Read songe Bikitshino 17 Bible Online

Bikitshino 17 - songe bible

Bikitshino 17

¹Habadi bahwe kukila ku Amfihodise, na Apolonea, abakafikile ku Tesalonika, mubadi kitumbwilo kia Bena Yuda.

²Paulu batwelele mubadi kihikwa kie, na ha mafuku asatu a Sabado, badi ahatulushena n’abo ku Bifundwe bi’Efile.

³Badi abula mukanda na kwibashitulwila’shi: Kidisitu badi na wa kufwambuka, na kubuka dimo ku lufu; uno Yesu namu kwete kwinulungula nyi Kidisitu na mwinyi.

⁴Bamo b’abo abakuminyine, abebungile na Paulu na Shilasa; na kibumbu kikata kia Bena Ngidiki balulame, na bana bakashi baneme tambahela.

⁵Anka Bena Yuda bashī badi bakumine, abakwetwe na kiutu, abebātshile bangi balume bafube be bubi, abehulahula mbisalwe, na hakwikongola kibumbu, ababushishe eunga dikata mu kibalo, beheketa mu nshibo ya Yasona, abakyebele mwa kwibatushisha kwi bantu.

⁶Habakutshilwa kwibasangana, abakakile Yasona, na bangi bakwabo ba mu Kidisitu ku mpala kwa batontshi ba kibalo, abadi abēle musase’shi: Bamo abahatakasha hanohansenga hoso, abafiki kuno namu:

⁷Yasona nyi mwibatweshe munshibo mwe: bano boso bakwete kukita myanda yituhishene na bishila bia Kesala, abakula’shi: Kwi mungi Nfumu Yesu.

⁸Biabia abakalakasha kibumbu, na batontshi ba kibalo habahushishe yino myanda.

⁹Yasona habahwile kwibēka kyee, na bakwabo, abebahoswele.

¹⁰Kahindji n’āka bakwabo ba mu Kidisitu abatumine Paulu na Shilasa ku Belea bufuku, abo habakafikile (kwanka) abatwelele mu kitumbwilo kia Bena Yuda.

¹¹Bano abadi bakile Bena Tesalonika buneme, mwanda abatambwile Mwanda w’Efile na lwimeno lwa binangu, abakimbile Bifundwe bi’Efile kwifuku kwifuku’shi: ayi myanda ngia binyibinyi su?

¹²Binyibiabia bebungi b’abo abakuminyine; na bana bakashi baneme ba Bena Ngidiki, na balume namu, tabadi bahela, ooo.

¹³Anka habashingulwile Bena Yuda ba mu Tesalonika’shi, mwanda w’Efile Mukulu ubalungwile Paulu ku Belea, abafikile kwanka namu, abafundulwile bibumbu.

¹⁴Henyihaha kahindji n’āka, bakwabo ba mu Kidisitu, abatumine Paulu kwenda ku luhese lwa mema a kalunga; anka Shilasa na Temote abashele kwanka.

¹⁵Abo, abashindjikile Paulu abamufishishe ku Atena, e bebalayidileshi: Shilasa na Temote bafikye kuno kwandji bukidi, n’abo abālukile.

¹⁶Anka habadi Paulu ebaindjila ku Atena, eshimba die dibenyengyele habamwene kibalo kiule ndaa na mankishi.

¹⁷Binyibiabia bebahakenye Bena Yuda na bantu balumbulukye b’Efile mu kitumbwilo; n’aba babasañananga mu kisalwe kwifuku n’efuku.

¹⁸Henyihaha bangi basha-binangu ba ku ba Ehikulea, na ba ku ba Stoika, ababwele n’e, bamo’shi: A uno mbalakanyi akyebe kwakula kinyi? Bangi’ shi, e hamune bu mulungudi a b’efile benyi, mwanda bebalungwile mwanda wa Yesu, na lusangukilo lwa ku lufu.

¹⁹Abamwatshile, bamufisha ku Aleohakusa’shi: Atukyebe kwiuka luno lulambukisho luhya lōkwele kwakula a lwi naminyi?

²⁰Mwanda obe kwete kwitufishisha ku matwi myanda yi bingi: Biabia atukyebe twiukye mwiyile yino myanda.

²¹Mwanda Bena Atena boso, na benyi abadi bekale mwanka, tababadi abakitshi kingi kintu, anka kulungula, su nkuhusha umo mwanda uhya.

²²Henyihaha Paulu bemene hankatshi ha Aleohakusa, tākula’shi: Anwe bena Atena, nashingula’shi: mu bintu bioso anuka, mba kunemena kulangwila kwa mikishi.

²³Mwanda hanadi akidi, na hakutala kulangwila kwenu, nasañene kitalakia-milambu kibadi kifundwe hanka’shi: KW’EFILE SHIEUKIBWA. Nyi anulangwila na kuhatamina; awa a nyi nulungula.

²⁴Efile Mukulu bahangile hanohansenga na bioso bi hanka, mwanda e Nfumu a mwiilu na ha nsenga, tabombelā mu mashibo akulangwila ashidikwe bishila akitshibwe na maasa a bantu, ooo.

²⁵Tafubilwā na maasa a bantu’shi, e na lukalo, mwanda e na mwinyi nyi aheya bantu boso kwikala abatala, na muwa, na bintu bioso.

²⁶E nyi’ bahangile mīlo yoso, na mase amune, mwakubombelela hoso hanundu ha hanohansenga, bafunyine mwa kwikela bihindji biabo bibasangwilwe kwibedi, na midianyino ya kubombela, kwabo;

²⁷biabadia kukimba Efile Mukulu, kunsongo hangi’ abakamumono mu kukukuta, sunga te kula kwi muntu ese, muntu ese.

²⁸Mwanda mwadi e nyi mwatudi abatala, na kusana, na kwikala; mubesambīle namu bangi ba baludiki benu ba misāmbo, mwanda’twe namu twi bekulu be.

²⁹Binyibiabia mbiatudi bekale bekulu b’Efile Mukulu, tankihwandjikile’twe kutentekyesha’shi, Bwifile Mukulu mbwifwane kilonda kia nsahabu, sunga kilonda kia nfeda, su mbwibwe diseībwe na bukalabwino bwa busendwe bwa, bantu, ooo.

³⁰Biabia bihindji bia kuhatamina Efile Mukulu ebilekyela; anka binobino akamikā bantu boso kosokoso’shi, belangye ’mashimba;

³¹mwanda e tabasangwile efuku, ha dinyī’ dio, akatshibi myanda ya bahanohansenga na kululama, kwi (winyi) Muntu abasangwile; behele bantu boso kishisho bu biabamubushishe ku lufu.

³²Biabia, habahushishe wa lusangukilo lwa ku lufu, bangi abasehele tuseho twesēngo, bangi namu abakwile’shi: Atukakuhusha dimonyi ha uno mwanda.

³³Biabia Paulu bakatukile munkatshi mwabo.

³⁴Anka bangi balume abamulamete, abakuminyine; umune ābo badi Deoneseuse mwina Aleohaguse, na mwana mukashi batemwinwe bu Damadise, na bangi abadi n’abo.