Read songe Bikitshino 14 Bible Online

Bikitshino 14 - songe bible

Bikitshino 14

¹Bitabibakitshine mu Ikoneume, abatwēle bubidi bwabo hamune mu kitumbwilo kia Bena Yuda, na kwakula kwabo kubadi bino’shi, kibumbu kikata kia Bena Yuda na kia Bena Ngidiki namu abakuminyine.

²Anka Bena Yuda abadi bashibakumine abafundulwidile Badjentaila kwibēkasha mashimba afita na bakwabo-bakumine.

³Biabia abashalele kihindji kikata, bakwete kwakula n’eshimba di moo mwi Nfumwetu, n’e bakuminyine bu kamonyi ku mwanda wa bumuntu bwe, bebahele bitundwilo na yakukanya kukitshibwa ku māsa kwabo.

⁴Anka kibumbu kia kibalo kibelamunwine, kihindji kibanemene kwi Bena Yuda, na kihindji namu kwi batumibwa.

⁵Biabia Badjentaila na Bena Yuda, na banfumu babo, habebatombokyele na kahesha, na kwibāsa na mabwe,

⁶abadimukile, basukila ku Lysita na Debe, bibalo bia Laikonya, mpaa na ku mpese yi hehi;

⁷kwanka abalungwile mukāndu-wi-buwa w’Efile.

⁸Mu Lesetala mubadi mushale muntu na ngwa yibofule, badi kishetshi anka kasha batandjilwe munda mwa nyin’e, tabadi atambuka sunga mpahela.

⁹Winyi e bahushishe Paulu akula: n’e, habamutale kanana, na hakushingula’shi, e na lukuluhilo lwa kuhashibwa,

¹⁰bakwile n’eyi di bukoho’shi: Imana susā ku ngwa yobe, biabia bahalele, batambukile.

¹¹Bantu habamwene kibakitshine Paulu, abele bila, bākula mwidimi dia Laikonya’shi: Befile abayiki kwatudi mu kihwandjikisho kia bantu.

¹²Biabia abetanyine Banabasa bu Yupita; na Paulu bu Mekuleuse, mwanda e badi mwakudi mukata.

¹³Henyihaha tshiitemwakwidi a Yupita winyi badi ku meso kwa kibalo kiabo, bafwishishe ñombe yilume na bilongo bilungishene bula ku bibelo bia kibalo, abakyebele kwibatahila bitahilo na bibumbu.

¹⁴Anka batumibwa Banabasa na Paulu, habahushishe wanka, abasanwine bifwalwa biabo, abatwele lubilo munkatshi mwa kibumbu, bēla musase,

¹⁵na kwakula’shi: A Balumiana, a kianukitshi yino myanda nkinyi? Atwe namu twi anka bantu na bihikwa hamune n’anwe, atwinulungula w’Efile’shi: nwalule ku bino bintu bia bisumanga mpaa na kw’Efile Mukulu a muwa, bahangile eilu na nsenga, na mema-a-kalunga, na bioso bi mwanka;

¹⁶E, mu bihwa bibakidi, bakuminyine milo yoso kutambuka mu mashinda akyebe mashimba’abo.

¹⁷Sunga mbiabia e tamulekye namwinyi kushi kamonyi, kwete kukita bibuwa, betuhele mpeshi mwiilu, na bihindji bibuwa bia kuha bikuba, betuushishe ’mashimba na biakudia na muloo.

¹⁸Biabia abo, mu yino myanda abamwene bukoho kulekyesha kibumbu kwibatahila bitahilo.

¹⁹Kubafikile Bena Yuda ku Anteoka na ku Ikoneume mwanka, abo abakonkwelele bantu, na habahwile kwasa Paulu mabwe, abamukakile hasha ha kibalo, tabatentekyesha’shi bafu.

²⁰Anka habadi balondji bemane bamwifunye, babukile, abakatwela mu kibalo; na maloba, abēbwele na Banabasa bēnde ku Debe.

²¹Habahwile kulungula mukāndu-wi-buwa mu kiakia kibalo, na hakufwimisha balondji b’Efile bebungi, abālukila dimo ku Lyisita, na ku Ikoneume na ku Anteoka.

²²Bakwete kukankamisha mashimba a balondji b’Efile, na kwibalanga’shi: Nunyingamanei mu lukumino, mwanda nkihwandjikile ’twe kumona misāibulo yibungi ha kutwela mu bufumu bw’Efile Mukulu.

²³Henyihaha habahwile kusangula bakulu mu bikoñeno bioso bi’Efile, na hābatekyele, na kushīla biakudia, abebafishishe kwi Nfumwetu abākuminyine.

²⁴Habahwile kusambushena Mpisidya, abakafikile ku Mpamfilea.

²⁵Habadi abalungula Mwanda w’Efile mu Penga abalalele mpaa na mu Atadia.

²⁶Henyihaha abakatukile kwanka, ta balala’ mbwato mpaa na ku Anteoka, kwabadi balubwilwe ku bumuntu bw’Efile Mukulu ku winyi mufubo wabakumbesliwe.

²⁷Biabia habafikile, na habadi abekoñena hamune kikoñeno ki Efile, abahatulwile yoso yibakitshinen’abo Efile Mukulu, na mwabashitwidile kibelo kia lukumino kwi Badjentaila.

²⁸Kwanka, abashalele kihindji kikata na balondji (b’Efile).