Read songe Bikitshino 22 Bible Online

Bikitshino 22 - songe bible

Bikitshino 22

¹Anwe bakwetu, na bayaiya, hushai mwanda wande wa kwibingisha wañakula binobino.

²(Habamuhushishe ākula mwidimi dia Bahebelu, abauminyine nyaa;) n’e tākula’shi:

³Ami uno, mbinyibinyi nyi mwina Yuda, mutandjilwe mu Tasusa, kibalo kia mu Selesia, anka nyi mukuule mu kino kibalo ku ngwa ya Ngamadiele, nalambukishwanga anka mwiyile kushinkamisha kwa bihikwa bia mukanda-wabishila wa bashye tukulu, nadi na kinsukunsuku kw’Efile Mukulu, hamune bū’nwe nwi n’akio lelo uno.

⁴Nabinganga ba mu dino eshinda mpaa na kwibafisha ku lufu, nadi ānya bana balume na bana bakashi, kwibafisha mu mashibo a nkano.

⁵Mu yino yoso tshiitemwakwidi e hanundu ha bakwabo, āñakwila bu kamonyi, na bakulu boso namu: kwabadi nyi ku natambwile mikanda yitumibwe kwi bakwetu ba mu Kidisitu, nayile ku Ndamasaka mu kufisha aba ku Yelusalema abadi banyibwe, mwanda wa kwibamwesha malwa.

⁶Bitabibakitshine hanadi ha luendo lwande, na hanadi tandji hehi ku Ndamasaka, nguba tabadi akimbi mitwe, kubampulumukile etata ditaka, adifu kwiilu, dibamunyikile kosokoso handji.

⁷Nami nahōne hashi, nahushishe eyi adinamba’shi: A Saulu, a Saulu, a nkinyi kio’mbingabinga?

⁸Ami namu nālulwile’shi: A Mwanana, a n’obe ’nyi? E namu’shi: Nami Yesu a Nasaleta obingabingā.

⁹N’aba badi n’ami abamwene etata binyibinyi, mō ubebakwete, anka tambahush’eyi dia winyi badi akula n’ami.

¹⁰Namwihwishe’shi: A nkite na minyi Mwanana? Mwanana Nfumwetu bandungwile’shi: Buka, wende mu Ndamasaka: abikakulungulwa mwanka abiā bioso bibakusangwilwa obe kukita.

¹¹Hanakutshilwe kumona mwanda wa mbadibadi y’adi’etata, na hakukunkushwa ku mboko kwi’ba nadi n’abo, nakafikile mu Ndamasaka.

¹²Biabia umune, Ananaisa, muntu mululame muyile mukanda-wa-bishila, badi na mukāndu-wibuwa munkatshi mwa Bena Yuda boso babadi babombele mwanka.

¹³E bafikile kwandji’mi, baimene, andungula’shi: Mukwetu Saulu, bula meso’be, biabia anka ha yawa nguba namutadile.

¹⁴Biabia bakwile’shi: Efile Mukulu a bashyetukulu bakusangula’shi; weukye amukyebela eshimba die, na kumonā’wa Mululame, na kuhusha eyi dia mukanwa mwe.

¹⁵Mwanda obe okekala kamonyi ke kakulungula bantu boso ku kiakia kibomono na kibohusha.

¹⁶A binobino oesha kinyi? ebwe, obatshishwe, otumpe milwisho yobe, wetanyine h’eshina dia Mwanana.

¹⁷Bitabibakitshine, hanālukile ku Yelusalema, anka hanadi natekye mu ntempelo nadi alotakana kilotwa kishī kia tulo.

¹⁸Namumwene andungula’shi: Nyisha bukidi, okatukye lubilo mu Yelusalema; mwanda tabakakumina bulungudi bobe bwa bu kamonyi bwa ha mwanda wande, ooo.

¹⁹Ami nālulwile’shi: A Mwanana, abeuku mu nadi atweshesha bakumine mu nshibo ya lukano, na mu nadi abakuhila mu bitumbwilo bioso.

²⁰N’ahabasumbukile mase a Setefane, ami namu nadi mwimane hanka, nakumina lufu lwe, nalamine bifwalwa bia benyi abamwihayile.

²¹Biabia ebandungwile’shi: Katuka, mwanda nankakutumu kingi kula, mpaana kwi Badjentaila.

²²Biabia habahushishe eyi die, abanyishishe mayi abo’shi: Kashai uno muntu e biabia hano ha nsenga, tambihwandjikile e kwikala na muwa.

²³Habadi abēle bila, abafule bilamba, tabele nsenga mwiilu.

²⁴Biabia nfumu a bimankinda bia basalai bakamikile’shi: Mufishei mwibalasa di mu kihempe, bebalungwile’shi: Bamutompe hakumukuhila nsasu, nshingule wadi nau wabamwela bila bi bino’bi.

²⁵Habamwanyine na bikoba, Paulu baihwishe mulami a lukama lwa basalai badi mwimane hehi’shi: A nyi mulombene kishila’nwe kukuhila muntu mwina Loma, shī muhishībwe su?

²⁶Mulami a lukama lwa basalai habahushishe biabia, bayile, alungula nfumu a bimankinda bia basalai’shi: Dimuka kiokyebe kumukita, mwanda uno muntu e mwina Loma.

²⁷Henyihaha nfumu a bimankinda bia basalai bafikile kwadi, amwihusha’shi: Ndungule bibuwa, we mwina Loma su? E namu’shi: Ee.

²⁸Biabia nfumu a bimankinda bia basalai bālulwile’shi: Ami namwene buno bwina kibalo anka ku mulo wi bukoho. Paulu namu’shi: Anka’mi nyi mutandjibwe mwanka mu buluñantu.

²⁹Kahindji n’āka aba abadi abakyebe kumutompa abakatukile kwadi: Nfumu a bimankinda namu bakwetwe na moo, habashingulwile’shi, biosobi mwina Loma, na mwanda e bamwanyine.

³⁰Habubatokyele, mwanda bakyebele kwiuka kikankamikilo kiabamuteulwidile kwi Bena Yuda, bamwangwile bibānyinwe, bakamikile batshiite-bakwidi namu, na kimu kiabo kioso’shi: Ekoñenei hamune; biabia bamwikishe, amutula ku mpala kwabo.