Read songe Yoano 20 Bible Online

Yoano 20 - songe bible

Yoano 20

¹Efuku dia mbedi dia lubingo Madiya Mandalene bafikile namashik’ēse ku kilele, tadi anka mufito, bamwene ebwe dialashwe ku kilele.

²Binyibiabia bakamine lubilo, bafikile kwi Shimona Petelo, na kwi winyi mungi mwan’a bukishi, ubafudibwe kifulo na Yesu; bākwile kwi’bo’shi: Abātshile Nfumwetu ku kilele, biabia tatwiuku’twe mwabamutudile.

³Henyihaha Petelo na winyi mungi mwan’a bukishi abatukile, tabafikile ku kilele.

⁴Biabia bubidi bwabo hamune abakamine lubilo: mungi mwan’a bukishi bakidi Petelo lubilo, n’e bafikile kwibedi ku kilele.

⁵E hakubandamina, na kutala mwanka, bamwene bilamba bia linene bilale, anka e shī mutwele mwanka.

⁶Henyihaha Shimona Petelo bamulondele, batwele mu kilele, bamwene bilamba bia linene bilale hanka,

⁷na kitambala kibadi kihombelwe mutwe we, kishī kilale na bilamba bia linene, anka kibadi kifungwe ha kihindji kia ki na mwinyi.

⁸Biabia mungi mwan’a bukishi namu, winyi ubafikile kwibedi ku kilele, batwele mwanka, bamwene, bakumine.

⁹Mwanda mpaa na ku kino kihindji tambeukile Bifundwe (bi’Efile) ’shi, nkihwandjikile’nka e kubuka dimo ku lufu.

¹⁰Henyihaha bana-ba-bukishi abakatukile dimon’nyi kwabo kwi na mwinyi.

¹¹Anka Madiya bemene hasha ku kilele kwete kudila: Hakudila, bebandamine, batadile mu kilele.

¹²Biabia bamwene bamwikeilu babidi (ābafwalwe) bitoka bakwete kushāla, umune ku mutwe, mungi ku ngwa, habadi kitanda kia Yesu kilelwe.

¹³N’abo abamuhwishe’shi: A Mukashi, nkinyi kiodila’be? E bebālulwile’shi: Mwanda abātshile Nfumwami, n’ami tañuku’mi (kihindji) kiabamutudile.

¹⁴E hakwakwila biabia, beialulwile, bamwene Yesu kwete kwimana, tamwiukile’shi, ubadi Yesu (hanka).

¹⁵Yesu bamwihwishe’shi: A Mukashi, nkinyi kiodila’be? A nanyi anukimbi? E hakutentekyesha’shi, e nyi mudinti w’efuba, bamwambile’shi: A Mwanana, su bwemutwale hantu, ondungule hobwemutudile, n’ami nankamukasha.

¹⁶Yesu bamwambile’shi: A Madiya. E beialulwile, bamwambile’shi: Labone; nyi nkuhatula’shi, Nfumwami.

¹⁷Yesu bamwambile’shi: Tonkumanga, Mwanda nkimubandjile kukaminwa mwiilu kwa Shami: anka nda kwi bakwetu bande na kwibalungula’shi: Ami nakamina mwiilu kwi Shami, na Shyenu, kw’Efile Mukulu ande, n’Efile Mukulu enu.

¹⁸Madiya Mandalene bafikile, balungwile bana-ba-bukishi’shi: Tampwile kumona Nfumwetu, nyi E bansambile yino myanda.

¹⁹Henyihaha diadi’efuku kiolwa, diakwikalanga efuku dia mbedi dia lubingo, habikalanga bibi bishitwe mubadi babungakene bana-ba-bukishi, ha mwanda wa kutshina bena Yuda, kubafikile Yesu, na kwimana bemene munkatshi (mwabo), bebāmbile’shi: Kufukama kwikala kwanudi.

²⁰E habahwile kwakula biabia, bebalesheshe māsa na lubafu bie. Henyihaha bana-ba-bukishi hakumona Nfumwetu abasehela.

²¹Biabia Yesu bebākwile dimonyi’shi: Kufukama kwikala kwanudi; bibantumine Shami, anka biabia ami nenutumu.

²²Habahwile kwakula uno (mwanda), e bebahwile muwa habadi, bebesambile’shi: Tambulai Kikudi-E-Selelee.

²³Kwi ese su nanyi su nanyi anulekyela milwisho, ayibebalekyelwa, na kwi ese, su nanyi su nanyi nushīa lekyela, milwisho nyo yishlayilekyelwa.

²⁴Anka Tomase batemunwanga bu Didimusa, umune w’abo bēkumi na babidi, tabadi n’abo habafikile Yesu.

²⁵Binyibiabia bangi bana-ba-bukishi abamulungwile’shi: Tubamonanga Nfumwetu. Ank’e bebālulwile’shi: Anka su nankamono mu mās’e mikofu ya misumadi na kutula munwe wande mu mikofu ya misuma di, na kwela mboko yande mu lubafu lwe, anti, tankakumin’emi, ooo.

²⁶Dinton’nyi abahwile mafuku mwanda bana (be-ba-bukishi babadi mwanka, na Tomase badi n’abo: henyihaha) habikalanga bibi bishitwe Yesu bafikile, bemene munkatshi, bakwile’shi: Kufukama kwikala kwanudi.

²⁷Henyihaha e bākwile kwi Tomase’ shi: Ola kuno munwe w’obe, tala mboko yande, ola kuno mboko yobe, weile mu lubafu lwande: toikalanga na kushīkukumina, ooo, anka kumina.

²⁸Tomase bālulwile, bamwambile’shi: Nfumwami! Efile-Mukulu ande!

²⁹Yesu bamwambile’shi: Tomase, bokumina mwanda wa bibomono’mi; mwabi kwi’ba bashī bamone, anka abakumina.

³⁰Binyibinyi bingi bitundwilo bibungi Yesu bebikitshine ku meso kwa bana be ba bukishi, bishī bifundjibwe mu uno mukanda.

³¹Anka bino bibafundjibwa bianudia kukumina’shi, Yesu nyi Kidisitu Mwan’Efile-Mukulu: na ha mwanda wa kukumina, bianudia kwikala na muwa mwishina die.