Read songe Yoano 6 Bible Online

Yoano 6 - songe bible

Yoano 6

¹Habafwile yino myanda Yesu bayile adi’eshia dia Ngadileo, dingi eshina nyi bu Tibuliase.

²Biabia, kibumbu kia bantu kibamulondele, mwanda abamwene bilengeleshi bie, bibadi akitshi kwi basha masungu.

³Yesu bakamine ku ngulu, bashalele hanka na bana-be-ba-bukishi.

⁴Binyibinyi, Mpashika, nyi bidibwa bia kusehela bia Bena Yudea yibadi hehi.

⁵Hababandulukile Yesu meso E, bamwene kibumbo kikata akitiki kwadi E, balungwile Fidiho, eshi: Atukaula mampa kwi kunyi akuha’ba, bādi?

⁶Bamutwele munda kumwihusha mwanda wa kumutompa, mwanda E na mwinyi badi mwiukye bia kyebe kukita.

⁷Fidiho bamwalulwile’shi, Sunga mampa aulwe ku nfalanga nkama ibidi kwi baha muntu kahela, muntu kahela, ta bakalombana, ooo.

⁸Umune, a bana-be-ba-bukishi, Andeleo, mukwabo na Shimona Petelo, bamwambile’shi,

⁹Kuno kwi mukinga mulume, e na mitanda itano yia mampaa baale, na tushiho tubidi tuhela; anka bino namu bi na minyi, na bantu be bungi bino’ba?

¹⁰Yesu bambile’shi: Shadishai bantu. Binyibi lubishi lwi bungi lubadi kwanka. Biabia, balumi bu binunu bitano abashalele.

¹¹Yesu batambwile mitanda ya mampa, habatumbwile, beyabile kwi bana-be-ba-bukishi, n’abo namu babahele babadi bashale; na tushiho namu bungi bu biababadi a bakyebe.

¹²Habaikwite, balungwile bana-be-ba-bukishi’shi: Kongolai bihese bibashala, ta nushimishanga sunga nkimune.

¹³Henyihaha, babebisangwile, bebiomeka bisele bikumi na bibidi, biaula ndaa, na bihese bia mitanda yitano ya baale yibashele kwa badile.

¹⁴Binyibiabia, baba bana balume, hababamwene kino kilengeleshe kibakitshine Yesu, babambile’shi: Binyibinyi, uno’u ngi’awa mutemukye akafikye hano-ha-nsenga.

¹⁵Habeukyile Yesu ’shi abakyebe kumuata ha bukoho, na ku mutwesha mbufumu, bakatukile, bayile dimo ku ngulu buhenka bwe.

¹⁶Habahone nguba, bana-be-ba-bukishi babaikile kwishiba.

¹⁷Abatwele’mbwato, ababukile adi’eshia ku Kahanamu. Bufuku bubayile, na Yesu ta badi mubande kufika kwabadi.

¹⁸Mema abadi atenkatenka mwanpa wa kihahi kikata kibahukile.

¹⁹Biabia, habaitshile bwato kihimo bu kilometre inanka su itano, abamwene Yesu atambuka hanundu ha mema, afiki kwihi na bwato, n’abo abakwatshibwe na moo.

²⁰Anka E bebalungwile’shi: Nami uno, ta nutshinanga.

²¹Biabia, abasangulukile kumutwesha ’mbwato: kahindji naka bwato bubafikye ku mahia kwa bubendanga.

²²Hadi’efuku dia maloba bantu abadi bemane adi’eshia di’eshiba, hababamwene’shi kubakutshikwa bungi bwato, anka abwa bubatwelele bana-be-ba-bukishi; Yesu namu ta mwende mu bwato na bana-be-ba-bukishi hamune, anka bana-be-ba-bukishi nyi abayile abo ba na bene:

²³(Anka kubafikile angi mato ku Tibelease, hehi ku kihindji kia babadile mampa, habatumbwile Nfumwetu.)

²⁴Binyibiabia, habamwene bantu’shi Yesu tabadi kwanka, sunga bana-be-ba-bukishi, abo namu abaikile ’mato, babafikile ku Kahaneuma mu kukimba Yesu.

²⁵Hababamwene dingi eshia di’eshiba, abamwihwishe’shi, Labi bofikile kuno nguba bi nkunyi?

²⁶Yesu bebalulwile’shi: Binyibinyi, binyibinyi, nenwambashi, Tanunkimbila ha mwanda nubamwene bilengeleshe biande, ng’anka mwanda nubadile mitanda, nwa yikuta.

²⁷Tanufubilanga bidibwa abinyanga, anka ku bia kwikala mpa na ku muwa wa ikala-ika; abikenuha Mwan’a Muntu, mwanda E batudilwe kitundwilo kwi Yaiya Efile Mukulu na mwinyi.

²⁸Binyibiabia, abamwihwishe’shi, Tukita na minyi bia tudi akukita mifubo y’Efile Mukulu?

²⁹Yesu bebalulwile’shi: Uno nyi mufubo w’Efile Mukulu’shi, nukumine mwadi E abatumine.

³⁰Binyibiabia abamwihwishe’shi: A nkitundwilo kinyi kio kitshi, tumone, tukukumine? A nkinyi kio fubu?

³¹Bashyetu-kulu babadile māna mu kabaka, bu bibafundjibwe’shi: E bebahele bidibwa bia mwiilu.

³²Biabia Yesu bebalungwile’shi: Binyibinyi, binyibinyi, nenulungula’shi, Mosesa ta mwinuhe abia bidibwa bia mwiilu, anka Shami E nuheya bidibwa bia binyibinyi bia mwiilu.

³³Mwanda bidibwa bi’Efile Mukulu, nyi ngyawa baikile mwiilu, aha be ha nsenga muwa.

³⁴Binyibiabia abamwalulwile’shi: A Mwanana, etuhe bino bidibwa bia mafuku oso.

³⁵Yesu bebalungwile’shi: Nyi biashi bia muwa; e afiki kwandji ta kamono nsala, n’e ankumina, ta kekala na nyota sunga ngihela.

³⁶Anka nenulungwile’shi: Nubamwene namu ta nwibankumine.

³⁷Boso babampele Yaiya abakafiki kwandji, n’e afiki kwandji ta nkamubingi, ayoyo.

³⁸Mwanda nkimufikile mwiilu kukita bu mwankyebela, anka amukyebela bantumine.

³⁹Bino nyi abikyebe eshimba dia bantumine’shi: ku bioso biampele, tankashimisha sunga nkimune; anka nkekisangula h’efuku dia nkonko.

⁴⁰Bino nyi abikyebe eshimba dia bantumine’shi; muntu ese atala Mwana, amukumina, akekala na muwa wa ikala-ika; n’ami nankamubusha kwifuku dia nkonko.

⁴¹Binyibiabia Bena Yudea babadi abamūñuna, mwanda E bebalungwile’shi, Ami nyi biashi bibafikile mwiilu.

⁴²Abaihwishe’shi: Ta ngwinyi Yesu, mwan’a Yosefe, shye na nyina atwibeuku? A biabia nkinyi’shi, āmbashi, natukile mwiilu?

⁴³Binyibiabia Yesu bebalulwile’shi: Tanwiununanga munkatshi mwenu.

⁴⁴Ta kwi muntu sunga ngumune euku kufika kwandji, anka su Yaiya bantumine, amukaka: n’ami nankamubusha kwifuko dia nkonko.

⁴⁵Kibafundjibwe mu (mikandaya) batemukye’shi: Boso abakalambukishwa kw’Efile Mukulu. Binyibiabia, muntu ese bahushishe bayiyile kwi Yaiya, afiki kwandjimi.

⁴⁶Takwi muntu bamwene Yaiya anka E bafikile kw’Efile Mukulu, E nyibawene Yaiya.

⁴⁷Binyibinyi, binyibinyi nenwambashi: Awa akumina mwimi e na muwa wa ikala-ika,

⁴⁸Ami nyi binyi biashi bia muwa.

⁴⁹Bashenu babadile māna mu kabaka, babafwile.

⁵⁰Bino nyi biashi abifikā mwiilu’shi, muntu akebidi takafu.

⁵¹Ami nyi binyi biashi bia niuwa, bibal’ikile mwiilu: su muntu adi bino biashi, akekala na muwa wa ikala-ika: na binyi biashi biankebaha, nyi mbidi yande, biankahanyina ku muwa wa ba-hano-ha-nsenga.

⁵²Binyibiabia, Bena Yudea babelene mpaka’shi, Au muntu euku kwituha mbidi ye tweyidia na minyi?

⁵³Biabia Yesu bebalungwile’shi: Binyibinyi, binyibinyi, nenwamba’mishi, Su ta nwibadia mbidi ya Mwan’a Muntu, na kutoma mas’E, ta nwi na muwa munda mwenu.

⁵⁴Ese adi mbidi yande, atomo mase ande, e na muwa wa ikala-ika: n’ami nankamubusha kwifuku dia nkonko.

⁵⁵Mwanda mbidi yande nyi bidibwa binyibinyi, na mase ande nyi kia kutoma binyibinyi.

⁵⁶Awa adi mbidi yande, atomo mase ande, emubombele mwimi, n’ami namu mwadi.

⁵⁷Bi bantumine Yaiya a muwa, n’ami namwene muwa kwi Yaiya; anka biabia yawa akandji, na mwinyi akekala na muwa kwandjimi.

⁵⁸Uno nyi binyi biashi bibafikile mwiilu: ta hamune’nka bashenukulu babadile, māna, babafwile; ’ādi bino biashi akekala na muwa wa ikala-ika.

⁵⁹Bino bintu bebiakwile mu kitumbwilo, habadi alambukisha mu Kahaneuma.

⁶⁰Binyibiabia bangi ba bana-be-ba-bukishi, habahushishe biabia, tabakula’shi: Uno mwanda wi bukoho, nanyi euku kwiushingula?

⁶¹Habeukile Yesu munda we’shi, bana-be-ba-bukishi abeunyinga, bebehwishishe: Uno mwanda awinukokosha su?

⁶²Su anukamona Mwan’a Muntu akamina mubadi kwibedi, a na minyi?

⁶³Nyi Kikudi akihana muwa, mbidi tayikita kintu: myanda yanyinulungula, ngia kikudi nayamuwa.

⁶⁴Anka kwi bangi hanudiha bashi bakumine. Mwanda Yesu badi mwiukye kumbangilo abo tababadi bakumine, n’awa akamusokola.

⁶⁵Biabia, E bakwile’shi: Nyi ha uno mwanda nenulungwile’shi: Muntu teuku kwifwila kwandji, anka su nkimuhebwe kwi Yaiya.

⁶⁶Ku kia kihindji banabe-ba-bukishi be bungi babalukile kunyima, tambende n’e dimo.

⁶⁷Biabia Yesu behwishe bekumi na babidi’shi: Anwe namu anukyebe kwenda su?

⁶⁸Henyihaha Shimona Petelo bamwalulwile’shi: A Mumu, atukēnde kwi’nyi? Obe we na misambo ya muwa wa ikala-ika.

⁶⁹Atwe atuku mina na kwiuka’shi: Obe we Kidisitu, A Kishila’ Efile Mukulu a muwa.

⁷⁰Yesu bebalulwile’shi: Ami nkinusangwile ekumi na babidi be? anka umo’enu nga diabola.

⁷¹Badi akula ’Yudasa Isakadiota mwan’a Simono: mwanda ne badi akyebe kumusokola, e biabadi mwikale umune a ku be kumi na babidi.