Read songe Bikitshino 21 Bible Online

Bikitshino 21 - songe bible

Bikitshino 21

¹Bitabibakitshine, hakwibaleka, na kulundula bwato, tubayile anka balulame swee na ku Kōse, na habubatokyele tubafikile ku Lodese; twakatuka kwanka kwenda mpaa na ku Patala;

²na kahusañana masua aende ku Fenesia, tubayikile mwanka twenda adi’eshia.

³Hakufika na kufumbwila Saipuluse, tubekikile ku mboko yi bakashi, twenda ku Sidia, twakabukila ku Tyila, mwanda’ko nyi kubadi akukyebe nkābwilwa bintu bibadi ’masua.

⁴Hatubafumbwile balondji b’Efile, tubalele mwanka mafuku musambobidi, abo, abākwile kwi Paulu mu Kikudi-E-Selelee’shi: Tokaminanga ku Yelusalema.

⁵Hatubahwile aa mafuku tubakatukile twenda lwendo lwetu; n’abo boso abetushindjikile na bampiana babo, na bana babo, mpaa n’ahatubakatukile ku kibalo; biabia hatubakunamine hashi ku bukunkula kwa mema, tubatekyele Efile Mukulu.

⁶Hakwibambena biha, tubayile ’mbwato, n’abo abālukile kwabo.

⁷Hatubahudishe luendo lwa ku Tyile, tubafikile ku Tolemaise, twaimuna bakwetu ba mu Kidisitu, tubashelele n’abo efuku dimune.

⁸Habubatokyele, atwe ba ku kibumbu kia Paulu, tubakatukile, twafika ku Kesalea; biabia tubatwele mu nshibo ya mulungudi a mwanda wibuwa w’Efile Mukulu, Fidiha, e badi umun’abo a kuba musambobidi, tubashalele n’e.

⁹E winyi badinabanabe bakashi bananka, bakitumame, abo abatemukanga myanda.

¹⁰Hatubayishishe mafuku e bungi, mutemuki umune, batemwinwe bu Akabusa, mubafikile ku Yudea.

¹¹Habafikile kwatudi, bātshile kikoba kia Paulu, beanyine e na mwinyi ku mikolo na ku maasa e, bākwile’shi: Nyi mubesambila Kikudi-E-Selelee’shi: Anka biabia Bena Yuda be ku Yelusalema, abakānya muntu sha kino kikoba bu bino, bakamufishe mu maasa a Badjentaila.

¹²Hatubahushishe yino myanda, atwe, na ba ku kiakia kihindji, tubamusendelele’shi: Tokaminanga ku Yelusalema.

¹³Henyihaha Paulu bālulwile’shi: A nkinyi kianudidi na kunsasush’eshimba diande? Mwanda nki mwimēne kwanyibwa ank’ako, anka namu kumona’nyi lufu ku Yelusalema ha mwanda w’eshina dia Nfumwetu Yesu.

¹⁴Biabia e habatune kwalushwa, tubamulekyele’shi: Abikyeb’eshimba dia Nfumwetu bikitwe.

¹⁵Habakile aa mafuku tubalongyele bi na luendo, tatukamina ku Yelusalema.

¹⁶Kubakamine n’etu namu bangi balondji b’Efile ba ku Kesalea, betushindjikila, nakwitutula kwi mungi, Nasone, mwina Saipuluse, mulondji e Efile a kala, nyi a tukashala n’e mwe.

¹⁷Hatubafikile ku Yelusalema, bakwetu ba mu Kidisitu abetukukile na muloo.

¹⁸Habubatokyele Paulu bakatwelele n’etu kwa Yakoba; bakulu boso namu abadi kwanka.

¹⁹Habahwile kwibemuna, bebahatulwidile myanda yibakitshine Efile Mukulu munkatshi mwa Badjentaila ku mufubo we ku umo umo.

²⁰N’abo, habahushishe biabia tabatumbisha Nfumwetu, abamulungwile’shi: Obe, mukwetu, bomono’shi: Kwi binunu na binunu bia Bena Yuda abakuminyine, na boso bwabo be na kinsukunsuku kia mukandawa-bishila;

²¹N’abo abalungudibwa ha mwanda w’obe’shi: alambukishā Bena Yuda boso be munkatshi mwa Badjentaila’shi: Nufutale Mosesa, tambihwandjikile’nwe kusala bana (babo,) sunga nkulonda bihikwa, ooo.

²²A henyihaha bino’bi bi na minyi Pkibumbu takikakutwa kwikongola; mwanda abakahusha’shi: E tafikile.

²³Biabia okite biatwakula kodibe! Twi na bana balume bananka babatshihile mutshiho.

²⁴Wende n’abo, okelumbule n’abo, we bafutshile, bebakūle tuhweto; biabia boso bashingule’shi, aya myanda yatulungulwanga ha mwanda wobe ngia bisumanga; biosobi obe wendā’nka kalolo, mpaa na kulama mukandawa-bishila.

²⁵Ha mwanda wa Badjentaila abakuminyine, tubahwile kwibafundjila mukanda kwibatshibila’shi: Tanulama’kio, anka nwihengyei kwi’bio abihebwa kwi mankishi, na mase, na ku’bia bifinyibwe nkono, na ku bukyebekyebe.

²⁶Henyihaha Paulu bātshile benyi bana balume, habubatokyele belumbulwile n’abo, batwela mu ntempelo mu kulesha kukumbasha kwa mafuku a kwīlumbula, mpaa nāhabalambwilwe bia mulambu kwi ese muntu.

²⁷Habadi mafuku musambobidi takyebe kukumbana, Bena Yuda ba ku l’Asie, habamumwene mu ntempelo, abafundulwile kibumbu kioso, abamukwete.

²⁸Tabēle musase’shi: Anwe Bena Isalele, etukwashei namu. N’ē uno muntu alambukishā bantu boso kosokoso; elamuna kwatudi’ twe bantu, na kwilamuña nyi ku mukanda wa bishila, na ha kino kihindji’nyi; ungi mwanda namu batwesheshe Bangidiki mu ntempelo, balwishishe hano hantu hahatulwe-hekishila.

²⁹(Mwanda abamumwene kwibedi mu kibalo na Tofimuse, mwina Efisesa, e winyi nyi abatentekyeshe’shi, Paulu bamutwesheshe mu ntempelo).

³⁰Biabia kibalo kioso kibatunkumine, bantu namu abakamine lubilo hamune; na hakukwata Paulu, abamukakila hasha ha ntempelo: Kahindji n’āka bibi bibashitshilwe.

³¹Habādi tabakyebe kumwihā, mukāndu ubayile kwi nfumu a kimankinda bia basalai ba kibumbu kia basha ngoshi eshi: Mu Yelusalema moso mubokakana eunga.

³²E winyi kahindji n’āka, habātshile basalai, na balami ba mu nkama ya basulai, bafutumukile lubilo kwabadi; abo habamwene nfumu a bimankinda bia basalai, abalekyele kukuhila Paulu.

³³Benyihaha nfumu a bimankinda bia basalai hakwifubula hehi bamukwete, bakamikile’shi: Bamwanye na nkano yibidi, behwishe’shi: A winyi u nanyi? e mukite kinyi?

³⁴Biabia bangi abēlele dimo eyi, na bangi abēlele dingi eyi munkatshi mwa kibumbu; na habakutshilwe kushingula kalolo ha mwanda w’eunga, bakamikile’shi: Bamutwale mwibalasa dibadi mu kihempe.

³⁵Habafikile ha kikamino, biabia badi mutwalwena basalai, ha mwanda wabukyelo bwa kibumbu.

³⁶Mwanda kibumbu kibalondele kumongo, kibelele musase’shi: Mukatushei.

³⁷Habakyebele kukunkusha Paulu mwibalasa dibadi mu kihempe, bākwile kwi nfumu a bimankinda bia basalai’shi: Nakule n’obe su? Bamwālulwile’shi: Weuku kwakula bwina Ngidiki su?

³⁸A ta n’obe winyi mwina Ndjihitu, babushishe eunga kala, kwibedi kwa ano mafuku, bakunkwishe bantomboshi binunu binanka mpaa na mu kabāka?

³⁹Anka Paulu bambile’shi: Ami nyi mwina Yuda a ku Tasusa, kibalo kia Selesia, n’a mu kibalo akio namu tankia bisumanga ayoyo; n’ami nakusendela ondekye, nakule na bantu.

⁴⁰Habadi muhebwe matalwa, Paulu bemene ha kikamino, bahoheshe n’eyasa die kwi bantu. Hakubadi takudi nyaa, bakwile n’abo mwidimi dia Bahebelu’shi: