Read songe Bikitshino 26 Bible Online

Bikitshino 26 - songe bible

Bikitshino 26

¹Henyihaha Angidipa balungwile Paulu’shi: Bohebwa matalwa kwiakwila obe na mwinyi. Henyihaha Paulu bōlwele mboko, teakwila’shi:

²Nahwandjikila nyi na mwabi, obe nfumu Angidipa, tanakyebe kwialulwila ku mpala kobe lelo uno, mwiyile myanda yoso yandji muteulwe kwi Bena Yuda.

³Nyi nkukambe kwiuka’shi, we mushingudi e moo a bihikwa bioso na ngihusho yoso ya munkatshi mwa Bena Yuda, binyibiabia nakusendela’shi: Weshinkye kunyihusha.

⁴Bena Yuda boso abeuku mwiyile nyikashi ya ha bunsongwalume bwande mpaa na binobino, yinadi n’ayo kwibedi munkatshi mwa mwilo wande ku Yelusalema.

⁵Abo mbahwe kunshingula na kumbangilo, su be na musanku kwakula bu tumonyi, eshi, anka molokyele swē bulondji bwa lulangwilo lwetu, nadi na muwa bu Mufadisea.

⁶Binobino namu nyi mwimane kutshibilwa kimu ha mwanda wa lutengyelo lwa mulayilo, ubalayile Efile Mukulu kwi bashyetu.

⁷Nyi ku winyi mulayilo bisaka bietu ekumi na bibidi, bikwete kufuba na kinsukunsuku, bufuku na kanya abitengyela kwiuheta: Nyi ha mwanda wa luno lutengyelo, obe nfumu Angidipa nyi muteulwe kwi Bena Yuda.

⁸(Kashia!) a nkinyi nkihwandjikishwe kodibe’shi: Takīkekala kikitwe kw’Efile Mukutu kubusha bafwe ku lufu?

⁹Nyi mbinyibinyi ami nadi atentekyesha munda mwande’shi: Mbihwandjikile’mi kukita myanda yibungi ayituhishena n’eshina dia Yesu a Nasaleta.

¹⁰N’ayo yino yanakitshine namu mu Yelusalema; nashitshile mu nshibo ya lukano bebungi ba bahatulwe-bakishila, hanatambwile matalwa kwi batshiite-bakwidi bakata; na habatele bubale kwa kwibeha nakuminyine.

¹¹Nadi ebamwesha malwa misusa na misusa mu bitumbwilo bioso, nadi ebafinyika kukā Efile Mukulu mulomo, na hanakwatshile bukyelo bukalabale kwabadi, nebingenene n’abo mpaa na ku bingi bibalo.

¹²Binyibiabia hanadi ende ku Ndamasaka na matalwa, na lukamikilo lwa kwi batshiite-bakwidi bakata,

¹³Ha nguba mitwe, obe nfumu, namwēne mwishinda etata dibafiki kwiilu, dikile mbadibadi ya nguba, dibamunyikile hosohoso hanadi, n’aba nadi n’abo ha luendo.

¹⁴Hatubadi’twe boso bahona hashi, nahushishe eyi adiakula kwandji’ mi mwidimi dia Bena Hebelu. A Saulu, Saulu, a nkinyi kionbingilabingila? Ki bukoho obe kusubwila misebe ku binsongo.

¹⁵Biabia n’amba’mi’shi: A n’obe nyi Mwanana? E bālulwile’shi: Na’mi Yesu obingabingā.

¹⁶Anka ebwe, wemane ha ngwa yobe, nyi ha uno mwanda unamwekyela kodi’shi: Nkusangule bu mufubi, na bu mulungudi a myanda yibomwene, na mu yaya, mwi yinyi’yo nankamweka kodi.

¹⁷Na kukumañuna kwi bantu, na kwi Badjentaila, kwabadi nyi kunankutumu’shi,

¹⁸okyebabule meso, na kwibafutalasha ku mufito, batadile kwitata, na ku matalwa a Satana namu, batadile kw’Efile Mukulu mwabadia kutambwila kulekyelwa kwa milwisho, na buhyianyi munkatshi mwabo balamunwe-selelee ku lukuluhilo lwi mwandji’mi.

¹⁹Binyibiabia obe nfumu Angidipa tanadi na bukolwa ku kimonwa kia mwiilu.

²⁰Anka nabadidile kulungula abo ba ku Ndamasaka, n’abo ba ku Yelusalema, n’aba mosomoso mu mpese ya Yudea, na kwi Badjentaila namu’shi: Belangye na kwaluluka kw’Efile Mukulu, bakite namu bikitshino bilombane kwilanga kwa mashimba.

²¹Ha yino myanda nyi habankwatshile Bena Yuda mu ntempelo, batompela kungihā na maasa e bukyelo.

²²Biabia hakutambula bwinyi bukwashi bwa kw’Efile Mukulu, nyi muyididile mpaa na lelo, nkwete kulungula bu tumonyi kwi bahela na bakata; tañakula yingi myanda, anka yinyi yibākwile batemuki na Mosesa ayikafiki;

²³eshi, Kidisitu badi na wa kufwambuka, ekale namu bu a kwibedi kwa kusanguka ku bafwe, na kulesha etata kwi bantu na kwi Badjentaila.

²⁴Biabia habahwile kwiakwila, Fesetuse bākwile n’eyi dibukoho’shi: A Paulu, we kitesha. Kalolo kebungi kabakwalula bu kitesha.

²⁵Anka e bālulwile’shi: Ami nki bu kitesha’mi, obe Fesetuse muneme bi moo; anka nākula myanda ya binyibinyi na ya lwishinko lwa binangu.

²⁶Mwanda nfumu euku yino myanda, ku mpala kwe nākula na kiana, mwanda nyi mwiukye biya’shi: Sunga ngumune wa yino myanda umufwame, mwanda uno tangukitshibwe mwihaka.

²⁷A nfumu Angidipa, okumina myanda ya batemuki su? Neuku’shi, we mukumine.

²⁸Henyihaha Angidipa bālulwile Paulu’shi: Kubashala anka hahela obe kunalula kwikala mwina Kidisitu.

²⁹Binyibiabia Paulu bambile’shi: Mpahela su nkukumbana, nadidi kw’Efile Mukulu’shi: Tanank’obe, anka na boso abampusha lelo uno bekale bū’mi, anka bashi na yino nkano.

³⁰Habahwile kwakula biabia, nfumu bebwele na mutontshi mukata e hanundu ha bakwabo, na Benise, n’aba badi ibashale n’abo.

³¹Biabia habakungulukile, benda ku bukunkula, tabelungushena’shi: Uno muntu tamukite kintu akihwandjikila lufu sunga nkano.

³²Henyihaha Angidipa balungwile Festuse’shi: Uno muntu badia kuhosolwa, ēnda, su tamulobe Kesala.