⁶Su muntu tekala mwandjimi, biabia asumbulwa bu lutabi luume: bantu abakeyikongola, abak’ele mu kalo, yihie fututu.

⁷Anwe, su anwikekala mwimi, na myanda yande ngikale munda mwenu, nutekye kioso kia nutekye, akenukitshina bianka.

⁸Su anukaha bikuba bi bungi, nyi anka muno Yaiya mntumbishibwe, biabia anwe anukekala bana-bande-ba-bukishi.

⁹Bu Yaiya banfule’mi kifulo, anka hamune nenufule’nwe kifulo, nwikale mu kifulo kiande.

¹⁰Su anulama milangilo yande, anukekala mu kifulo kiande; anka hamune’ini nalamine milangilo ya Yaiya, biabia nyi mwikale mu kifulo kiE.

¹¹Nenulungwila yino myanda’shi, muloo wande aukekala munda mwenu, na muloo mwenu aukakumbashwa.

¹²Uno nyi mulangilo wande’shi, nwifulene kifulo bu binenufule kifulo.

¹³Takwi muntu e na kifulo kikile kino’shi, muntu atulu muwa mwe ha mwanda wa bakuku be.

¹⁴Anwe nwi bakuku bande su anukita bioso binenulā.

¹⁵Tanyinutemuna dimo bu bahika, mwanda mpika teuku akikita nfumwe: anka nenutemuna bu bakuku; mwanda bintu bioso binahushishe kwi Yaiya nenwiukishabio.

¹⁶Anwe tanwibansangule’mi, anka’mi benusangwile, benutulu’shi nwende, nufishe bikuba, na bikuba bienu abikekala: eshi bioso bianukatekye Yaiya mwishina diande, akenuha’ bio.

¹⁷Biabia nenukamika’mi’shi: Nwifulenei kifulo.

¹⁸Su ba-ha-nsenga abenushikwa, anwiuku’shi abanshikilwe-mi kwibedi kwanwe.

¹⁹Su anwikalanga ba-hano-ha-nsenga, ba-hano-ha-nsenga abefulena ba na bene: anka ha mwanda’nwe tanwi ba-hano-ha-nsenga, anka’mi nenusangwile mu ba-ha-nsenga, binyibiabia ba-ha-nsenga abenushikwa.

²⁰Tentekeshai mwanda unenulungwile’shi: Mpika tamukile Nfumwe. Su abambingabinga’mi, abakenubingabinga namu; su abalamine mwanda wande, abakalama wenu namu.

²¹Anka bino bintu bioso abakenukitshina ha mwanda w’eshina diande, mwanda tambeukye awa bantumine.

²²Su’mi nkimufikye na kwisamba n’abo, tababadia na kwikala na milwisho, anka binobino tabe na mwa kwibalanenya.

²³Awa munshikwe, bashikwa Yaiya namu.

²⁴Su nki mukite munkatshi mwabo bikitshino bishībikitwe mungi muntu, tababadi na milwisho; anka binobino abahu kumona’mi, na kushikwa’mi na Yaiya namu hamune.

²⁵Anka kukumbashwa mwanda ubafundjibwe mu mukanda wa milangilo’shi: Abanshikwa bisumanga.

²⁶Anka ahakafiki Musambi ankenutumina kwi Yaiya, nyi Kikudi-E-Selelee kia binyibinyi, atuku kwi Yaiya, E akanakwila.

²⁷N’anwe namu anukanyisambila, mwanda’nwe nubadi nami mpā na kumbangilo.