Read songe Bikitshino 12 Bible Online

Bikitshino 12 - songe bible

Bikitshino 12

¹Mu aa mafuku nfumu Heloda bolwele mboko ye ya kumwesha malwa kwi bamo ba ku kikoñeno ki’Efile.

²Bayihayile Yakoba mukwabo na Yoano na luhete lwa ngoshi.

³Na ha mwanda bamwene’shi: ubatosha mashimba a Bena Yuda, bakishikishe akukwata Petelo namu. (Mu aa mafuku abadi a mampa ashī na kitatusho.)

⁴Habamukwete, bamwele mu nshibo ya lukano, bamutudile kwi basalai abadi abeangushena bananka bananka mu kumulama; abadi abafuna munda’shi; ahakahu kidibwa kia Paque, atukamufisha kwi bantu.

⁵Biabia Petelo badi mulamibwe mu lukano binyibinyi; anka nteko yibatekyelwe kwi Efile Mukulu bukyelebukyele kwi kikoñeno ki’Efile ha mwanda we.

⁶Habadi Heloda takyebe kumutusha, bwabwa bufuku Petelo badi mulale hankatshi ha basalai babidi mwanyibwe na nkano yibidi; na balami abadi ku kibelo abalama nshibo ya lukano.

⁷Biosobi mwikeilu a Yehowa taimene kwadi, n’etata dibamunyikile mu nshibo ya lukano; e bamubaswile ha lubafu, amubusha’shi: Ebwe lubilo. Biabia nkano yibahulumukile ku māsa.

⁸Binyibiabia mwikeilu bamulungwile ’shi: anya nshiho yobe, onye bilato biobe. E bakitshine biabia. Bamulungwile namu’shi: Ekumhidishe mutwelo wobe, ondonde,

⁹E batukile, amulonda; tamushingule’shi, ngwa binyibinyi abakitshibwa kwi mwikeilu, ooo; anka batentekyeshe’shi: naloto kimonwa.

¹⁰Habahwile kukila nsamu ya kwibedi na ya kabidi, abafikile ku kibi kia kilonda akishitwilwa ku kibalo, akio kibeshitukile ki na mwinyi; abo abatukile, abakile luhata lumune; henyihaha mwikeilu bamulekyele.

¹¹Biabia Petelo hakuhasamuka bakwile’shi: Binyibinyi neuku binobino’shi, Yehowa batumine mwikeilu e, bamañuna namu mwiasa dia Heloda, na mu bioso abitengyelanga Bena Yuda.

¹²Habadi kwete kutentekyesha biabia, bafikile ku nshibo ya Madiya nyin’a Yoano, eshina die dia kutandwa mbu Mako; mubadi mwikongwele bebungi bakwete kuteka.

¹³Biabia Petelo hakututula ku kibi kia ku kibelo, nsongwakashi kitumwanga bafikile mu kuhusha mbufyefye, eshina die mbu Loda.

¹⁴Habashingulwile biya eyi dia Petelo tamushitule kibi ha mwanda wa muloo, anka batwele mwanka lubilo, ebalungula’shi: Petelo ngiu mwimane ku kibelo.

¹⁵Abo abamulungwile’shi: Obe we na mombe. Anka e bakankamene kwakula’shi: Mbinyibinyi. Henyihaha abakwile’shi: Nyi mwikeilu e.

¹⁶Anka Petelo batutudile, na habashitwile kibi babamumwene, bakanyine.

¹⁷Anka e kwete kwibahohesha n’easa’shi, baumine, bebalungula mubamutushisha Nfumwetu mu nshibo ya lukano. Biabia bambile’shi: Ndai, nuleshe yino myanda kwi Yakoba na kwi bakwetu ba mw’Efile. Biabia bakatukile, enda ku kingi kihindji.

¹⁸Binyibiabia hakubatokyele, kubadi kuungakana kukata munkatshi mwa basalai’shi; A Petelo e kunyi?

¹⁹Biabia Heloda habamukimbile, tambamumone, bahīshishe bansamu, bebakamikile’shi, bakunkushwe su nkwihayibwa. E balalele ku Yudea, mpaa na ku Kesalea bashalele kwanka.

²⁰Na Heloda bafitshile mwishimba bikata, Bena Tyle na Bena Shidona: ank’abo abafikile n’eshimba dimune kwadi, biabia habahwile kukonkwela Balasatuse, tshikala a Nfumu kwikala bu kūku abo, abatekyele kufukama, mwanda nsenga yabo yibadishishwe kwi (yaya nsenga) ya Nfumu.

²¹Habafikile efuku disangulwe, Heloda bafwelwe bilamba bia bufumu, ashala ha luhun’a nsulu lwe lwa ntumbo, tesamba n’abo mīsambo.

²²Biabia bantu abēle musase’shi: Nyi eyi di’efile tandjia muntu.

²³Kahindji n’āka mwikeilu a Yehowa bamutahile, mwanda etabadi atumbishi’Efile Mukulu: bifinyua bibamudīle, afwa.

²⁴Anka mwanda w’Efile Mukulu ubatamine, wafwima.

²⁵Banabasa na Saulu abālukile ku Yelusalema, habakumbeshe mufubo w’abo wa mīsambo, abayile na Yoano, eshina die dia butandwa bu Mako.