Read songe Bikitshino 2 Bible Online

Bikitshino 2 - songe bible

Bikitshino 2

¹Biabia habafikile efuku dia Mpentekoshita hanka, boso bwabo abadi n’eshimba dimune mu kihindji kimune.

²Kahindji n’aka kitumo kibafikile mwiilu, bu kihahi ki moo akikidi, kibaushishe nshibo yoso ndaa yiabadi bashāle.

³Biabia kubebamwekyele ndjimi yibalukye hankatshi bu kālo, yibebatentamine ku muntu ku muntu.

⁴N’abo boso abadi baūlwe na Kikudi-E-Selelee, ababangile kwakula na ndjimi yingi mu bebahelele Kikudi-E-Selelee kwakula’yo.

⁵Kubadi kubombele Bena Yuda mu Yelusalema, bantu bantulamishi ya mashimba, ba ku mīlo yoso ya muno mūshi mweīlu.

⁶Biabia ntumbo ya bino ha kuhalakana mōso, kibumbu kibekongyele hanka, abatuntamene, mwanda muntu ese bebahushishe bakwete kwakula muntu n’adi’edimi, muntu n’adi’edimi.

⁷Abo boso abakanyine na kuhulakīla’shi: Talangai, bano bantu abākula boso ta m’Bena Ngadilea su?

⁸Mwanda kinyi watwibahusha muntu n’edimi die, muntu n’edimi die, anka mwatubatandjilwe hanohansenga?

⁹Bena Pafia hanka, na Bena Mede, na Bena Elama, na babombele mu Mesopotemia, na be mu Yudea, na be mu Kahadosea na be mu Pontuse, na be mu l’Asie,

¹⁰na be mu Fidjia, na be mu Hamfidia, na be mu Ndjihitu, na be mu mpese ya ku Lebia hehi na Saidine, na Bena Loma benyi, ta mba Yudea namu, na bakuminyi ba myanda ya Bena Yuda,

¹¹na Bena Kelete, na Balabwe namu, tātwibahusha abesamba yino myanda ya bintu bikata bi’Efile Mukulu.

¹²Binyibiabia bosoboso abakanyine, tabealashena, bakwete kwīhushena’shi: A uno mwanda wi na minyi?

¹³Bangi bakwete kusenga’shi: Bano bantu abakolwa finyo yihya.

¹⁴Anka Petelo baimene na bēnyi b’ekumi na umune, banyishish’eyi die, bebalungwile’shi: Anwe Bena Yuda na boso babombele mu Yelusalema, nwiūkye uno mwanda nubushe bishima biande.

¹⁵Mwanda bano tambakolwe mwanutentekyesha, ooo; mwanda nsa yi anka ha kitema.

¹⁶Anka uno nyi mwanda ubākwilwe kwi mutemuki Yoele’shi:

¹⁷Efile Mukulu bakwile’shi: Akikekala mu mafuku a kunfudilo, Nankahongolwela Kikudi-E-Selelee ande, Na bana benu balume na bakashi abakatemuka myanda, Na basongwalume benu abakamono bimonwa bia bilengileshi, Na balume benu banunu abakaloto bilotwa;

¹⁸Mu aa mafuku nankahongolwela Kikudi-E-Selelee Ande ha bahika bande balume na bakashi, N’abo abakatemuka myanda.

¹⁹Nankalesha bia makita mwiilu, Na bitundwilo hano hashi ha nsenga; Mase, na kālo, n’ebungibungi dia mwishi.

²⁰Nguba akālulwa ta mufito, Na mweshi aukālulwa bu mase, Kwibedi diadia efuku dikata dineme dia Yeowa tadiabandjile kufika.

²¹Hakukekala biabia, boso abaketanyina h’eshina dia Yeowa abakahashibwa.

²²Anwe Bena Isalele, hushai bino bishima: Yesu a ku Nasaleta, muntu mukuminyibwe n’Efile Mukulu munkatshi mwenu ku bilengyeleshi na bia makita na bitundwilo, bibakitshine Efile Mukulu n’e munkatshi mwenu, anka mwanwiuku’nwe ba na bene;

²³Anka Yawa, hakufwishwa ku binangu bibasangwile Efile Mukulu na kwiuka kala kwe, anwe nubamukwete, nubamubambile ku mutshi uhingishene, nubamwihayile ku maasa a bantu be bubi.

²⁴Winyi a hasangwile kwi Efile Mukulu, bamuhoswele ku mitanyo ya lufu; mwanda kibakutshilwe e kubambilwa n’alo.

²⁵Mwanda Dafidi bamwakwidile’shi: Namwene Yeowa ku mpala kwande mafuku oso, Mwanda nyi e ku mboko yande yibalume bianshī akususakana,

²⁶Ha uno mwanda eshimba diande dibasehela n’edimi diande dibasangashena; Nyi ha mwanda aukekela mbidi yande na kutengyela.

²⁷Mwanda obe tokalekye eshimba diande mu kalunganyembo. Sunga kukumine Muhatulwe obe e kishila kunyanga.

²⁸Bohu kunukisha mashinda a muwa; Okanusha na kusehela ha mwanda wa mpala yobe,

²⁹Anwe bakwetu, nundekye, nakule kwanudi ha mwanda wa shyetu-kulu Dafidi eshi, bafwile, ashīkwa na kilele kie, ki n’etu mpaa na lelo uno.

³⁰Binyibiabia hakwikala bu mutemuki, na ha kwiuka’shi, Efile Mukulu bamutshihile mutshiho’shi: Ku bikuba bia munda m’ōbe, mulombene mbidi, nankabusha Kidisitu kushala ha luhunā nsulu lwe.

³¹E, ha kushingula uno mwanda ku mpala, bākwile ha mwanda wa lusangukilo lwa Kidisitu, ’shi; eshimba die tadikalekībwa mu Kalunganyembo, sunga mbidi ye tanginyangye.

³²W’inyi Yesu Efile Mukulu bamubushishe, ha uno mwanda nwihatudi bu tumonyi.

³³Binyibiabia tadi mukamishibwe ku mboko yibalume y’Efile Mukulu, na habatambwile kwi Shye mulayilo wa Kikudi-E-Selelee, e bahongwele kino kianumono na kianuhusha binobino.

³⁴Mwanda Dafidi tamukamine mwiilu, ooo, anka e na mwinyi bakwile’shi: Yehowa balungwile kwi Nfumwami’shi: Shāla ku mboko yande yi balume,

³⁵Mpaa na hankālula bakushikwe bu kitulo kia ngwa yobe.

³⁶Henyihaha boso ba ku nshibo ya Isalele beukye biya’shi, Efile Mukulu batule uno Yesu anubabambile ku mutshi uhingishene, bu Nfumu na bu Kidisitu.

³⁷Abo habahushishe biabia, mashimba’bo abatahikile, abehwishe Petelo, na bangi batumibwa’shi: Anwe bakwetu, atukitshi na minyi?

³⁸Binyibiabia Petelo bebālulwile’shi: Elangei ’māshimba, nubatshishibwe boso bwenu mwishina dia Yesu Kidisitu, mwanda wa kulekyelwa kwa milwisho, biabia anukatambula buntu bwa Kikudi-E-Selelee.

³⁹Mwanda winyi mulayilo ngwenu, na kwi bana benu, na kwi boso be kula, mpaa na kwi boso abaketaminyibwa kwi Nfumwetu Efile Mukulu.

⁴⁰Biabia bebalungwile na yingi myanda yibungi, na kwi balanga’shi: Ehashei ku kino kihungilo kia bantu bashībalulame.

⁴¹Binyibiabia abo abakuminyine eyi die na musanko, ababatshihibwe: na kudiadi ’efuku bantu bu binunu bisatu bibebatentekyelwe kwabadi.

⁴²Abo abalamete biya mu lulambukisho lwa batumibwa, na mu kihwano, na mu kutshimuna kwa mampa, na mu nteko y’Efile Mukulu.

⁴³Biabia moo ubakwete bantu boso; na biamakita bi bungi, na bitundwilo bibakitshinwe kwi batumibwa,

⁴⁴Bakumine boso abadi belamitshishene hamune, na bintu biabo bioso bibadi anka bu kiabo’bo boso.

⁴⁵Biabia abahena biabuheta bwabo na bingi bintu, tabābila’bio kwi boso bashī n’abio.

⁴⁶Abo abadi bekale n’eshimba dimune mu ntempelo kwifuku n’efuku, na kutshimuna dimpa ku mashibo ku mashibo, abādi bidibwa biabo na kusehela n’eshimba dimune.

⁴⁷Abadi abatumbisha Efile Mukulu, abadi bakuminwe na bantu boso. Yehowa batentekyele abo ku Kikoñeno kikūlwe n’Efile, efuku n’efuku mwabadi akuhashībwa.