Read songe Bikitshino 11 Bible Online

Bikitshino 11 - songe bible

Bikitshino 11

¹Batumibwa na bakwabo mu lukumino abadi mu Yudea abahushishe’shi: Badjentaila namu tabahwile kutambula mwanda w’Efile.

²Habakamine Petelo ku Yelusalema, aba bakisale abelele n’e mpaka’shi:

³Obe botwelele mwi bantu bashī basalwe, bodīle n’abo.

⁴Anka Petelo bātshidile kwibalungula mwanda na kwibahatulwila biya’shi:

⁵Nadi mu kibalo kia Yoha kwete kuteka, nalotakēne kilotwa, mu kilotwa namwene kimonwa; kintu kikwete kwiika bu kilamba kikata akiishwa mwiilu, kikwatwe ku mahaka ananka, kibafikile mpaa na kwandji,

⁶hanekibekyelele nekishingulwile, namwene nyama ya mikolo yinanka, ya hano ha nsenga, n’aya mu mahia ya bukyelo, na bintu abilandala hashi, na tonyi twa mwiilu.

⁷Nahushishe namu eyi adinamba’shi: A Petelo, buka, oyihē, odye.

⁸Ank’ami nakwile’shi; ayoyo Mwanana; mwanda kintu kia bisumanga, sunga nkia kishila takiatwele mukanwa mwande, sunga mususa umune.

⁹Anka eyi dibangalulwile kwiilu mususa wa kabidi’shi: Kiakia kibatosheshe Efile Mukulu tokwikilumba bu kia bisumanga.

¹⁰Kibakitshinwe biabia misusa yisatu: na bioso abebikakile dimonyi mwiilu.

¹¹Ami’shi ntale’bi, kahindji n’āka balume basatu tabafikile kala ku nshibo kwanadi abantuminwe ku Kesalea.

¹²Biabia Kikudi-E-Selelee bandungwile kwendan’abo kushī kushingakana. Bano bakwetu basamombo namu abanshindjikile tubatwele mu nshibo y’awa muntu.

¹³E betuhatulwile mubamwenene mwikeilu mu nshiboye, mwimane kwadi, amulungula’shi: Tuma bantu ku Yoha, oitamishe Shimona dingi eshina die mbu Petelo;

¹⁴e akakulungula myanda yakukuhasha na ba mu nshibo yobe boso.

¹⁵Hanabangile kwakula, Kikudi-E-Selelee bebahonene, bu kibahonene hatudi kwibedi.

¹⁶Henyihaha natentekyeshe mwanda wa Nfumwetu mwabakwidile’shi: Binyibinyi Yoano babatshishanga na mema, anka anwe anukabatshishwa mu Kikudi-E-Selelee.

¹⁷A biabia, su Efile Mukulu bebahele kia būntu, kihwandjikile hamune n’akia betuhele’twe bakumine Nfumwetu Yesu Kidisitu, ami nadi’nyi a kushikila Efile Mukulu?

¹⁸Hābahushishe yino myanda, abauminyine nyaa, tabatumbishe Efile Mukulu’shi: Biosobi Efile Mukulu muhe Badjentaila namu kwilanga kwa mashimba ku muwa.

¹⁹Henyihaha aba abadi bahalakashwe ha mwanda wa kusabulwa kubabukile ha Setafane, abayile mpā na ku Fenisea na ku Saihusa na ku Anteoka, bakwete kulungula w’Efile anka kwi Bena Yuda, kushi kwi bangi, ooo.

²⁰Bangi be n’abo abadi bena Saihusa na ba Sailene, baba, habāfikile ku Anteoka abesambile na Bangidiki, tabebalungula mukānduwibuwa wa Nfumwetu Yesu.

²¹Na mboko ya Nfumwetu yibadi n’abo, bantu be bungi abakuminyine, abealulwile kwi Nfumwetu.

²²Henyihaha mikāndu ya yino myanda yibafikile ku matwe ā’ba mu kikoñeno ki’Efile kibadi mu Yelusalema; biabia abatumine Banabasa’shi, ēnde mpaa na ku Anteoka.

²³E habafikile kwanka na habamwene bumuntu bw’Efile Mukulu basehelele; bebalangile boso’shi, balamate kwi Nfumwetu na kufuna mu mashimb’abo.

²⁴Mwanda e badi muntu mulumbulukye, muule nda na Kikudi-E-Selelee, na lukuluhilo. Bantu be bungi abadi abakumbashwa kwi Nfumwetu.

²⁵Henyihaha Banabasa bebwele kwenda ku Tasusa mu kukimba Saulu;

²⁶Habamusañene, bafikile n’e ku Anteoka. Bitabibakitshine’shi, kihwa kimune kishima abadi bekoñene hamune na kikoñeno ki’Efile, tabalambukisha bantu be bungi. Biabia balondji b’Efile nyi mwababangile kwitanyinwa bu Bena Kidisitu mu Anteoka.

²⁷Mu aa mafuku batemuki abafikile ku Yelusalema bakafika ku Anteoka.

²⁸Mungi, eshina die bu Agabusa bēbwele, bahatulwile mu Kikudi-E-Selelee’shi: Akukekala: kihuha kia nsala hanohansenga hoso; kibamwekyele mu mafuku a Kalaudiuse Kesala.

²⁹Henyihaha balondji b’Efile, muntu ese muhunda buheta bwe, abafunyine’shi: Tutume bia kukwashia bakwetu babombele mu Yudea.

³⁰Abakitshine biabia, babebitumine na Banabasa na Saulu kwi; bakulu.