Read songe Bikitshino 28 Bible Online

Bikitshino 28 - songe bible

Bikitshino 28

¹Habahwile kuhanda, henyihaha abashingulwile’shi, kino kila akitemunwa bu Meleta.

²Bantu basendji abetukitshinyine bumuntu bukalabale; mwanda abetwelele kālo, betwitamina’twe boso mwanda wa mpeshi na mashika.

³Biabia Paulu habadi asangula kita kia ntete, na liakwiyilamika mu kālo, nyoka batukile, mwanda wa kibobo, bamusumine kwīasa ēmbela.

⁴Habamwene basendji kiakia kintu ki na bulembe kimwēmbele kwiasa die, tabeakushena’shi: biosobi uno muntu ntomboshi, e winyi, sunga bahandjile mem’akalunga, kululama tankukumine kumuleka na muwa.

⁵Biabia bekikukwidile mu kālo, tamuhushe bu kwi kintu, ooo.

⁶Ank’ābo abadi abatala’shi, su ayikamuulu, su nkuliona hashi mufwidile; anka habamutale kihindji kikata, na kumona tamukitwe kintu, abālulwile mashimba’bo, tabākula’shi: E winyi nyi Elile.

⁷Binyibiabia mu yaya mpese mubadi mono ya muntu mukile bukata a mu kīla, eshina die bu Pubileuse; e betukukile, etushadisha bwenyi matuku asatu bwi buwa bukalabale.

⁸Bitabibakitshine, shye a Pubileuse badi mulale na busungu bwa mbidi yi kālo, na bwa mukungulu; Paulu batwēle mwadi, batekyele, amutenteka māsa, amuhasha.

⁹Habikabitshinwe biabia, bangi namu be mu kinyi kīla abadi na masungu, abafikile, bahashibwa.

¹⁰Abo namu abetunemekyele na bineno bibungi; hatubakatukile, abetutentekyele na bintu biatushī badi n’abio.

¹¹Biabia habakile mieshi yisatu tabakatukile mu masua a ku Alekesanda, abadi ashala mwanka ha mieshi ya mashika, kitundwilo kia kibadi bu Diosikudi (kuhatula nyi nkwambashi: Mpasa yilume yibidi).

¹²Hatubafikile ku Selakuse, tubashalele kwanka mafuka asatu.

¹³Hakukatuka kwanka, twefūnya, twakafika ku Lekyuma; biabia habahwile efuku dimune, luhahi lwa ku Sude lubahukile, na ha dingi efuku dibalondele, tubafikile ku Puteodi.

¹⁴Nyi mwatubasañene bakwetu ba mu Kidisitu, betusendela kushala n’abo mafuku musambobidi, anka biabia tubayile batadile ku Loma.

¹⁵Binyibiabia bakwetu ba mwanka habetuhushishe, abafikile kufumankana n’etu, mpaa na ku kisalwe kia Apio na ku mashibo asatu alalā benyi; Paulu habebamwene, batumbwile Efile Mukulu, banyishishe eshimba.

¹⁶Hatubat’ikile ku Loma, mulami a basalai lukama balubwile misungi kwi kimankinda kia kitudilo kia mahema, anka Paulu balekyelwe kushala buhenka, na musalai a kumulama.

¹⁷Bitabibakitshine, hakukila mafuku asatu, Paulu baitamine bakata ba Bena Yuda hamune: biabia habafikile hamune, bebalungwile’shi: Anwe bakwetu, sunga ntshi musole mwanda ku bantu, sunga nku bihikwa bia bashyetu-kulu, ami nalubulwa bu musungi aufiki ku Yelusalema mu māsa a Bena Loma.

¹⁸Abo, habantompele, abadia kumposola, mwanda tambamone mwanda kwandji umpwandjikile lufu.

¹⁹Anka habahele Bena Yuda biabia, nakambilwe naloba kwi Kesala; kushī ha mwanda unadi n’au wa kuteula mwīlo wande, ooo.

²⁰Binyibiabia nyi mpa uno mwanda unenwitanyina, mwanda wa kwinutala na kwakula n’enu; nyi ha mwanda wa lutengyelo lwa Isalele, nyi mwanyibwe na luno lukano.

²¹Abo abamwalulwile’shi: Atwe tatwibatamibule mikanda ayifiki mu Yudea ha mwanda wobe, sunga a mukwetu umune āba bafikile, balesheshe sunga nkukwakwila mukandu wibubi.

²²Anka atukyebe kuhusha k’odi biotentekyesha, mwanda ha buno bulondji atwiuku kosokoso abwakwilwa bibubi.

²³Binyibiabia habamusangwidile efuku, kubafikile bebungi kwadi, e bebahatulwidile na kwibalungula bu kamonyi ka bufumu bw’Efile Mukulu, na kwibakonkwela ha mwanda wa Yesu, ku namashika, mpaa na ku kiolwa, mu mukanda-wa-bishila bia Mosesa na mu a Batemuki.

²⁴Bamo abakuminyine myanda yibakwilwe, bangi tambeikutnine.

²⁵Habakutshilwe kulombana munkatshi mwabo, abakatukile, anka Paulu bebalungwile mwanda umune’shi: Kikudi-E-Selelee bākwile biya mu mutemuki Esaiye kwi bashyetu-kulu’shi:

²⁶Ndai kwi bano bantu, nwakule’shi: Kuhusha anukahusha, Anka tanukeuku, Kumona namu anukamona, Anka tanukashingula.

²⁷Mwanda mashimba a bano bantu angakundakane, Matwi abo n’amu e bu ashikile, Na meso abo mbealiute, Tala bakamona na meso abo, Na kuhusha na matwi, Na kushingula na mashimba, Na kwikala bululukye ku mashimba, N’ami nkebahashe.

²⁸Binyibiabia nwikale beukye’shi: Kihandjilo ki’Efile Mukulu nkitumibwa kwi Badjentaila, n’abo abakekihusha.

²⁹Habahwile kwakula yino myanda, Bena Yuda abakatukile, abadi na mpaka yi moo munkatshi mw’abo bana bene.

³⁰Binyibiabia Paulu babombelele bihwa bibidi bishima mu nshibo ye yibadi afutu, bakuminyine boso abadi abafiki kwadi mwanka.

³¹Badi alungula mwanda wa bufumu bw’Efile Mukulu, na kulambukisha yinyi myanda ayinemena kwi Nfumwetu Yesu Kidisitu, na kiana kioso, takubadi muntu amulekyesha.