Read songe Bikitshino 24 Bible Online

Bikitshino 24 - songe bible

Bikitshino 24

¹Habakile mafuku atano, tshiite mwakwidi mukata Ananaisa, e hanundu ha bakwabo, bayikile na bakulu, na mungi muludiki a bishima, atemunwa bu Tetulusa, basongyele Paulu kwi mutontshi mukata e hanundu ha bakwabo.

²Habetanyine, Tetulusa babangile kumuteula’shi: Ha mwanda atumono kuhohela kukata kodi, na bikitshino bilumbulukye mbikitshinyinwe mwīlo uno kumpwandjikishi yobe.

³Atwi utambula na lutumbo lwoso mu bihaso bioso na mu bihindji bioso, obe Filekisi muneme bi moo.

⁴Sunga mbiabia nkibiandjia kukubamba kihindji kibula nakusendela’shi: etuhushishe ha mwanda wa kutshibusha kobe mu bishima bihela.

⁵Mwanda tubamono uno muntu e bu fulanyanda, n’ā kuta ntamishā bantu munkatshi mwa Bena Yuda hanohansenga hoso, na bu kimankinda kia bulondji bwa bena Nasalene;

⁶e namu bakindakananga mu kushula bishila bia mu ntempelo; e, tubamukwete, tubadia kumutshibila kimu mulombene mukanda wetu-wa-bishila.

⁷Anka nfumu a bimankinda bia basalai, Lesiasa, bafikile, bamumanwine mu maas’etu na bukome bukata.

⁸Na kukamikā’shi; bamuteula bafikye kodi: n’obe na mwinyi hakumutompa, okashingula biya yino myanda yoso yiatudi bamuteule.

⁹Bena Yuda namu abakuminyine’shi: yino myanda yianka biabia.

¹⁰Henyihaha Paulu, habalobwelwe na mutontshi mukata e hanundu ha bakwabo’shi, akula, bakwile’shi: Ha mwanda neuku’shi, obe we nsushi a ku uno mwilo bihwa bibungi, nakamba kusehela kwitotolā’mi na mwinyi.

¹¹Mwanda weuku kushingula’shi: tankukile mafuku ekumi n’abidi kasha nakamine ku Yelusalema mu kulangwila.

¹²N’abo tambansanane mu ntempelo n’ēle mpaka na muntu, sunga nkutantamisha bantu, sunga mu kitumbwilo, sunga mu kibalo, ooo.

¹³Tambeukye namu kushisha yinyi myanda yiabanteulanga n’ayo binobino.

¹⁴Anka nakumina kino kodi’bi’shi: Mwiyile eshinda diabatemuna bu kilubilo kia lulangwilo, nyi mwandangwilā Efile Mukulu a bayaiya ba kala, nyi mwandji mukumine myanda yoso yibafundjilwe mulombene ’mukanda-wa-bishila na mu wa Batemuki.

¹⁵Nyi na Efile Mukulu lukuluhilo lwabakumine kw’abo bana bene’shi: Akukekala lusangukilo lwa bafwe balulame, na lwa bashi balulami.

¹⁶Muno’mu nyi mwanyinyisha ami na mwinyi kwikala na muntu e munda mwanda shī na mwanda ku mpala kw’Efile Mukulu na bantu.

¹⁷Binyibiabia habakile bihwa bibungi nafikile kufisha biabuntu na milambu ku mwilo wande.

¹⁸Hanadi akitshi biabia bamo Bena Yuda ba ku l’Asie, abampetele musudibwe selelee mu ntempelo; tanadi na kibumbu, sunga n’eunga.

¹⁹Abo abadia kwikala kuno ku mpala k’obe, na kunteula su be n’ami mwanda.

²⁰Sunga mbano be hano bākule, su mbasanane bikitshino bibubi mwandji hanadi mwimane ku mpala kwa kimu kikata.

²¹Anka dinyi eyi dimune dinēle hanadi mwimane munkatshi mwa’bo’shi: Nyi ha mwanda wa lusangukilo lwa bafwe nyi wangihwishwa kwanudi lelo uno.

²²Biabia Filekise habahushishe yino myanda, na hakuukishwa kishinkatshilo kia diadia eshinda, e bebalayile’shi: A hakālala Lesiasa, nfumu a bimankinda bia basalai, nankatompo yinyi myanda yikunemene.

²³Binyibiabia bakamikile mulami a basalai lukama’shi: Nulame Paulu lukano lwa, meso, totunanga bakwabo kufika kw’adi kumukwashia, ooo.

²⁴Habakīle angi mafuku, Filekise bafikile na mpian’e Dusila, mwina Yuda; e baitamine Paulu’shi: Mpushe winyi mwanda wa lukumino lwa mu Kidisitu.

²⁵Biabia habadi ahatula mwanda wa kululama, na kwitonta, na hakitshibilo kia kimu kianakafikye, Filekise basushile moo, bālulwile’shi: Banda kwenda kino kihindji, anka liankamono kihindji kihwandjikile nankakwitanyina:

²⁶Anka e badi atengyela’shi: Ntambule mono kwi Paulu, mwandjia kumuhoswela. Biabia nyi kibamwitanyinanga misusa na misusa kwisamba n’e.

²⁷Anka babakile bihwa bibidi Pokyusa Fesetusa bahyene Filekise; biabia Filekise mwanda badi n’eshimba kusangasha Bena Yuda, e balekyele Paulu mu lukano.