Read songe Yoano 5 Bible Online

Yoano 5 - songe bible

Yoano 5

¹Hakubahu bino kubadi bidibwa bia kusehela bia Bena Yudea; na Yesu bakamine ku Yelusalema.

²Mu Yelusalema hehi ku kibelo kia mukoko, kubadi edindji dia mema, dibatemunwa mu edimi dia Bena Hebelu, bu Beteseda; dibadi na bitanda bitano.

³Mu binyi bitanda mubalele kibumbu kikata kia bantu na masungu, bampofu, balemane na balumina, abadi abaindjilanga kusanyisha kwa mema.

⁴Mwanda mwiikeilu baikile mwanka ha kihindji na kihindji mwidindji dia mema, mu kusanyisha mema: biabia, hakusanyisha mema, muntu ese aiki mwanka kwibedi bahwishwa busungu bubadi n’abo, su nkinyi su nkinyi.

⁵Kubadi muntu kwanka badi mukumbo bihwa makumi asatu na bihwa mwanda.

⁶Yesu habamumwene mulale, na hakwiuka’shi tabaishishe anka biabia, bamwihwishe’she: Okyebe kwikala mukumbeno su?

⁷Uno muntu mubofule bamwalulwile’shi: A Mwanana, nki na muntu a kunyikisha mwidindji ahasana mema: anka hankiafiki, mungi taikile kumpala kwande.

⁸Yesu bamulungwile’shi: Ebwe, weboshe lusala lwobe, tambuka.

⁹Kahindji naka, muntu tadi mukumbenwe, bebwesheshe lusala lwe, batambukile; diadia efuku dibadi dia Sabado.

¹⁰Henyihaha Bena Yuda balungwile mwinyi bahashibwe’shi; Nyi efuku dia Sabado: nyi nkishila obe kutwala lusala lwobe.

¹¹Bebalulwile’shi: Winyi ba mpashishe, na mwinyi bandungwile’shi: Eboshe lusala lwobe, otambuke.

¹²Henyihaha, babamwihwishe’shi: A muntu kinyi bakulungula biabia’shi: Ebosha lusala lwobe, otambuke?

¹³E badi muhashishwe, ta mwiukyele nanyi bamuhwishishwe: mwanda Yesu bahwile kukunguluka, mwanda kibumbu kibadi ku kiakia kihindji.

¹⁴Kumongo, Yesu bamusañene mu ntempelo, bamulungwile’shi: Talanga, bohashibwe, tosolanga mwanda dimonyi, su kingi kintu nkikile kino akikafika kodibe.

¹⁵Muntu yawa bakatukile, balungwile Bena Yuda’shi: Nyi Yesu abampashishe.

¹⁶Nyi ha uno mwanda Bena Yuda abasabule Yesu, abakimbile kumwiha, mwanda E bakitshine yaya myanda h’efuku dia Sabado.

¹⁷Anka Yesu bebalulwile’shi: Shami afubā kwibedi mpaa na bino, n’ami namu nafubu.

¹⁸Binyibiabia, Bena Yuda abakambile kukimba kumwiha, tañanka mwanda E bashulwile kishila kia Sabado, ooo, E namu batemuna’shi: Efile Mukulu bu Nshye na mwinyi, biabia E bahwandjikishe E na mwinyi hamune n’Efile Mukulu.

¹⁹Binyibiabia Yesu bebalungwile’shi: Binyibinyi, binyibinyi, nenwambashi; Mwinyi Mwana teuku kukita kintu, E na mwinyi, anka kiakia kiamwene Shye akitshi: mwanda abio bioso abikita Yaiya, anka biabia abikita Mwana hamune.

²⁰Mwanda Yaiya e na Mwana kifulo, amulesha bintu bioso biākitā E na mwinyi: E nyi akamulesha mifubo yingi nyikile yino’shi, anwe anukakanya.

²¹Mwanda’nka bu Shye abusha bafwe, ebasangulā, anka biabia Mwana namu asangulā ese na Mwinyi akyebe.

²²Mwanda Yaiya temukishā muntu, anka tabahele Mwana kwimukisha bimu bioso.

²³Eshi, boso bakanemeka Mwana, anka hamune mwabanemeka Yaiya. Awa shi anemeka Mwana, ta munemeka Shye bamutumine.

²⁴Binyibinyi, binyibinyi, nenwambashi: yawa ahusha mwanda wande akumina hadi E bantumine, e na muwa wa ikala-ika: takafiki ku kimu, ooo, anka tabakatukile ku lufu, bakilakila ku muwa.

²⁵Binyibinyi, binyibinyi nenulungulu’shi: efuku adikafiki, na binobino di kwanka, adikahusha bafwe Eyi dia Mwan’Efile Mukulu, n’abo, abahusha abakekala na muwa.

²⁶Mwanda bu Yaiya E na muwa mwi na mwinyi, biabia, E bahele Mwana kwikala na muwa mwi na mwinyi.

²⁷E namu bamuhele matalwa kutshiba myanda ya bimu, mwanda E nyi Mwan’a muntu,

²⁸Ta nukanyanga ha uno mwanda: mwanda kihindji akikafiki, mwanka’kio boso be mu mashama, abakahusha Ei diE:

²⁹abakatuku, abo’shi abakitshine bibuwa, kwi lusangukilo lwa muwa n’abo abakitshine bibubi, kwi lusangukilo lwa kuhishibwa.

³⁰Ami na mwinyi tañuku kukita kintu, bi nahusha biabia natshibi (mwanda) na kutshiba kwande nkululame; mwanda nki mukimbe (kukita) eshimba diande, anka’kikyebe eshimba dia Yaiya bantumine.

³¹Su netemuna ami na mwinyi, kwitemunwa kwande ta nkwa binyibinyi.

³²Kwi mungi antemuna, ami, neuku’shi kutemuna kwe, kwantemuna, nyi kwa binyibinyi.

³³Nubatumine kwi Yoano, e batemukile bia binyibinyi.

³⁴Anka ami tantambula misambo kwi muntu anka nesamba yino myanda ha mwanda’nwe kuhashibwe.

³⁵E badi etala aditembe n’etata ditoka soo: anwe nubakuminyine kikindji kusehela mwitata die.

³⁶Ank’ami nyi na misambo yikile ya Yoano: mwanda bikitshino biba mpele Yaiya bia kuhudisha, bino bikitshino binakitshi, abintemusha’shi ng’Yaiya bantumine.

³⁷Yaiya na mwinyi bantumine, bantemwine namu. Anwe ta nwibahushe Ei die, sunga kihindji kimune, sunga nkumona mbidi ye.

³⁸N’anwe Ei die tandishale munda mwenu: mwanda’nwe ta nwibakumine a bantumine.

³⁹Kimbai mu bifundjibwe, mwanda mwanka mwa nutentekesha’shi: twi na muwa waikala-ika: abio nyi abintemuna.

⁴⁰N’anwe anutunu kufika kwandjimi, kwa nudi akutambula muwa.

⁴¹Tankumina kutambula kinemo kwi bantu, ooo.

⁴²Anka nenwiuku’shi, ta nwi na kifulo ki’Efile Mukulu mundu mwenu.

⁴³Nafikile mwishina dia Yaiya ande, tanwibankumine: su mungi afiki mwishina die na mwinyi, anukamukumina.

⁴⁴Anwiuku kukumina na minyi, anwe’betumbishena, tanukyebe ntumbo ayifikye kwEfile Mukulu, ank’E na mwinyi?

⁴⁵Ta nutentekeshanga’shi: Ami nankenuhīsha kwi Shami: akenuhīsha e kwanka, nyi Mosesa, anwibakuluhile.

⁴⁶Mwanda, su nubadi akukumina Mosesa nubadi akunkumina’mi, mwanda e bafundjile mwanda wande.

⁴⁷Anka su anwe ta nwibakumine bifu ndwe bie, anukakumina masimbo yande bi kunyi?