Read songe Bikitshino 19 Bible Online

Bikitshino 19 - songe bible

Bikitshino 19

¹Bitabibakitshine, habadi Apolose ku Kodinda, Paulu namu, habadi muhwe kukila mpese ya ku miēngye, bafikile ku Efesesa; basañene bangi balondji b’Efile,

²bebehwishe’shi: Kasha nubakuminyine tanubatambwile Kikudi-E-Selelee su? Biabia, abamwālulwile’shi: Tatw’i bahushe su ngu mwanda winyi’shi, kwi Kikudi-E-Selelee.

³Binyibiabia bebālulwile’shi: A biabia nku kinyikwa nwibabatshishibwe? Abo namu’shi: Nyi ku lubatshisho lwa Yoano.

⁴Lienyihaha Paulu bambile’shi: Yoano binyibinyi babatshishanga lubatshisho lwa kwilanga mwishimba, na kulungula bantu’shi: Nukuminei mwi yawa afiki kumongo kwande, ewinyi nyi Kidisitu Yesu.

⁵Habahushishe biabia, ababatshishibwe mw’ishina dia Nfumwetu Yesu.

⁶Biabia Paulu habahwile kutenteka maasa e habadi, Kikudi-E-Selelee bebayikile; biabia abakwile na yingi ndjimi, na kutemuka, abatemukile myanda.

⁷Boso balume abadi bu ekumi na babidi.

⁸E batwelele mu kitumbwilo, bākwile n’abo shī na katshima munda ha kihindji kia mieshi yisatu, badi ahatulushena n’abo na kwibakonkwela yaya myanda yinemene ku bufumu bw’Efile Mukulu.

⁹Anka bangi hakunyisha mashimb’abo hoo, tambakumine, anka abakwile bibubi ha mwanda wa dinyi eshinda ku mpala kwa kibumbu, e bakatukile kwabadi, balamunwine balondji b’Efile, badi ahatulushena n’abo kwifuku n’efuku mw’ekola dia Tailanuse.

¹⁰Bino bioso bibayididile mpaa na ku kihindjikia bihwa bibidi: binyibiabia boso abadi babombele mu l’Asie abahushishe Mwanda wa Nfumwetu Yesu, bena Yuda na bena Ngidiki hamune.

¹¹Efile Mukulu namu bakitshine bilengeleshe bia bingi bihaso ku maasa a Paulu.

¹²Binyibiabia abafishishe bitambala, na tulamba bia ku mbidi ye kukatula kwi ’ba abakumbu, biabia masungu abakatukile kwabadi, na bikudi bibi bibebatukile.

¹³Henyihaha bangi ba ku bena Yuda bankindakanyi, babuki ba mbuko, ababangile abo bana bene, kutemuna eshina dia Nfumwetu kwi’ba babadi na bikudi bibi’shi: Atwinutshiha’shi na bi Yesu, balungwilwe kwi Paulu.

¹⁴Kubadi bana balume musambobidi ba muntu, eshina die Sekefa, mwina Yuda, tshiite-mwakwidi mukata, abakitshine anka biabia.

¹⁵Biabia kikudi kibi kibālulwile’shi: Yesu namuuku, na Paulu namu namuuku; ank’anwe nwi banyi?

¹⁶Henyihaha muntu badi na kikudi kibi munda mwe, bebatumbukile, ebashinda na kwibōbesha, biabia abasukile mu yaya nshibo muswa na bitahwanga.

¹⁷Uno ubeukilwe kwi boso bena Yuda na bena Ngidiki abadi babombele namu mu Efesesa; na moo ubebakwete boso, n’eshina dia Nfumwetu Yesu dibatumbishibwe ntumbo.

¹⁸Bebungi namu ba mu baba abakuminyine, abafikile kwifukula myanda, na kulesha bikitshino biabo.

¹⁹Bebungi namu ba mu baba abakitanga bia masende, abafwishishe mikanda yabo kwiyifinga hamune, abeyishikile kālo ku mpala kwa bantu boso; ababadikile mūlo w’ayo, abayikumbeshe bu nfalanga ya nfedha binunu makumi atano.

²⁰Biabia nyi mubakudile bikata mwanda w’Efile Mukulu na kōbesha waobesha.

²¹Habahwile yinomyanda, Paulu bafūne munda mwe’shi: Nyende mu Masedonya na Akala mpaa na ku Yelusalema, eshi. Hampu kwikala mwanka, nkimpwandjikile’mi namu anka ku mona Loma.

²²Binyibiabia batumine mu Masedonya babidi b’aba abamufubila, Temote na Elastuse, anka e namwinyi bashelele kihindji mu l’Asie.

²³Ku kiakia kihindji kubabukile eunga dikata ha mwanda wa diadia eshinda.

²⁴Mwanda wa muntu, batemwinwe bu Demeteleuse, nsendwe a bilonda bia nfedha, bafushishe tushibo twa nkishi twa bilonda bia nfedha, kwi Daiana, e basungulanga mono yibungi kwi benyi basendwe.

²⁵E bakongwele hamune, na bangi babadi na mufubo hamune, bambile’shi: A Bamwanana, anwiuku’shi, ku uno mulubo nyi buheta bwetu.

²⁶Dimonyi, nubaliu kumona na kuhusha’shi, ta nku Efisesa ank’ako, ooo, anka hehi mosomoso mu l’Asie uno Paulu bebakonkwelanga, bālulusha bantu be bungi’shi: abio mbikitshibwe na masaa, tamb’Efile’abo, ooo.

²⁷Ha uno mwanda busendwe bwetu tabudi hēhi kufukulwa; na ntempelo namuya Daiana, efilemukashi mukata, taikyebe kwikala bu bisumanga, na ntumbo ye yishindwe, e winyi, alangwilwanga na boso ba mu l’Asie, na bahanohansenga.

²⁸Habahushishe yino myanda, abaule ndaa na bukyelo, tabēle musase’shi: Mukata winyi Daiana a Bena Efisesa.

²⁹Na kibalo kioso kibokakēne n’eunga: biabia habahwile kukwata Ngaiuse na Alestakuse, bena Masedonya, babadi bena luendo na Paulu, abafutumukile lubilo n’eshimba dimune, bakatwela mu nshibo yikata ya kiashisho.

³⁰Biabia Paulu badi n’eshimba dia kukyeba kutwela mu kibumbu kia bantu, anka balondji b’Efile abamutosheshe.

³¹Na bamo ba ku bakata ba ku l’Asie abadi bakūku be, abatumine bakumwiyayila’shi: Tokumanga kutwela mu nshibo yikata ya kiashisho.

³²Biabia abākwile mintumpidi, bangi mwanda umune, na bangi wabo mwanda; mwanda kibumbu kibadi akibokakana n’eunga, n’akia kibumbu kibadi kikile bakwabo bungi, takibadi kiukye kiabebungile.

³³Abatakudile Alekesanda mu kibumbu, Bena Yuda abamutudile ku mpala. Biabia Alekesanda bahukile n’eyasa die, badi akyebe kwakula kwībingisha kwi bantu.

³⁴Anka habeukile’shi, nyi mwina Yuda, boso abēle eyi dimune ku kihindji bu nsa yibidi’shi: Mukata anka Daiana a Bena Efisesa.

³⁵Henyihaha Mufundji-a-bimu bia kibalo, habauminyishe kibumbu, bambile’shi: Anwe bena Efesesa, a muntu kinyi shī euku’shi, kibalo kia Bena Efesesa ki mulami a ntempelo ya Daiana efilemukashi mukata, na a akia kibahone ku Yupita?

³⁶Binyibiabia ha kumono yino myanda tayihakanwa, wa nudi n’au ngwa kwikala’nka nyaa, tanukitanga namu mwanda lubilo.

³⁷Mwanda nubafwisha bano bantu kuno bashī bangifi ba ku mantempelo, sunga mba kukaa efile enu mukashi,

³⁸Binyibiabia su Demeteleuse na basendwe be n’e, be na mwanda na muntu, kimu ki kwanka, na bampianyi balamwinyi ba l’Etat be kwanka namu, bibuwa beteushene.

³⁹Anka su anwihusha ha yingi myanda, ayikalumbulwa mu kimu mulombene kishila kiakio.

⁴⁰Mwanda’twe tatudi hehi na kuhotekwa h’eūnga dia lelo uno, mwanda tatwi na kia kuhatula kia tubekonenena kuno.

⁴¹Habahwile kwakula biabia, bahalakeshe kikongeeno.