Read songe Bikitshino 16 Bible Online

Bikitshino 16 - songe bible

Bikitshino 16

¹Binyibiabia bafikile ku Debe na ku Lesetala, talangai, kubadi mulondji we’Efile, atemunwa bu Temote, mwan’a mwina Yuda mwana mukashi, e namu badi mukumine; anka shye mwina Ngidiki.

²Badi mutumbishibwa bibuwa kwi bakwabo ba mu Kidisitu babadi ku Lesetala na ku Ikoneume.

³Paulu badi akyebe kwenda n’e, biabia bamwatshile, amusala, ha mwanda wa bena Yuda abadi ku yaya mpese; mwanda abadi beukye’shi, shye nyi mwina Ngidiki.

⁴Habakile mbibalo, abebahanga bishila bia kulama, bibadi bisangulwe kwi batumibwa na bakulu abadi mu Yelusalema.

⁵Biabia bikoñeno bi’Efile bibashimete mu lukumino, bungi bwabo bubafwimanga kwifuku n’efuku.

⁶Binyibiabia habayile na kufumankasha mu Fidjia na mpese ya Ngalatea, na kulekeshwa na Kikudi-E-Selelee’shi: tanukalungulanga mwanda w’Efile Mukulu mu l’Aisie.

⁷Na habafikile mu Myisia, abafune kwenda ku Bitunia, anka Kikudi-E-Selelee tabakuminyine.

⁸N’abo hakukila Myisia abālalele ku Toasa.

⁹Biabia, bufuku kimonwa kibamwekyele kwi Paulu. Kubēmene muntu a ku Masedonya amwiyayila’shi: Fika kuno ku Masedonya, wetukwashie,

¹⁰Habahwile kumona kimonwa, kahindji n’āka tubadi atukyebe mwa kuyile mu Masedonya, tubashingula ’mashimba’shi, Efile Mukulu betwitanyina kwibalungula mukāndu wibuwa w’Efile.

¹¹Henyihaha hakulandasha bwato ku Toasa, tubalulamishe mpaa na ku Samotalasea, na habubatokyele tubafikile ku Neaholese;

¹²Kwakwa tubakatukile, twenda ku Fidihai, akia kibalo nkikile bikwabo bioso bia ku alwa luhese lwa Masedonya, nyi nkilolo kia Bena Loma, tubashalele mu kiakia kibalo angi mafuku.

¹³Ha Sabado namu tubakatukile ku kibalo ki ku bukunkula bwa mwela, habadi bakuminwe luteko; biabia tubashalele hanka, tubākwile kwi bana bakashi abadi bekoñene.

¹⁴Kubadi mwana mukashi, eshina die mbu Ledea, muha nyisha a bimongolokye, badi a ku kibalo kia Taiyataila, badi alangwile Efile Mukulu, e betuhushishe; die eshimba Nufmwetu bedishitwile, e batudile eshimba ku myanda yibākwilwe kwi Paulu.

¹⁵E, hababatshishwe, n’abo mu nshibo ye kumune, betwiyayile’shi: Su nubampwandjikisha bu mushinaate kwi Nfumwetu, twelai mu nshibo yande, nubombele. Biabia e betukankamikile’shi, anka biabia.

¹⁶Bitabibakitshine, hatubayile mu kuteka, tubafumankene na nsongwakashi mukwatwe na kikudi kia lubuko, winyi badi asungulwila banfumu e mono yibungi ku lubuko lwe.

¹⁷Winyi balondele Paulu n’atwe, bēlanga musase’shi. Bano balume mbahika b’Efile Mukulu mukile bukata; abetuhatulwila eshinda dia kihandjilo.

¹⁸E bakitshine bino mafuku e bungi. Anka Paulu, hakufitwa n’eshimba, bealulwile, akula kwi kikudi’shi: Nakukamikila mwishina dia Yesu Kidisitu’shi: Otuke mwanka. Binyibiabia kahindji n’āka batukile.

¹⁹Biabia banfumu e, habamwenene’shi: mwatubakuluhilanga mono mubahu, abakwete Paulu na Shilasa, abebakakīle ku kisalwe kwi batontshi.

²⁰Abebafishishe namu kwi bansushi’shi: Bano bantu Bena Yuda abakamba kukalakasha kibalo kietu.

²¹Abalambukisha namu bihikwa bi kishila kwatudi kwibitambula, sunga nkwibikita, mwanda twi Bena Loma.

²²Binyibiabia kibumbu kibebebwelele hamune; na bansushi namu abebasanwine bilamba biabo, abakamikila namu’shi: Ebakuhilei na nsasu.

²³Na habahwile kwibausha mikombela yibungi, abebēle mu nshibo ya lukano, abakamikile mulami’shi: webalame anka hoo.

²⁴E hakukamikwa biabia, bebatakwidile munkatshi mwa nshibo ya lukano mu na mwinyi, e bebakokwelele mikolo yabo mu tubango hoo.

²⁵Anka munkatshi mwa bufuku, Paulu na Shilasa abatekanga na kuyimba lono lwa ntumbo kw’Efile Mukulu; n’abadi bedibwe mu lukano abebahushishe.

²⁶Biabia kahindji n’āka kubahulumukile kutenkaka na kukata kwa nsenga, biabia bibangilo bia nshibo ya lukano bibatenkakene; kahindji n’aka bibi bibashitukile, na nkano ya boso yibahulumukile.

²⁷Biabia mulami a nshibo ya lukano, hakuhasuka mu tilo, na hakumona bibi bia nshibo mbishitukye, basomwene luhete lwe, takyebe kwiihā, atentekyesha’shi: Abēlwe mu lukano tabasukile.

²⁸Anka Paulu bēle musase n’eyi di bukoho’shi: Twelwishanga, mwanda ’twe boso twi mwanka.

²⁹Henyihaha batekyeshe kimunyi, bafutumukile mwanka luqilo, na hakususa moo, bafikile, akunama ku mpala kwa Paulu na Shilasa.

³⁰Biabia bebatushishe mwanka, tabehusha’shi: A bamwanana, nkihwandjikile’mi kukita kinyi kuhanda?

³¹Abamwālulwile’shi: Kumina mwi Nfumwetu Yesu Kidisitu, n’obe ohande, na ba mu nshibo yobe.

³²Binyibiabia abesambile n’e mwanda wa Nfumwetu, na kwi boso ba mu nshiboye.

³³E bebātshile anka yaya nsa ya bufuku, bebasulweile mikombela yabo; biabia kahindji n’āka e babatshishibwe na b’ē boso.

³⁴Na habebafishishe mu nshibo ye, bebatudile bidibwa, tasehēla, na boso ba mu nshibo ye biabakuminyine Efile Mukulu.

³⁵Habubatokele, bansushi abatumine kwi bashosho ba’ basalai’shi: Ahosole bantu baba bēnde,

³⁶Biabia mulami a nshibo ya lukano balungwile bino bishima kwi Paulu’shi: Bansushi abatemu’shi: bebahosole. Biabia katukai nwende na kufukama.

³⁷Anka Paulu bebalungwile’shi: ooo, atwe Bena Loma, tubakuhilwa ku mpala kwa boso na kwedibwa mu lukano kwa tushibahishibwe, na binobino tabetutakula ku bufyefye’shi, bēnde; ooo tambiabia, bafikye’bo bana bene betutushe.

³⁸Biabia, bashosho ba basalai abakalungwile bino bishima kwi bansushi; n’abo abakwatshilwe na moo habahushishe’shi, nyi mbena Loma.

³⁹Binyibiabia abafikile, tabebasendēla, abebatushishe, abakyebele’shi: Bakatuke mu kibalo.

⁴⁰Biabia abatukile mu nshibo ya lukano, bakatwela mu nshibo ya Ledea; habahwile kumona bakwabo ba mu Kidisitu, na habahwile kwibasamba, abo abakatukile.