Read songe Bikitshino 18 Bible Online

Bikitshino 18 - songe bible

Bikitshino 18

¹Habahwile myanda yino, Paulu bakatukile ku Atene, bafikile ku Kodinda.

²Basañene mwanka mwina Yuda batemwinwe bu Akwila, a ku kisaka kia Pontuse, mufikile kihindji kihela ku Italea, na mpian’e Pishila: (mwanda Kolo diasa badi mukamikye’shi: Bena Yuda boso bakatukye ku Loma:) e bayile kwabadi.

³Mwanda e badi n’abo ’mufubo umune bashalele, tafubu n’abo; mwanda mu mufubo wabo babadi batedi ba mahema,.

⁴Biabia bahakenye n’abo mu kitumbwilo ku Sabado ku Sabado, bakonkwelele bena Yuda na Bangidiki bakumine.

⁵Habahwile Shilusa na Temote kufika ku Masedonya Paulu banemenenwe mwishimba, talungula Bena Yuda’shi: Yesu nyi Kidisitu.

⁶Habekingidile na kukā na mulomo, e bekukwile bilamba bie, bebalungwile’shi: Mase enu ekale ha mitwe henu, Ami nahu kubinga: Kubanga lelo uno nankēnde kwi Badjentaila.

⁷Bakatukile kwanka, bakatwelele mu nshibo ya umune, eshina die mbu Yusetuse, badialangwilā Efile Mukulu, nshibo ye yibadi yikungile hehi ku kitumbwilo.

⁸Kidisehuse mulami e hanundu ha bakwabo a mu kitumbwilo, bakuminyine Nfumwetu, na ba mu nshibo ye boso hamune: na Bena Kodinda bebungi namu, hakuhusha abakuminyine, babatshishibwa.

⁹Henyihaha Nfumwetu bakwile kwi Paulu bufuku mu kimonwa’shi: Totshinanga, anka okule, touminanga, nyaa, ooo.

¹⁰Mwandā’mi nyi n’obe, takwi sunga ngumune akakutombokyela kukukumbisha; mwanda nyi na bantu bebungi mu kino kibalo.

¹¹Biabia bashalele mwanka kihwa na mieshi yisamombo, badi alambukisha mwanda w’Efile Mukulu munkatshi mwabo.

¹²Binyibiabia habadi Ngaleo mpianyi a mulamwinyi a nsenga ya Akaia, Bena Yuda abatontokyele Paulu n’eshimba dimune, abamufishishe ku kimu’shi:

¹³Uno muntu akonkwela bantu kulangwila Efile Mukulu mushi muyīle mukanda-wa-bishila.

¹⁴Biabia habakyebele Paulu kwasama mukanwa, Ngaleo balungwile Bena Yuda’shi: Anwe Bena Yuda, su ubadi mwanda wa ushīululame mwa kutshibila sunga ngwa kifita, nadia kwikala n’eshimba dītukye kwanudi, mulombene mwampwandjikisha;

¹⁵anka su nyi lwihusho lwa bishima, na lwa mashina, sunga lwa mukanda-wabishila wenu, kataleī’yo anwe bana bene; mwanda bu nsushi ya yino myanda tankyebe kwikala.

¹⁶Biabia bebabingile ku kimu.

¹⁷Henyihaha bena Ngidiki boso abakwete Sosetenese, mulami e hanundu ha bakwabo ba mu kitumbwilo, abamukuhile ku mpala kwa kimu. Anka Ngaleo tamutule eshimba die ku yaya myanda.

¹⁸Biabia Paulu bashalele kwanka mafuku e bungi, kumongo baladikile bakwabo ba mu Kidisitu, bayile ’mbwato ēnda ku Shidiya na Pishila na Akwila. Bakulwile kahweto mu Kenkelea, mwanda badi na mutshiho.

¹⁹Biabia bakafikile ku Efesesa, bebaleka, anka e na mwinyi bakatwele mu kitumbwilo, bahatulwidile Bena Yuda.

²⁰Ank’abo, habamukyebele’Shi: Ekala n’etu kingi kihindji, e tamukumine.

²¹Bebalayile’shi: Nyi na mwanda umune, anka kufika ku Kialukilo kifikye mu Yelusalema, anka, nankāluka kwanudi dimonyi, su Efile Mukulu akumina. Biabia bayile ’mbwato hakukatuka ku Efesesa.

²²Hābabukile ku Kesalea, na kukamina, n’ēmuna kikoñeno ki’Efile, bālalele ku Anteoka.

²³Binyibiabia habahwile kushala kihindji mwanka bakatukile, bakindakene mpese yoso ya Ngalatea na Fidjia mu mulongo w’abio, badi akankamika balondji b’Efile boso.

²⁴Biabia Mwina Yuda umune, batemwinwe bu Apolose, batandjilwe mu Alekesanda, Muludiki a bishima ebuwa, muntu mukata mu Bifundwe bi’Efile, bafikile ku Efesesa.

²⁵Uno muntu badi mulambukishwe mwishinda dia Nfumwetu; na baikele n’eshimba aditembe na kibobo, bākulanga na kulambukisha’nka swee kushī kuluba yinyi myanda ya Nfumwetu; badi mwiukye anka lubatshisho lwa Yoano.

²⁶E babangile kwakula mu kitumbwilo n’eshimba dishī na katshima munda; winyi e habamuhushishe Akwila na Pishila, abamwatshile, tabamuhatulwila bibuwa bukilekile niwiyil’eshinda di’Efile Mukulu.

²⁷Binyibiabia habadi n’eshimba’shi, nkabukile ku Akaia, bakwabo ba mu Kidisitu, abatundjile mukanda kwi balondji wa kwibanyisha’shi: Numutambule, biabia e, habafikile kwanka, bakwashishe bikata aba abadi bakumine mu bumuntu bw’Efile.

²⁸Mwanda e babofwishe Bena Yuda bikata bi moo ku mpala kw’a bantu boso, badi ebashisha mu Bifundwe bi’Efile’shi, Yesu nyi Kidisitu.