Read songe Bikitshino 20 Bible Online

Bikitshino 20 - songe bible

Bikitshino 20

¹Habauminyine eunga, Paulu baitamine balondji bi’Efile kwadi, bebebambele bīha kwibalaa, akatuka kwenda mu Masedonya.

²Habahwile kukila yaya mpese, na hakwibalanga malango ebungi, bafikile mu nsenga ya Bena Ngidiki.

³Babombelele mwanka mieshi yisatu. Habamubembelele Bena Yuda, na habadi akyebe kwenda ’mbwato ku Sidia, bafūne’shi, nankāluka, nkile mu Masedonya.

⁴Biabia Sopate a ku Belea, na ba ku Bena Tesalonika, na Alestakusa na Sekunduse; na Ngaiuse a ku Debe, na Temote; na ba ku l’Asie, na Tekikuse, na Tofimuse, abamushindjikīle.

⁵Bano’ba nyi bababadidile kwibedi, abetwindjila ku Toasa.

⁶Biabia tubakatukile ku Fidihai, tubayile mbwato, ku mongo kwa mafuku a mampa ashī na kitatusho; tubafikile kwi’ba be ku Toasa mu mafuku atano: nyi mwatubashalele mafuku ’musambobidi.

⁷H’efuku dia kwibedi dia lubingo, habebungile balondji b’Efile hamune mu kubasula mampa, na Paulu habadi mwimene luendo habubatokyele, bebalungwile w’Efile, bayididile na mwanda mpaa na ku kilonkatshi kia bufuku.

⁸Mubadi bimunyi bibungi mu nshibo ya kwiilu mwabadi bekongyele.

⁹Na nsongwalume umune, atemunwa bu Eutekuse, badi mushale mwididishi, bakambilwe na tulo tukata; biabia habadi Paulu kwete kwakula mwanda wibula, na tulo tubamunemene bimoo, ahona ku kisasa kia kasatu hashi, bamubusha mufwe.

¹⁰Henyihaha Paulu bayikile amuhona, amulela mu kiadi, bambile’shi: Tanukalakashanga mashimb’enu, mwanda muwa we e n’au.

¹¹Binyibiabia habakumine dimonyi, na habahwile kubasula mampa, na kudia, na kwisamba n’abo kihindji kila, mpā na habatshibile mwiyanda, biabia bakatukile.

¹²Abafishishe nsongwalume tātala, abo namu abasambibwe bikata.

¹³Ank’atwe tubabadīdile ku bwato, tubayile ku Asoso, nyi kwatubafune kwikisha Paulu dimonyi, mwanda e balayile’shi, tandji hehi kwenda ha ngwa.

¹⁴Habetusañene ku Asoso, tubamwikishe ’mbwato, tubafikile ku Mitelene.

¹⁵Biabia tubakatukile kwanka, na habubatokyele tubadi hehi ku Kiose; ha dingi dia maloba tubafikile ku Samose, tubemēne namu ku Tulongileume, na ha dingi nyi diā maloba tubafikile ku Miletuse.

¹⁶Mwanda Paulu bahwile kufuna shi; Nankakilakila ku Efisesa ’mbwato, mwanda tamukyebe’shi: Nkashale kihindji mu l’Asie, ooo, mwanda badi anyisha lubilo’shi: Hangi su nankamono bia kwikala ku Yelusalema, h’efuku dia Mpentekoshita.

¹⁷Biabia ku Miletuse batumine ku Efisesa kwitamisha bakulu ba kikoñeno ki’Efile.

¹⁸Habafikile kwadi, bebalungwile’shi: Anwe bana bene anwiuku mpā na kwifuku dia kwibedi dinafikile mu I’Asie, mwiyile kihikwa kinadi n’enu bihindji bioso.

¹⁹Munafubilanga Nl’umwetu na kwihelesha koso kwishimba, na mpolo yibungi, na bitompelo bibamponene ku kubembelwa kwa Bena Yuda,

²⁰na mwa shī mufwamishe yinyi yibadi mwa kwinusungisha busunga, sunga ngihelahela, sunga nkuhisha kwinuhatulwila, na kwinulambukisha ku mpala kwa bantu na ku nshibo ku nshibo.

²¹Nadi akula bu kamonyi kwi Bena Yuda na kwi Bena Ngidiki namu, kwilanga kw’eshimba kw’Efile Mukulu, na lukuluhilo kwi Nfumwetu Yesu Kidisitu.

²²Talangai binobino, nēnde mwanyibwe mwishimba ku Yelusalema, kushī kwiuka kinyi ayikanemena kwanka.

²³Anka Kikudi-E-Selelee mu bioso bibalo andungula’shi: Nkano na bia malwa abikutengyela.

²⁴Anka takwi kintu kimune kia bino bintu akinsanyisha’mi munda, sunga namu nkuhwandjikisha muwa wande bu kintu kineme kwimi, mwandjia kuhudisha luendo lwande lwa muwa, na kusehela na mufubo wanatambwile kwi Nfumwetu Yesu, nyi nkulungula mukāndu-wibuwa wa bumuntu bw’Efile Mukulu.

²⁵Talangai binobino, neuku’shi, anwe boso banatwelanga munkatshi mwenu kwinulungula wa bufumu bw’Efile Mukulu, tanukamono mpala yande dimonyi, ooo.

²⁶Binyibiabia netemuna bu kamonyi kwanudi lelo uno’shi: Nabingishwa ku mase a bantu boso.

²⁷Mwand’ami nkīmwishikile kwinulungula binangu bioso bi’Efile Mukulu.

²⁸Biabia dimukai anwe bana bene, na lombe losonamu, hanundu halo Kikudi-E-Selelee benutudile bu balami’shi: Nudishe kikoñeno ki’Efile kibaūle na mase e.

²⁹Mwanda neuku uno’shi, kunyima kwa kukatuka kwande, tūmishi twi bukyelo atukatwele munkatshi mwenu, tushyatulekye lombe.

³⁰Kwanudi’nwe bana bene namu, bantu abakabuku na kwakula myanda yishī bu ya binyibinyi, mwa kwibabembela kwabadi, bekale bu balondji.

³¹Binyibiabia, dimukai, nangushenai’shi: Ku kihindji kia bihwa bisatu, ntshimulekye kudimuna ese muntu na mpolo bufuku na kanya.

³²Binobino anwe bakwetu ba mu Kidisitu, nenulubula kw’Efile Mukulu, na ku mwanda wa bu-muntu bwe, awiuku kwinukunkusha, na kwinuha buhyanyi munkatshi mw’abo boso balamunwe-be-selelee.

³³Nkimulakile nfala nga ya nfēdha ya muntu, sunga ya nsahabu, sunga mbifwalwa.

³⁴Ee, anwe bana bene anwiuku’shi, ano maasa abanfubila ku nkalo yande, na kwi’bo abadi n’ami.

³⁵Mu bintu bioso nenulesheshe’shi, hakutuhwita mufubo wanudi n’au mbihwandjikile’nwe kukankamishā’bo batūba, na kunangushena bishima bia Nfumwetu Yesu, bibākwile’shi: Mwabi wa kuhana, ngukile wa kuhebwa.

³⁶Habahwile kwakula biabia, bakunamine hashi, batekyele n’abo boso.

³⁷Biabia abo boso abadile bikata, abebambele biha ku nshingo ya Paulu, abamufifile ku kanwa,

³⁸Mashimb’abo abakambile kufita ha mwanda ubambile’shi: tanunkamono’nyi dimo meso, ooo. Biabia abamushindjikile ku masua.