Read songe Bikitshino 27 Bible Online

Bikitshino 27 - songe bible

Bikitshino 27

¹Hatubahwile kufuna’shi, twalale’masua mpaa na ku Itale, abalubwile Paulu na yinyi misungi kwi umune atemunwe bu Yuleuse, badi mulami a basalai lukama a ku kibumbu kia ngoshi kia Aungusituse.

²Hakwikila’masua a ku Adimityuma, tubealundwile, tubadia tufūna kwenda ku mpese ya l’Asie; umune, Aleustakuse mwina Masedonya a ku Tesalonika badi n’etu.

³Habubatokyele tubafikile ku Sidona, na Yuleuse bakitshinyine Paulu bia bumuntu, amuhosola buluñantu kutemba kwi bakūku be mu kwikisha.

⁴Hatubealundwile kwanka, tubayile ku Saihuluse ku lwinyi luhese lubadi lukingile luhahi, mwanda kihahi kibetumbakeshe.

⁵Hatubābukile mema e ku bukunkula bwa Selesea na Pamfidia, tubafikile ku Maila, kibalo kia mu Laisea.

⁶Mu kinyi’ kio, winyi mulami a basalai lukama basañene angi masua a ku Alekesandela, abadi akyebe kwenda ku Itale, betwikishe mwanka.

⁷Hatubayile maletemalete mafuku ebungi, na kumona bukoho bwi moo, hakufika ku bukunkula kwa Shinduse, luhahi tandwitulekye’lo, ooo, tubayile dia kushī ku mpunga ku Kelete, kubukunkula kwa Salamone,

⁸na hatubakile kwanka tubakidile ha bukoho, twakafika ha kihindji kibatemwinwe bu Hētwa dibuwa, dibadi hehi na kibalo kia Lasea.

⁹Hatubashimishe kihindji kikata, na leundo namu lia mema lubadi lwa masaku, na mwanda wa kihindji kia kushila biakudia takibadi kikile, Paulu bebadimwine’shi:

¹⁰A Bamwanana, nashingula’shi, luno luendo alukekala hehi na masaku na kushimisha bikata, tañanka ku bintu ank’abio na masua enyi, anka na ku miuwa yetu namu.

¹¹Sunga mbiabia mulami a basalai lukama bakambile kukumina mwanda wa kapitene na sha masua, ha yaya myanda yibākwile Paulu.

¹²Mwanda h’efwa tahabadi mbalo yibuwa yakushala hanka ha mieshi ya mashika, abadi bakile bungi abakwile’shi: Tukatukyei hano henyi, hangi su atukamono mwa kukafikila, su mpa kinyi, su mpa kinyi ku Fenesea, kwinyi’ko tushale kwanka ha mieshi ya mashika; ako nyi kwifwa dia ku Kelete ditadile ku Sude-Weseta na ku Noda-Weseta.

¹³Habahukile luhahi lwa ku Sude bihelabihela, abo abahwandjikishe’shi: tubamono mwatukyebelanga, na habahwile kwabula kimikilo, abayile ku bukunkula bwa Kelete.

¹⁴Anka tankukile kihindji kikata, henyihaha kihahi ki moo ltibahukile kwanka, aiteminwa bu Eudokiledone.

¹⁵Masua habakwatshilwe na luhahi, na hashī eukye kwimikwa amufu luhahi, biabia tubatambwishwe n’alo.

¹⁶Na hakukamishibwa lubilo kushī mu mpunga mu kīla, kibatemwinwe bu Kulauda, tubamwene bukoho bwi moo ha kwiafisha mwanka.

¹⁷Ao enyi, habeakamishe, abātshile bikwatshiso, bebianyina mushi mwa masua; henyihaha hakutshina’shi, tala twakakulukila mu tubilantwatwa, tubayishishe mahema a kwiilu, biabia tubatakwilwe.

¹⁸Na hakusampulwa bikilekile na kihahi, abaheleshe bushito bwa masua habubatokyele.

¹⁹H’efuku dia kasatu, atwe, na maas’etu a na mwinyi, tubasumbwile bintu bia mu masua.

²⁰Biabia mu mafuku ebungi habakutshilwe nguba na nyenyenyi kumweka, na kihahi kinyi takibadi kihela kwatudi, lukuluhilo lwetu loso lwakuhashibwa lubetukatukile.

²¹Henyihaha Paulu hakushila biakudia kihindji kikata batukile munkatshi mwabo’shi: A ee, a bamwanana nubahwilā kumpusliisha’mi, kushi kulundula ku Kelete, biabia, tatubahwila kumona ano malwa na kushimisha kwa bintu.

²²Anka binobino nenulanga’shi: Nyishai’mashimba, mwanda takukekala kushimisha kwa muwa munkatshi mwenu, ooo, anka kwa masua.

²³Ami nyi muntu e Efile Mukulu anda ngwilā, amufubila, mwikeilu e yimene hehi n’ami buno bufuku,

²⁴eshi, A Paulu, totshinanga; Wodi n’au ngwa kufishwa ku mpala kwa Kesala; talanga, Efile Mukulu takuhele bosob’enden’abo ’masua.

²⁵Binyibiabia anwe Bamwanana, nyishai’ mashimba, mwanda’mi nakumine Efile Mukulu’shi, aukekala’nka mwaubandungwidilwe.

²⁶Anka watudi n’au ngwa kukēlwa’nyi ha kila kikampanda.

²⁷Anka hakubafikile bufuku bw’ekumi na dia kananka, hatubakumbakeshwe takwīku, tatwīku mwishiba dia Andidiya, hatahabadi bu kilonkatshi kia bufuku, bena masua abahwandjikishe’shi: Tatudi hehi na ku yingi nsenga,

²⁸biabia abahimine, beākwata biadi makumi abidi; habayile ku mpala kahindji kahela, abahimine’ nyi dimo, abakwete biadi ekumi na bitano.

²⁹Henyihaha hakutshina’shi, tala twakahona ha mabwe, abēle bimikilo binanka kwikolo dia kumongo, tabenyengye’shi, buatoka babo.

³⁰Binyibiabia habadi Bena masua tabakyebe kusuka ku masua, abayishishe kato kahela mu mema, mu kudimba bu abakyebe kwela bimikilo kwikolo dia ku mpala.

³¹Henyihaha Paulu bākwile kwi mulami a basalai lukama, na kwi basalai’shi; Su bano tabekala ’masua, anwe tanwiuku kuhashibwa.

³²Henyihaha basalai abatshibile mioshi ya kato kahela, kabahone ’mema.

³³Habubadi tabwende kukutoka, Paulu bebasendelele boso’shi: Atai bidibwa, mwanda lelo uno nyi efuku di’ekumi n’ananka dianubayishishe bashīle biakudia, tanudi kintu.

³⁴Binyibiabia nenusendela’shi: Bibuwai nudie, mwanda bino nyi kuhanda kwenu; mwanda ku mitwe yenu takukahono lunyēne lumune, ooo.

³⁵Habākwile biabia bātshile dimpa, atumbul’Efile Mukulu ku mpala kwa boso: hakwiditshimuna babangile kudia.

³⁶Henyihaha mashimba a boso abanyingile, abo namu tabadi.

³⁷Atwe boso mu masua tubadi bantu nkama yibidi na makumi musambobidi, na basamombo.

³⁸Habadi abekuta, tabahelesha bushito bwa masua, tabēle ngano mu mema.

³⁹Biabia habubatokyele, tambashingule biya yinyi nsenga; anka abasokwele h’efunyu, di na misengyeya, nyi habafune’shi: Tutompe kufisha masua mwanka lubilo.

⁴⁰Habadi abātshibi bīmikilo, na kwibileka ’mema, abāngwile mioshi ya binyengyele, na hakukamisha ehema, dibadi adiatambusha ku mpunga ya luhahi, abayile, batadile ku misengyeya ya kubukunkula.

⁴¹Anka hakufika ku mako a mema a tulunga tubidi, abafishishe masua ku kiese; biabia ekolo dia kumeso dibeshīkile anka hoo, anka dia ku mongo kwa’o dibatshokokyele ha mwanda wa bukyelo bwa mbundambunda.

⁴²Biabia basalai abadi na binangu’shi: Twihei misungi, tala bangi bayoa, bahanda.

⁴³Anka mulami a basalai lukama mwanda badi n’eshimba kuhasha Paulu; bebalekyeshe kulangila kwabo, bakamikile namu’shi: Beukye kuyoa, babadile kuhona ’mema, bakābukye ku mahia.

⁴⁴Abashala, bakwetwe ku mabaya, bangi namu ku bintu bi ku masua. Nyi mwa bibakitshinyinwe’shi, boso bahandjile ku mahia.