Read songe Bikitshino 15 Bible Online

Bikitshino 15 - songe bible

Bikitshino 15

¹Binyi biabia bangi abalalele ku Yudea tabalambukisha bakwetu ba mu Kidisitu’shi: Anka su tanwibasalwe mulombene kihikwa kia Mosesa, biabia tanwiuku kuhashibwa.

²Binyibiabia Paulu na Banabasa hababadi na kubwela kukata na kwiihushena n’abo, abafune’shi, Paulu na Banabasa, na bangi b’ābo abakamine ku Yelusalema, kwi batumibwa na kwūbakulu ha luno lwihusho.

³Na hakwibashindjikila kwi beba kikoñeno ki’Efile, abakasambukile Fenesea na mu Samadia, abenda, abalungulanga kwaluluka kwa mashimba kwa Badjentaila, biabia abatosheshe mashimba a bakwabo be mu Kidisitu bikata.

⁴Habafikile ku Yelusalema, kikoñeno ki’Efile, na batumibwa, na bakulu abebakukile, n’abo bebalungula myanda yoso yibakitshine Efile Mukulu n’abo.

⁵Anka bamo ba mu luhese lwa Bafadiseo, babadi bakumine babebwele, bamba’shi: Watudi n’au ngwa kwibasala, na kwibakamika’shi: nulamei mukanda wa-bishila wa Mosesa.

⁶Biabia batumibwa na bakulu abekoñene hamune mu kudia lukuku lwa uno mwanda.

⁷Habahwile kwihatulushena bikata bimoo, Petelo bebwele, bebalungwile’shi: A bakwetu anwiuku’shi, mu mafuku a kwibedi, Efile Mukulu bansangwile’mi a munkatshi mwenu’shi, Badjentaila befwakane mwanda wamukāndu-wi-buwamu kanwa mwande, nakukumina.

⁸Efile Mukulu euku nyikashi ya mashimba, bebakuminyine, ebaha Kikudi-E-Selelee anka mwabetuhelele’twe.

⁹Tambilekene n’atwe n’abo, ooo, batoshwa mashimba’bo na lukumino.

¹⁰Binyibiabia a kianutompela Efile Mukulu nkinyi? Anukyebe kutula kikumbo ha mashingo a balondji, kibakutshilwe bashyetu-kulu sunga n’atwe kwikitwala?

¹¹Anka atukumina’shi, ha mwanda wa bumuntu bwa Nfumwetu Yesu Kidisitu, atukahashibwa anka hamune n’abo.

¹²Henyihaha kibumbu kioso kibauminyine nyaa, tabatee matwi kwi Banabasa na Paulu, abadi abebahatulwila binyi bitundwilo na biakukanya, bibakitshine Efile Mukulu n’abo kwabadi munkatshi mwa Badjentaila.

¹³Biabia habakwile kuumina nyaa, Yakoba bālulwile’ shi: Anwe bakwetu, mpushei’mi,

¹⁴Shimona bahu kuhatula mubakitshinyine Efile Mukulu kwibedi kwi Badjentaila kuata munkatshi mwabo bantu, tamba mwishina die.

¹⁵Biabia ha kinoki namu kibalombene myanda ya batemuki, anka mwakibafundjilwe’shi:

¹⁶Kumongo kwa bino, nankāluka, Nankashimika dimonyi kibombelelo ki’ehema kia Dafide kibahonene hashi; Kibundu ki’akio nankekibaka dimo, Na kwikishimika dimo,

¹⁷Eshi baba abashala bakimbe Yehowa, Na Badjentaila boso habadi eshina diande ditemwinwe, akula Yehowa, Winyi akitshi bino bintu bioso.

¹⁸Kwiukibwa kw’Efile Mukulu bikitshino bie bioso mpaa na ku mbangilo ya hanohansenga.

¹⁹Binyibiabia mwanantshibila mbino’shi, tatwibakalakashanga ababahwile kwaluluka kw’Efile Mukulu ba munkatshi mwa Badjentaila.

²⁰Anka twibafundjile’shi: belame ku milambo ya butete yilambulwe mankishi, na ku bukyebekyebe, na ku bintu bifinyibwe nkono, na mase.

²¹Mwanda Mosesa kala mpaa na binobino, e na balungudi mu bibalo bioso abo abamulungula mwanda, e kwete kubadibwa mu bitumbwilo ku lubingo, ku lubingo.

²²Henyihaha batumibwa, na bakulu, na kikoñeno ki Efile kioso, abasehelela kusangula bana balume ba munkatshi mwabo’shi, bende na Paulu na Banabasa ku Anteoka; kubadi Yudasa, dingi die bu Basabasa na Shilasa, abo nyi bantu bakulu ba munkatshi mwa bakwabo ba mu Kidisitu.

²³Abebahele mukanda ufundwe bino’shi: Batumibwa na bakulu na bakwetu, abemuna bakwabo ba mu Kidisitu, abo mba Badjentaila be mu Anteoka, na Shidiya na mu Selesia.

²⁴Mwanda tubahushishe’shi, bangi abatukile kuno kwadi, abenukalakasha na bishima, bakwete kuhatakasha mashimb’enu; eshi: Mwanda kw’anka biabia, anwe kusalwa, na kulama mukanda-wa-bishila: n’atwe tatwibebalungule yanka, ooo.

²⁵Hatubadi bekoñene hamune n’eshimba dimune, nkibetuhwandjikil’etwe kusangula bantu, kwibatumina kwanudi, hamune na Banabasa na Paulu atudi n’abo kifulo.

²⁶Bantu basumbule miuwa yabo, ha mwanda w’eshina dia Nfumwetu Yesu Kidisitu.

²⁷Binyibiabia fubenutumina Yudasa na Shilasa, abo, abakenulondolwela bishima bioso mu kanwa mwabo.

²⁸Mwanda nkihwandjikile Kikudi-E-Selelee, n’atwe hamune’shi, Tabibuwa kwinutentekyela bungi bushito bw’eshimba bukile buno, mwanda wa yino ngilombene mwanka;

²⁹eshi, nushīle bidibwa abilambulwa mankishi, na mase, na ku bintu bifinyibwe nkono, na ku bukyebekyebe; ku bino’bi, su anwilama anwe bana bene, anukekala balumbudibwe. Shalai bibuwa.

³⁰Habatundukile, abakifile ku Anteoka: habadi’nyi bekoñene kibumbu hamune, abebafwishishe mukanda;

³¹habeubale abasehelele ha mwanda w’elango.

³²Biabia Yudasa na Shilasa namu, abadi batemuki, abo bana bene, abalangile bakwabo ba mu Kidisitu na bishima bibungi, n’abo abebakankamikile.

³³Habahwile kushala kwanka kihindji, abahoswelwe na kufukama kwi bakwabo ba mu Kidisitu, bebālusha kwi batumibwa.

³⁴Anka Shilasa batentekyeshe’shi, bibuwa nshale kwanka.

³⁵Paulu na Banabasa namu bashalele mu Anteoka, bakwete kulambukisha na kulungula mukandu-wibuwa w’Efile Mukulu, na bangi bebungi namu.

³⁶Habakile angi mafuku, Paulu, bakwile kwi Banabasa’ shi: Twalukile mu kutompa bakwetu ba mu Kidisitu be mu bibalo bioso, biatulungulanga mwanda w’Efile Mukulu, na kutala su be na minyi.

³⁷Banabasa bafune’shi, Yoano ende n’etu, eshina die dia batandwa dibadi bu Mako.

³⁸Anka Paulu bahwandjikishe’shi: tabibuwa kwenda na muntu bakatukile etuleka, hatubadi mu Hamfidya, tamwende n’etu ku mufubo.

³⁹Biabia ha mwanda wa mpaka yikata yibatukile, abelamunwine, muntu he, muntu he. Biabia Banabasa bāishile Mako, bālalele mu bwato ku Saihuluse.

⁴⁰Biabia Paulu namu besangwile Shilasa, hakukanyibwa na bakwabo ba mu Kidisitu ku bumuntu bw’Efile Mukulu, bayile.

⁴¹Biabia e bayile, bakile mu Shidiya na mu Selesia, badi akankamika bikoñeno bi’Efile.