Read songe Bikitshino 23 Bible Online

Bikitshino 23 - songe bible

Bikitshino 23

¹Henyihaha Paulu bebatadile kanana ha kimu kikata, bakwile’shi: Anwe bakwetu, nyi mwikala atala mpaa na lelo uno, kumpala kw’Efile Mukulu na muntu ebuwa a munda mwande.

²Tshiite-mwakwidi Ananaisa e hanundu ha boso, bakamikile aba baimene hehi n’e’shi: mukuhilei ku kanwa.

³Henyihaha Paulu bamwalulwile’shi: Efile Mukulu akakukuhila namu obe lubumbo lushinge ntoshi; oshala haha kuntshibil’ami kimu mwiyile mukanda-wa-bishila, n’obe bokamika’shi: Bamukuhile mushī mwiyile bishila?

⁴N’aba abadi bemane hehi abakwile’shi: Aaa! bōka tshiitemwakwidi mukata a Efile Mukulu e hanundu ha bakwabo biabia?

⁵Henyihaha Paulu namu’shi: Nkimwiukye, anwe bakwetu’shi, e nyi tshiitemwakwidi mukata; mwanda ngufundjibwe’shi: Tokākulanga bibubi bia mulami a bantu bobe.

⁶Anka habashingulwile Paulu’shi, luhese lumune lubadi lwa Basadusea, na lungi luhese lubadi lwa Bafadisea, bēlele musase munkatshi mwa kimu kikata’shi: Anwe balumiana bakwetu: Ami nyi Mufadiseo, mwan’a Mufadiseo; nyi ha mwanda wa lwinyi lutengyelo na lusangukilo lwa bafwe nyi hangihwishwa.

⁷N’e habākwile biabia, kubabukile mpaka munkatshi mwa Bafadiseo na Basaduseo; biabia kibumbu kibelamunwine hanka.

⁸Mwanda abo Basadusea abakulā’shi: Takwi lusangukilo lwa bafwe, sunga mwikeilu, sunga kikudi, ooo; anka Bafadiseo abakuminā bioso.

⁹Biabia kubabukile eunga dikata; n’aba bafundji-ba-mikanda, ba ku luhese lwa Bafadiseo, abebwele, tabēle mpaka’shi: Tatwi bamone mwanda mu uno muntu; hangi su kikudi su mwikeilu bahu kwakula n’e, tatubalua’twe n’Efile Mukulu.

¹⁰Binyibiabia hakubabukile mpaka yikata, nfumu a bimankinda bia basalai, hakutshina’shi, tala bakasasulu Paulu kwabadi, e bakamikile basalai’shi: Ikai, nukamumane ha bukoho munkatshi mwabo, nufikye n’e muno mwibalasa di mu kihempe.

¹¹Biabia bufuku bubalondele Nfumwetu baimene hehi kwadi, amba’shi: A Paulu nyish’eshimba diobe, mwandā’nka muboñakwilwanga bu kamonyi mu Yelusalema, anka hamune odi n’au ngwa kwakwila ku Loma.

¹²Habubatokyele, bamo ba ku Bena Yuda abekongyele hamune, abetshihile mutshiho’shi: Tatukadi, sunga nkutoma, anka su tubaihā Paulu.

¹³Abadi makumi ananka asubule abahangile luno lukūku.

¹⁴Binyibiabia abafikile kwi batshiitebakwidi bakata na kwi bakulu’shi: Atwe tubahu kutshiha mutshiho ukata wi moo’shi: Tatukadi kintu, anka su tubaihā Paulu.

¹⁵Binyibiabia anwe, na bena kimu kikata nukabembule nfumu a bimankinda bia basalai’shi, amwishi kwanudi maloba, nukadimbe bwabakyebe kwihusha mwanda ukambe kushinkama ha mwanda we, biabia atwe kwibedi e tabandjile kufika hehi, tatuhwile kwimēna mwa kumwihayila.

¹⁶Anka habahushishe mwihwa a Paulu mwanda wa kubembela kwabo, bayile, akatwela mwibalasa di mu kihempe, balungwile Paulu.

¹⁷Henyihaha Paulu betanyine kwadi umune a balami ba basalai lukama, bambile’shi: Katule uno nsongwalume kwi nfumu a bimankinda bia basalai, mwanda e na wa kumulungula.

¹⁸Biabia e bamwatshile, akamutula kwi nfumu a bimankinda bia basalai, bambile’shi: Paulu musungi baftitamine kwadi, bansendela’shi: Katule uno nsongwalume kwadi, e na wa kumulungula.

¹⁹Henyihaha nfumu a bimankinda bia basalai bamukwatshile kwi eyasa, bayile n’e bufyefye ku bukunkula, bamwihwishe’shi: A ngunyi uodi n’au kundungula?

²⁰E bambile’shi: Bena Yuda abalombanyine kukukyeba’shi: Okaishe Paulu maloba ku kimu na kudimba, bwabakyebe kwihusha mwanda ukambe kushinkama,

²¹Anka twebakuminanga, mwanda kwi bamo abamubembela bana balume be makumi ananka asubule, abo mbahwe kutshiha mutshiho’shi: Tatukadi, sunga nkutoma anka tubamwiha. Binobino mbemēne kutengyela mulayilo kodibe.

²²Biabia nfumu a bimankinda bia basalai bakuminyine nsongwalume ku katuka, bamukamikale’shi: Tokumanga kulungula mungi muntu bibondungula yino myanda.

²³Henyihaha betanyine balame babidi ba basalai lukama, eshi: Kongolai basalai nkama yibidi ba kwenda ku Kesalea, na be-ha-nfalasa makumi musambobidi, na basha milumbu nkama yibidi abēbwele ha nsa kitema ya bufuku.

²⁴Tushai namu nyama ya kwiyiñama Paulu, nukamufishe bibuwa kwi Filekise mutontshi e hanundu ha bakwabo.

²⁵Bafundjile mukanda mulombene bino’shi:

²⁶N’ami Kalaudiuse Lesiasa kodibi Felekise mutontshi mukata a kinemo, nakwimuna.

²⁷Uno muntu bakwetwe na Bena Yuda, tekalanga hehi kwihayibwa kwabadi, henyihaha ami nafikile na b’ēfita, namumañuna hakushingula’shi, e mwina Loma.

²⁸Biabia hanakyebele kushingula winyi mwanda wabamuteulwile, namufishishe ku kimu kiabo kikata;

²⁹nyi munashingulwile badi muteulwe ha myanda ya mu mukanda wa-bishila w’abo, anka takubadi ungimwanda wa kumuteula n’ao uhwandjikile lufu, sunga nkano, ooo.

³⁰Hanyikalanga mulungulwe mwa babembelanga uno muntu Bena Yuda, kahindji n’āka natumu e kodibe, nakamikile benyi abamuteula namu’shi: bākule ku mpala kobe winyi mwanda wabadi n’e. Nankuladika.

³¹Henyihaha basalai, anka mwabakamikilwe, abātshile Paulu, bamufishisha bufuku ku Antepatese.

³²Habubatokyele abalekyele be-ha-nfalasa kwenda n’e, bia bāluka kwibalasa di mu kihempe.

³³Abo habafikile ku Kesalea, na hakuha mutontshi mukata e hanundu ha bakwabo mukanda, abatule namu Paulu ku mpala kwe.

³⁴Biabia e hakubala mwanka, bēhwishe’shi: E ku lwi kunyi luhese lwa nsenga? Habashingulwile’shi, e mwina Selesia,

³⁵Bakwile’shi: nankahusha mwanda wobe ahakafiki namu bakuteula. Bakamikile namu’shi: Alamibwe mu nshibo ya kimu ya Heloda.