Read songe Bikitshino 10 Bible Online

Bikitshino 10 - songe bible

Bikitshino 10

¹Mu Kesalea mubadi muntu eshina die bu Konelusa, kimankinda kia kibumbu kia ngoshi, akitemunwa bu kia Bantadiana.

²Badi muntu mululame, badi atshinyi Efile Mukulu na ba munshibo ye boso hamune, badi aha bantu bia buntu bibungi, badi alangwila Efile Mukulu mafuku oso.

³Habadi nguba su ha nsa yisatu ya kiolwa, bamwene kimonwa, mwikeilu e’Efile Mukulu kwete kufika kwadi, na kwakula kwadi’shi: Konelusa:

⁴Habamushinkikile meso, bakwetwe na moo, bambile’shi: A nkinyi Mwanana? E bamwalulwile’shi: Nteko yobe na bia buntu biobe bibakamine ku mpala kw’Efile Mukulu bu kitentekyesho.

⁵Binobino otume bantu kwi Yoha mu kwitanyina Shimona, aitanyinwa bu Petelo.

⁶E mubombele kwa Shimona mulumbudi a misekya, nshibo ye yi ku bukunkula kwa mem’a kalunga: akakulungula biodio kukita.

⁷Winyi mwikeilu ha badi bakula na Konelusa, habakatukile, baitanyine bafubi babidi ba mu nshibo ye, na musalai mululame a ku baba abadi abamufubila mafuku oso;

⁸biabia habebalungwile yino myanda yoso, bebatumine ku Yoha.

⁹Ha ding’efuku dia maloba, habadi abēnde luendo lwabo, na hakwishesha hehi na kibalo, Petelo bakamine hanundu ha nshibo mu kuteka, nguba tabādi hehi mitwe.

¹⁰Biabia nsala namu yibamukwete, takyebe kudia, anka habadi abalumbula biakudia, balotakēne kilotwa.

¹¹Bamwene eilu dibabuluka, na kintu kibadi akiiki kwadi, kibadi bu kilamba kikata, akiiki hashi kianyibwe ku matungi ananka.

¹²Amo mubadi bihaso bioso bia nyama ya hanohansenga yi na mikolo yinanka, n’ayi yi bukyelo, na bintu abilandala hashi, na tonyi twa mwiilu.

¹³Biabia eyi dibafikile kwadi’shi: A Petelo, buka, oyihē, odye.

¹⁴Anka Petelo bālulwile’shi: Ayoyo, Mwanana, ami, kashia, tandjile bintu abidiā bantu boso budyedye sunga bishidikwe kishila.

¹⁵N’eyi dibākwile kwadi diakabidi’shi: Kiakia kibatosheshe n’Efile Mukulu, tokwikilumba bu kia bisumanga.

¹⁶Kibakitshinwe biabia misusa yisatu, na kintu kibadi bu kilamba kikata kibālukile mwiilu.

¹⁷Na habadi Petelo kialashena munda mwe mwiyile kiakia kimonwa mwa kuhatulwila kianka, biabia benyi balume abatuminwe kwi Konelusa tabahwile kwihusha nshibo ya Shimona, abadi bemane ha kibelo;

¹⁸abetamine, behusha’shi: A Shimona, aitaminwa bu Petelo, mushale muno su?

¹⁹Habadi Petelo kwete kutentekyesha kimonwa, Kikudi-E-Selelee bamulungwile’shi: Tala, bulume basatu abakwihusha.

²⁰Biabia, buka, oyikye hashi, wende n’abo kushī kushingakana, mwanda n’ami bebatumine.

²¹Henyihaha Petelo bayikile kwi balume babatuminwe kwadi kwi Konelusa’shi: Tala, n’ami uno anukimbi; akibenufwisha nkinyi?

²²Abamwalulwile’shi: Konelusa, winyi mulami a basalai lukama, muntu mululame, na kutshin’Efile Mukulu, sha ntumbo yibuwa munkatshi mwa mwilo woso wa Bena Yuda, badimwinwe n’Efile Mukulu, kwi mwikeilu muhatulweakishila’shi, akutumine bakukufisha ku nshibo ye, na kukwilwakana biokākula.

²³Henyihaha bebetanyine mwanka, ebatula mwa kushāla; habubatokele Petelo bayile n’abo. Na bamo bakwabo ba ku Yoha abamushindjikile.

²⁴Habubatokele dimo abatwelele mu Kesalea. Konelusa badi ebatengyela, muhwe kukongola ba mu kifuko kie, na bakūku be.

²⁵Habadi Petelo atwele, Konelusa bafumankene n’e, bahone ku ngwa ye, tamulangwila.

²⁶Anka Petelo bamubushishe’shi: Ebwe, ami namu nyi anka muntu.

²⁷Habadi akula n’e batwelele, basañene bebungi abadi bekoñene.

²⁸E bebalungwile’shi: anwiuku’shi, mwanda wa Mwina Yuda kushāia na muntu a ungi mwilo, sunga kufika hehi n’e nyi nkishila, anka Efile Mukulu bandesha’shi, tolumbanga mungi muntu’shi nga bisumanga, sunga mbu mushidikwe kishila.

²⁹Nyi ha uno mwanda unafikila kwanudi kushī kuhakanya, anka hanadi mwitanyinwe, biabi nenwihusha winyi mwanda wa nubanyitaminyine.

³⁰Konelusa bakwile’shi: Mafuku ananka abakidi binobino hanadi ashidi bidibwa mpa na ha yino nsā, na ha nsā yisatu ya kiolwa nadi atekye mu nshibo yande, ami’shi ntale’bi, muntu mulume taimene ku mpala kwande mufwale bi mbādibādi.

³¹Bakwile’shi: A Konelusa, luteko lwobe lubahushibwa, na biabuntu biobe bibatentekyeshwa ku mpala kw’Efile Mukulu.

³²Biabia tuma ku Yoha, oitamishe Shimona kuno, dingi eshina die mbu Petelo; e mūshale mu nshibo ya Shimona mulumbudi a misokya, hehi na ku bukunkula bwa mema-a-kalunga, e winyi hakafiki, akākula kodi.

³³Binyibiabia kahindji n’aka natumine kodi, n’obe namu bokitshi bibuwa ha kufika. Biabia binobino atwe boso twi kuno ku mpala kw’Efile Mukulu, mu kuhusha myanda yoso yibakulungwilwe kw’Efile Mukulu.

³⁴Henyihaha Petelo babulwile mu kanwa bakwile’shi: Binyibinyi nashingula’shi, Efile Mukulu tanemekā bantu’shi, au ngiu, au tangiu, ooo;

³⁵Anka mu milo yoso, e akamutshyini, na kukita bia kululama, e mukuminyibwe n’e.

³⁶Winyi mwanda ubatuminwe kwi bana ba Isalele, aulungulā mukāndu wibuwa wa kufukama kwa Yesu Kidisitu (E nyi Nfumua bioso;)

³⁷Diadia eyi anwidiuku, dibalungwilwe moso mu Yudea, kuatshila ku Ngadilea, kumongo kwa lubatshisho lubakwile Yoano;

³⁸mu Efile Mukulu abahongolwele Yesu a Nasaleta na Kikudi-E-Selelee na bukome; tēnde, akitanga bibuwa, kwete kuhasha boso abafwambwilwe na Satana; mwanda Efile Mukulu badi n’e.

³⁹N’atwe twi tumonyi twa bintu bioso bibakitshine mu nsenga ya Bena Yuda na mu Yelusalema; winyi ababayihayila, nbamuhudika ku mutshi.

⁴⁰E winyi, Efile Mukulu bamubushishe h’efuku dia kasatu, bamufumbwile hatoka;

⁴¹Ta ku bantu boso, ooo, anka kwi tumonyi, tubasangwilwe kwibedi kw’Efile Mukulu, nyi ank’atwe abadile n’e na kutoma n’e habahwile kusanguka ku lufu.

⁴²E betukamikile kulungula w’Efile kwi bantu, na kwisamba bu tumonyi’shi, n’e basangwilwe kw’Efile Mukulu Nsushi a abatala na bafwe.

⁴³Batemuki boso abamwisambilanga anka e bu tumonyi’shi, ese akakumina mwadi e, akatambula kulekyelwa kwa milwisho mwishina die.

⁴⁴Habadi Petelo kwete kwakula yino myanda, Kikudi-E-Selelee bahōne ha boso abahushanga mwanda w’Efile.

⁴⁵Abo boso bena lukumino basalwe, abafikile na Petelo, abakanyine, mwanda buntu bwa Kikudi-E-Selelee bubahongolwelwe namu ha Badjentaila.

⁴⁶Mwanda abebahushishe bakwete kwakula (yingi) ndjimi, na kutumbisha Efile Mukulu. Binyibiabia Petelo bālulwile’shi:

⁴⁷A muntu kinyi euku kuhela na mema’shi, tabatshishwanga, baba batambule Kikudi-E-Selelee hamune n’atwe?

⁴⁸Biabia bebakamikile’shi: babatshishibwe mwishina dia Nfumwetu. Henyihaha abamusendelele’shi: Banda kwikala n’etu mafuku.