Read songe Yoano 4 Bible Online

Yoano 4 - songe bible

Yoano 4

¹Binyibiabia Nfumwetu habeukile mubahushishe Bafadiseo’shi, Yesu bakidi Yoano kwikasha (bantu’bu) balondji, na kwibabatshisha,

²(anka Yesu na mwinyi tabadi abatshisha, nyi mbana-be-ba-bukishi,)

³bakatukile ku Yudea, bālukile dimonyi ku Ngadilea.

⁴Ubadi n’ao ngwa’nka wa kukila mu Samadia.

⁵Biabia bafikile ku kibalo kia ku Samadia, eshina dia’kio bu Saika, hehi ku kihindji kia nsenga kibahelwe Yosefe kwi nshye Yakoba.

⁶Mushimwa wa mema a Yakoba ubadi kwanka. Biabia Yesu bakokyele luendo, bashalele ha mushimwa. Nguba tabadi su mpa mitwe.

⁷Henyihaha kubafikile mwana mukashi a mu Samadia kutaha mema. Yesu bamwambile’shi: Ompe a kutoma.

⁸(Mwanda bana-be-ba-bukishi abadi bende ku kibalo mu kuula bidibwa).

⁹Henyihaha mwana mukashi a mu Samadia bamwihwishe’shi: A nkinyi obe mwina Yudea ontekye’mi a kutoma ami mwana mukashi a mu Samadia? mwanda ba Yudea tabeakushena na bena Samadia.

¹⁰Yesu bālulwile amwamba’shi: Su bodi ouku buntu bw’Efile Mukulu, na mwinyi akutekye’shi: Mpe a kutoma; obe bodia kumuteka, n’e namu badia kukuha mema a muwa.

¹¹Mwana mukashi bamwambile’shi: A Mwanana, a bioshī na kintu kia kutaha n’akio, na mushimwa namu ngula: biabia kokyebe kukatusha enyi mema a muwa nkwi kunyi?

¹²Obe we mukile nshyetu-kulu Yakoba, betuhele uno mushimwa, ubadi atomo mwanka e na mwinyi, na bana be, na bimunwa bie su?

¹³Yesu bamwalulwile’shi: Ese atomo ano mema akahusha nyota dimo;

¹⁴anka ese akatomo ku ā mema ankamuha, takahusha’nyi nyota dimo, ooo, sunga mpahelahela; anka ā mema ankamuha akekala munda mwe bu nsulu ya mema afifuka, mpaa na mu muwa-au-tala wa ikala-ika.

¹⁵Mwana mukashi bamwambile’shi: A Mwanana, mpe ano mema bianshyankahusha nyota, sunga nkufika kuno mu kutaha.

¹⁶Yesu bamulungwile’shi: Banda kwenda, oketamine mulunda obe, nufikye kuno.

¹⁷Mwana mukashi bamwalulwile’shi: Ntshi na mulumē’mi. Yesu’shi: Bokula biya’shi: Ntshi na mulume;

¹⁸mwanda bodi na balume batano, na yawa odi n’e binobino ta mulunda obe, mu wawa (mwanda) bokula binyibinyi.

¹⁹Mwana mukashi bamulungwile’shi: A Mwanana, nashingula biosobi we mutemuki.

²⁰Banshyetu-kulu babadi abalangwile mu uno ngulu, n’anwe anwamba’shi: Anka mu Yelusalema mwi kihindji kihwandjikile kulangwidila.

²¹Yesu bamulungwile’shi: Obe mwana mukashi nkumine’mi, akufiki kihindji kianushyanukalangwila Yaiya, sunga mu uno ngulu, sunga mu beukye; Yelusalema.

²²Anwe anulangwila kianushī beukye; atwe atwiuku kiatulangwīla, mwanda kihandjilo nyi nkia Bena Yuda.

²³Anka akufiki kihindji, na binobino kibahu kufika, bala ngwidi ba binyibinyi abakalangwila Yaiya mu kikudi na (mu) binyibinyi: mwanda Yaiya akimbi be biabia kumulangwila.

²⁴Efile Mukulu nyi Kikudi; n’abe abamulangwila wabadi n’ao ngwa kumulangwila mu Kikudi na mu biabinyibinyi.

²⁵Mwana mukashi bamwambile’shi: Neuku’shi, Meseaya afiki, atemunwa bu Kidisitu, hakafiki aketulungula myanda yoso.

²⁶Yesu bamwalulwile’shi: Nganka’mi uno akula n’obe’u.

²⁷Ha kiakia kihindji bana-be-ba-bukishi abafikile kwanka, abakanyine bibadi akula na mwana mukashi; anka takubadi muntu bamwihwishe’shi: Nkinyi kiokyebe? sunga’shi: A nkinyi kioesamba n’e.

²⁸Henyihaha mwana mukashi balekyele ebuka die, bayile mu kibalo, balungwile bana balume’shi:

²⁹Fikai, nutale muntu bandungula bioso binankitshine kala: E ta nKidisitu uno su?

³⁰Henyihaha abatukile mu kibalo, abafikile kwadi.

³¹Habadi ki mwende, bana-be-ba-bukishi abamusendele’shi: A Mulambukishi banda kudia.

³²Anka E bebalungwile’shi: Nyi na bidibwa biankwete kudia bianushyanuuku.

³³Binyibiabia bana-be-ba-bukishi abeihushene ’shi: Kubamufishisha muntu kia kudia su?

³⁴Yesu bebālulwile’shi: Bidibwa biande nyi mbino’shi: Nkite akikyeb’eshimba di’awa bantumine, na kuhudisha mufubo we.

³⁵Tanwakula’shi: Ku ki mieshi yinanka, ku mongo nyi nkuumbula su? Talai, nenuamba’shi: Bandulai meso enu, nutale ku mafuba, mwanda tahwīle kumonga bia kuumbula.

³⁶N’aumbula atambul’efuto, nākongola bikuba ku muwa-wa-ikala-ika: eshi, mukunyi na munoyi abakasangala hamune.

³⁷Biabia nyi mwanka mwisambo ngwa binyibinyi’shi: Umune akunu, mungi aumbula.

³⁸Nenutumine kuumbula’bia bianushī bafubile, bangi abafubu, n’anwe nubebahiene ku mifubo yabo.

³⁹Binyibiabia be bungi ba Bena Samadia bia’kia kibalo, abamukuminyine ha mwanda wa mwisambo wa mwana mukashi ubalungwile’shi: E bandungwile myanda yoso yinakitshine kala.

⁴⁰Biabia habafikile Bena Samadia kwadi E, abamusendelele kwikala nabo: Ebashalele mwanka mafuku abidi.

⁴¹Na bangi bakwabo be bungi abakuminyine ha mwanda wa eyi die na mwinyi.

⁴²Bebalungwile mwana mukashi eshi: Binobino atukumina, ta ha mwanda wa mwisambo wobe, mwanda tubamuhusha’twe ba na bene tubeuku’shi: E binyibinyi, nyi Kidisitu: Muhashi a be-hansenga.

⁴³Henyihaha habakidi mafuku abidi bakatukile kwanka bayile ku Ngadileo.

⁴⁴Mwanda Yesu na mwinyi bakwile’shi: mutemukye te na kinemo mu nsenga ye.

⁴⁵Binyibiabia habafikile mu Ngadileo, Bena Ngadileo babamukuminyine, mwanda’bo abamwene bintu bioso bibakitshine mu Yelusalema ku kidilo: mwanda’bo namu abayile ku kidilo.

⁴⁶Biabia Yesu bafikile dimonyi mu Kana ka Ngadileo, kubalulwile mema bu nfinyo. Kubadi muntu, ntshikala, mwan’e badi na busungu ku Kahanaume.

⁴⁷Habahushishe’shi Yesu takatukile mu Yudeo, tafikile ku Ngadileo; e bafikile kwadi E, bamusendelele’shi: Banda kufika, ohashe mwan’ande: mwanda ebadi hehi ku iufu.

⁴⁸Binyibiabia Yesu bamulungwile’shi: Su ta nwibamone bitundwilo na biakukanyi, tanwi na lukumino.

⁴⁹Mwinyi ntshikala bamwambile’shi: A Nfumu, ofikye kwibedi mwan’ande tafwile.

⁵⁰Yesu bamulungwile’shi: Nda kwobe, mwan’obe atala. Na yawa muntu bakuminyine dino ei dibamulungwile Yesu; biabia bayile kwe.

⁵¹Habadi e tēnde mwishinda, bafube be abafumankene ne, abamulungwile’shi: Mwan’obe ena muwa.

⁵²Henyihaha bebeihwishe nguba he kunyi hababangile kusanguka. Abamwalulwile’shi: Maloba habadi nguba ha umune kalo kabamulekyele.

⁵³Biabia nshyemwana beukile’shi, nyi anka ha yawa nguba yibandungwile Yesu’shi: Mwan’obe e na muwa. E bakuminyine na mwinyi, na nshibo ye yoso.

⁵⁴Kino namu nyi kilengeleshe kia kabidi kibakitshine Yesu habakatukile ku Yudea, na kwenda ku Ngadileo.