Read songe Yoano 18 Bible Online

Yoano 18 - songe bible

Yoano 18

¹Yesu habahwile kwakula yino myanda, bayile na bana-be-ba-bukishi, babukile kela ka Kedelona, kubadi efuba batwelele mwanka na bana-be-ba-bukishi.

²Biabia Yudasa namu, winyi bamusokwele, badi mwiukye kiakia kihindji: mwanda Yesu badi ende kwanka misusa na misusa na banabe-ba-bukishi.

³Henyihaha Yudasa habatambwile kibumbo (kia balume) na bamwanafita kwi batshiite bakata na Bafadiseo babafikile kwanka na matala na mienhye na bia ngoshi.

⁴Binyibiabia, Yesu habeukile myanda yoso ayikyebe kumufikila, bayile, akebehusha’shi, A nanyi anukimbi?

⁵Abamwalulwile’shi, Yesu a ku Nasaleta, Yesu bebambile’shi, Nami uno. Yudasa bamusokwele, badi mwimane n’abo namu.

⁶Biabia habebalungwile’shi, nami uno, tabaluka binfutanfuta, babahona hashi.

⁷Henyihaha, E bebehwishe dimonyi’shi, A! nanyi anukimbi? Abo, abambile’shi, Nyi ng’Yesu a ku Nasaleta.

⁸Yesu bebalulwile’shi, a tanenwambashi, Nami uno, binyibiabia su anunkimbi, lekai bano, bēude.

⁹Ha mwanda wa kukumbashwa mwanda we wa bakwile’shi: ku baba babompele nkimushimishe sunga ngumune.

¹⁰Henyihaha Shimona Petelo badi na luhete, belusumwene, belutahile mpika a tshiite mukata, amutshib’etwe die dibalume. Eshina dia mpika dibadi bu Makusa.

¹¹Binyibiabia Yesu bambile Petelo, eshi: Alusha luhete lwobe mu kihusula: kitomeno kibampele Yaiya, tanyikitomo’mi su?

¹²Henyihaha kibumbu, na bamwinampala, na bamwanafita ba Bena Yudea abakwete Yesu, abamwanyine.

¹³Abayile n’E kwibedi kwi Anasa; mwanda e badi muko a Kaifasa, n’e badi tshiite mwakwidi mukata mu akia kihwa.

¹⁴Kaifasa n’e winyi, bahele Bena Yudea binangu’shi, mbiwandjikile muntu’mune afwile bantu.

¹⁵Shimona Petelo balondele Yesu, na mungi mwan’abukishi: winyi mwan’a bukishi badi mwiukibwe kwi tshiite mwakwidi mukata, abatwelele mu luhoho lwa tshiite mwakwidi mukata na Yesu.

¹⁶Anka Petelo badi mwimane ku kibelo hasha. Henyihaha yawa mungi mwan’a-bukishi badi mwiukibwe kwi tshiite mwakwidi mukata, batukile bakwile kwi songwakashi badi alama ku kibelo, biabia batwelele na Petelo.

¹⁷Biabia wi nyi songwakashi badi alama ku kibelo, bakwile kwi Petelo’ shi: Obe namu we mukwabo n’abo a bana-ba-bukishi ba uno muntu su? E bamwambile’shi: Ayoyo.

¹⁸Bahika na bamwanafita abadi bemane kwanka abahu kukwatshisha kalo ka makala, mwanda kubadi mashika, abadi abōto, na Petelo badi mwimane n’abo, oto namu.

¹⁹Binyibiabia tshiite mwakwidi mukata baihwishe Yesu mwanda wa bana be-ba-bukishi, na lulambukisho lwe.

²⁰Yesu bamwalu lwile’shi: natubwilanga ba-hano-ha-nsenga mwanda wande, mafuku oso nalambukisha mu kitumbwilo, na mu ntempelo, mu badi Bena Yudea bekongyele; na mu bufiefi nkimwakule sunga mpahela.

²¹Ankinyi kionyihwisha? banda kwihusha’bo abampushishe yinakwile kwabadi, tala’bo abeuku yinakwile.

²²Habakwile biabia, umune abamwanafita badi mwimane hehi, bakuhile Yesu luhi, tambashi: Bōlulwila tshiite mwakwidi mukata biabia?

²³Yesu bamwalulwile’shi: Su nadi nakula mwanda ubi, hatulau, anka su bibuwa, bonkuhila kinyi?

²⁴Henyihaha Anasa bamutumine muanyibwe kwi Kaifasa tshiite mwakwidi mukata.

²⁵Shimona Petelo badi mwimane ’oto kalo. Binyibiabia babamwihwishe’shi: Obe namu we mungi a mu bana-be-ba-bukishi su? E batune, bakwile’shi: ooo, nki’abo.

²⁶Umune a bafubi a tshiite mwakwidi mukata, badi mukwabo na winyi abatshibile’twe kwi Petelo; bakwile’shi: Tanakumwene n’E mwifuba?

²⁷Henyihaha Petelo batune dimo, biabia kahindji naka etombole dibasamine.

²⁸Henyihaha abakatukile na Yesu kwi Kaifasa bayile n’E kwibalasa kwa nfumu, ku nshibo ya kitshibilo kia myanda; kubadi na mashik’ese bwē; anka’bo bana bene tambatwele mu nshibo ya kitshibilo, tala bakashūla kishila; su anka abakadī kidibwa kia Kukila kia Yeowa.

²⁹Biabia Pilato batukile kwabadi, tebambashi: A nwi n’E kimu kinyi?

³⁰Abamwalulwile’ shi: Su tabadi musodi a myanda, biabia tatubadia kumutula kodi.

³¹Binyibiabia Pilato bebalungwile’shi: Muatei numutshibile kimu mwiyile mukanda-wa-milangilo yenu. Biaibia Bena Yudea abamulungwile’shi: Kiakia nkishila’twe kwiha muntu.

³²Eshi, misambo ya Yesu yikumbashwe yibakwile, yia kuhatula lwinyi lufu lwe lwa kafu.

³³Binyibiabia Pilato batwele mwibalasa dia kitshibilo kia myanda dimo, betanyine Yesu, bamwihwishe’shi: Obe we nfumu a baYudea su?

³⁴Y’esu bamwalulwile’shi: N’obe na mwinyi esamba’nyi, mbantu abakulungula bianka?

³⁵Pilato bamwalulwile’shi: Ami nyi Mwina Yudea su? Nyi mwilo wobe na batshiite bakwidi bakata nyi babakufisha mu masa’nde: we mukite kinyi?

³⁶Yesu bamwalulwile’shi: Bufumu bwande tabwa hano-ha-nsenga, ooo: su bufumu bwande bubadi bwa hano-ha-nsenga, henyihaha bafubi bande abadi a kundwila’ashi, tala nankafishwa kwi Bena Yudea: anka binobino bufumu bwande tamba kuno kwinyi.

³⁷Binyibiabia Pilato bamulungwile’shi: A biosobi we nfumu su? Yesu bamwalulwile’shi: Wokula wa binyibinyi nyi nfumu. Natandjilwe ha uno mwanda, nafikile hano-hansenga namu ha uno mwanda, eshi, nkakule bu kamonyi ka bia binyibinyi. Ese a bia binyibinyi ahushā Eyi diande.

³⁸Pilato bamulungwile’shi: Bia binyibinyi nkinyi? Biabia habakwile wawa mwanda, batukile dimo, ’ende kwi Bena Yudea, akebalungula’shi: Nkimumumone na mwanda (sunga ngumune).

³⁹Anka’nwe nwi na kihikwa kienu, kia nyinuhoswelā muntu’mune ha Kukila kwa Y’eowa: binyibiabia anukyebe nyinuhoswele Nfumu a Bena Yudea, su?

⁴⁰Henyihaha boso abanyishishe mayi abo, eshi: Tanuno, ooo anka Balabasa. Biabia winyi Balabasa badi munyananyi.