Read songe Bikitshino 13 Bible Online

Bikitshino 13 - songe bible

Bikitshino 13

¹Mu kikoñeno ki’Efile kibadi ku Anteoka bamo batemuki na balambukishi bu Banabasa, na Shimeone, dingi die dia butandwa bu Naijele, na Luseusa, mwina Saidine, na Manaine, badi akulu na kilolo Heloda, na Saulu.

²Habadi abafubila Nfumwetu mufubo wa mīsambo, na kushīla biakudia, Kikudi-E-Selelee bakwile’shi: Ndamunwinei Banabasa na Saulu ku mufubo unebetaminyine kufuba.

³Habashīle biakudia na kuteka, na kwibatenteka māsā’bo, babebatumine.

⁴Biabia abo, habatakwilwe ku Kikudi-E-Selelee abayile ku Seleusea, abebwele kwanka, abalalele ha mema ku Saipuluse.

⁵Habadi ku Salamise, abalungwile mwanda w’Efile Mukulu mu bitumbwilo bia Bena Yuda; abadi na Yoano kwete kwibakwashia mu mifubo.

⁶Habahwile kwenda, abasambushene kīla, mpaa na ku Mpahose; abasañene kwanka mwina Yuda ñanga a kubuka, mutemuki a madimi, eshina die dibadi bu Balayesu.

⁷E badi na mpianyi a mulamwinyi a nsenga, Selengusiu Paulusa muntu muhatulukye, e betanyine Banabasa na Saulu, bebatekyele’shi: mpushe mwanda w’Efile Mukulu.

⁸Anka Elemasa winyi ñanga a kubuka (mwanda kuhatula eshina die nyi mbiabia) bābwele n’abo, badi akyebe kufutakasha mpianyi a mulamwinyi ku lukumino.

⁹Henyihaha Saulu, (e namu aitaminwa’nyi bu Paulu), muule na Kikudi-E-Selelee, bamutale kanana,

¹⁰bakwile’shi: Obe muule bulamalama boso, na kifita kioso, obe mwan’a dyabola, mushikwene mwa kululama koso, a tolekye kulubishena na kifita mashinda alumbulukye a Nfumwetu?

¹¹Binobino eyasa dīa Nfumwetu di hambidi hobe, n’obe okekala mpofu, kushī kumona nguba kihindji. Kahindji n’āka kubamuhonene kabwingibwingi na mufito, tende akunkanga, akimbi a kumukunkusha na mboko.

¹²Henyihaha mpianyi mulamwinyi habamwene kibakitshinwe, bakuminyine, bakanyine lulambukisho lwa Nfumwetu.

¹³Biabia Paulu na babadi n’e, habahoswelwe ku Mpahose (mbwato) abafikile ku Mpenga mu Mpamfidya: na Yoano, hakwibalamunuka bālukile ku Yelusalema.

¹⁴Anka hābakatukile ku Mpenga, abafikile ku Anteoka mu Mpisidya, abatwelele mu kitumbwilo h’efuku dia Sabado, bashala.

¹⁵Habahwile kubala mukanda-wa-bishila na wa batemuki, bakulu ba mu kitumbwilo abatumine kwabadi’shi: Anwe bakwetu, su nwi na mwanda sunga elango bia kulungula bantu, akulai.

¹⁶Henyihaha Paulu bebw’ēle, hakwibahoha mboko, bambile’shi: Anwe Bena Isalele, n’anwe abatshinyi Efile Mukulu hushai:

¹⁷Efile Mukulu a bano bantu ba Isalele basangwile bashyetukulu, abanemeshe bantu habadi ababombela bu benyi mu nsenga ya Ndjihitu, bebatushishe mwanka na mboko yibukome.

¹⁸Ku kihindji kia bihwa su mbu makumi ananka, abitukile mwishimba ku bihikwa biabo mu kabāka.

¹⁹Habashimangishe mīlo musambobidi mu nsenga ya Kanana, bebābilensenga yabo bu buhyanyi.

²⁰Kumongo kwa’bio bebahele balumbudi ku bihwa bu’ nkama yinanka na makumi atano, mpaa na ku mutemuki Samwele.

²¹Kumongo’nyi abatekyele nfumu: Biabia Efile Mukulu bebahele Saulu, mwan’a Kishe, muntu a ku kisaka kia Bendjamine, ku kihindji kia bihwa makumi ananka.

²²Habahwile kumukatusha, bahingakene Dafidi ta nfumu; ha mwanda e namu bamutemwine’shi: Nasokola Dafidi mwan’a Yese muntu mulombane n’eshimba diande, akakumbasha abikyebe eshimba diande.

²³Ku kekulu ka uno muntu Efile Mukulu babushishe Muhashi a ku Isalele, nyi Yesu, mwiyile mulayilo we.

²⁴Hababadidile Yoano kulungula lubatshisho lwa kwūlanga kwishimba kwi bantu boso ba Isalele kwibedi kwa kufika kwe.

²⁵Habadi Yoano akumbasha kihindji kie, bakwile’shi: Anutentekyesha’she, Ami nyi’nyi? Ami ntshi e, ooo. Anka talangai, akukafiki umune andondo’mi, ami nkimuhwandjikile kwangula bilato bia ku ngwa ye.

²⁶Anwe bakwetu, bana ba ku twikulu twa Abalahama, na boso be munkatshi mwenu, abatshinyi Efile Mukulu, kwanudi nyi eyi dia kino kihandjilo dibatuminwe.

²⁷Mwanda’bo ababombela ku Yelusalema, na batontshi babo, mwanda’bo tambamwiuke, sunga mayi a batemuki abadibwa ku Sabado ku Sabado yoso, abeikumbasha ha mwanda wa kumuhisha.

²⁸Sunga tambamone mwanda wa kumona lufu mwadi, abakyebele Pilata’shi, mwihe.

²⁹Habakumbeshe yoso yiabamufundjile, abamuhulwile ku mutshi, abamuladishe mu kilele.

³⁰Anka Efile Mukulu bamubushishe ku lufu.

³¹E bamwekyele mafuku e bungi kwi’ba abakamine n’e ku Ngadilea mpaa na ku Yelusalemu, baba be bu tumonyi twe kwi bantu.

³²N’atwe atwinulungula mikāndu-yibuwa mu mulayilo ubalayilwe kwi bashyetu-kulu.

³³Efile Mukulu beukumbesha kwatudi’twe bana babo hakubusha Yesu; mwakibafundjilwe namu mu lono lwa-milangwilo lwa kabidi’shi: Obe we Mwan’ande, lelo uno nkutandjile.

³⁴Na ha uno mwanda wa kumubusha ku lufu, kushī kwaluka mu kunyanga, bākwile anka bu bino’shi: Nankakuha’abia biabinyibinyi bia bu-muntu bia Dafidi.

³⁵Biabia namu bakwile mu lungi lono-lwa-milangwilo’shi: Tokakumina obe a Muhatulwe-E-Kishila kunyanga.

³⁶Mwanda Dafidi, habahwile kufubila kifuko ki’e na mwinyi mu bakyebele eshimba di’Efile Mukulu, bahonene mu tulo, habamushikīle hamunenka na bashyetu-kulu anyanga,

³⁷anka yawa babushishe kw’Efile Mukulu, tamunyangye, ooo.

³⁸Biabia anwe bakwetu nwikale beukye’shi, wabakwete kwinulungwila kulekyelwa kwa milwisho, nyi ha uno muntu:

³⁹Na kwadi e, boso abakumina, ababingishwa ku myanda yoso, yianushyanwiuku kubingishwa ku mukanda-wa-bishila wa Mosesa.

⁴⁰Binyibiabia dimukai, tala kiakia kibākwilwe mu batemuki kiakafikila hanudi.

⁴¹Anwe basha kubenda talai, nukanye, nushimangishwe: Mwanda nkwete kufuba mufubo mu mafuku enu wanushyanukakumina sunga mpahelahela, sunga muntu akenulungula wanka.

⁴²Habatukile Bena Yuda mu kitumbwilo, Badjentaila abeihwishe’shi: yino myanda yitulungulwe h’efuku dia Sabado adilondo.

⁴³Hakubahalakene ba mu kitumbwilo, Bena Yuda bebungi na bakuminyi ba lulambukisho lwabo abalondele Paulo na Banabasa, abo, abadi abākula n’abo, bebakonkwelanga’shi: Nukankamanei mu bu-muntu bw’Efile Mukulu.

⁴⁴Ha Sabado dibalondele, hehi kibalo kioso kibekoñene hamune mu kuhusha mwanda w’Efile Mukulu.

⁴⁵Anka Bena Yuda habamwene bibumbu, abulwe na kiutu, abakalashene kwi yingi myanda yibākwile Paulu, abadi abele mpaka na kukāna.

⁴⁶Henyihaha Paulu na Banabasa abanyingile mashimba, bamba’shi: Kw’anka biabia mwanda w’Efile Mukulu kwinulungulwa kwibedi; anka ha mwanda nubeukatusha kwanudi, nubetshibila namu’shi: Tatwi bahwandjikile muwa wa ikala-ika, talai, tubealula kwi Badjentaila.

⁴⁷Nyi anka biabia Nfumwetu betulungwile’shi: Nakutule kwikala bwitata dia Badjentaila’shi; wekale bu kihandjilo mpaana ku nfudilo kwa nsenga.

⁴⁸Badjentailalia bahushishe biabia abasehelele, tabatumbisha Mwanda wa Nfumwetu; na boso abadi basangwilwe ku mona muwa wa ikala-ika abakuminyine.

⁴⁹Na Mwanda w’Efile Mukulu ubahalakeshwe ku lwalwa luhese lwoso.

⁵⁰Anka Bena Yuda abafundūlanga bana bakashi balulame abadi baneme, na balume bakata ba kibalo, ababushishe kubingwabingwa kwi Paulu na Banabasa, abebabingile ku midianyino ya nsenga yabo.

⁵¹Ank’abo abebakukudile lufufi ku ngwa yabo, biabia abayile, bakafika ku Ikoneume.

⁵²Binyibiabia balondji b’Efile abadi baule na kusangala na Kikudi-E-Selelee.