Read songe Bikitshino 3 Bible Online

Bikitshino 3 - songe bible

Bikitshino 3

¹Henyihaha Petelo na Yoano abadi abakamina mu ntempelo ha nsa ya kuteka, yinyi nsa nyingisatu ya kiolwa.

²Kubadi muntu kishete kasha batandjilwe munda mwa nyin’e, abadi abamutulu kwifuku n’efuku ku kibelo kia ntempelo, akitemunwa bu Kibuwa, atekye biabuntu kwi abatwele mu ntempelo;

³E hakumona Petelo na Yoano tabadi abatwele mu ntempelo, bebatekyele biabuntu.

⁴Petelo, habamutale swee na Yoano hamune, bamulungwile’shi: Etutale.

⁵E batele eshimba na kutengyela’shi, nankatambula kintu kwabadi.

⁶Binyibiabia Petelo bakwile’shi: Mpata na nfalanga ya nsahabu nki n’ayo, ooo, anka kino kiandji n’akio, nankuha’kio. Mwishina dia Yesu Kidisitu a ku Nasaleta, ebwe, otambukye.

⁷Biabia bamukwatshile kwiasa die dibalume, amwimika. Henyihaha kahindji n’aka ngwa na tuhulu twe bibanyingile,

⁸N’e batambukile kwiilu, bemene, tatambuka, batwēle n’abo mu ntempelo, kwete kutambuka na kutumbuka, na kutumbisha Efile Mukulu.

⁹Bantu boso abamumwene kwete kutambuka na kutumbisha Efile Mukulu.

¹⁰Abeukile namu’shi, nyi winyi badi ashāla ku kibelo kibuwa kia ntempelo; abakanyine bikata na kuhūla ha mwanda wa kibamukitshinwe.

¹¹Kishete habadi mulamate kwi Petelo na Yoano, bantu boso abekongyele hamune lubilo kwabadi mu kishikamino akitemunwa bu kia Nsolomone, bakwete kukanya.

¹²Petelo habamwene biabia, bālulwile kwi bantu’shi: Anwe Bena Isalele, a nkinyi kianukanya kino? A nkinyi namu kianwitubandjila mbu kwamba’shi, tubatambusha uno muntu ku bukome bwetu bu na mwinyi, su ku bwin’Efile Mukulu bwetu?

¹³Efile Mukulu a Abalahama n’ā Isaka, n’ā Yakoba, Efile Mukulu a bashyetu batumbishe Mwan’e Yesu; winyi anubatule ku kimu, nubamutūne namu ku mpala kwa Pilata, habadi n’eshimba dia kumuhosola.

¹⁴Ank’anwe nubatūne winyi Muhatulukye-E-Kishila, Mululame, nubatekyele namu ntomboshe kwinuhēbwa;

¹⁵Nubehayile Muhangi a muwa, winyi abasangwile ku lufu kw’Efile Mukulu; ha uno mwanda, twi bu tumonyi.

¹⁶Nyi lukumino lwa mwishina die lubanyisha uno muntu bukome, anumumono na meso, nakumwiuka: ee, nyi lukumino lwi kwadi lubamuha buno bukome bukumbane ku meso kw’anwe boso.

¹⁷Binobino bakwetu, neuku’shi, nyi ha mwanda wa luhatamino nubakitshine biabia, na bamunyi benu hamune.

¹⁸Anka yino myanda yibalesheshe Efile Mukulu kwibedi mu kanwa mwa batemuki be, eshi: Kidisitu akekufwambuka e beyikumbasha.

¹⁹Binyibiabia nwilangei ’mashimba, nwikale bālulwe’shi, milwisho yenu yishimangishwe, biabia akukafiki kwi Yehowa bihindji bia kukankamana kwishimba.

²⁰E akatumu Yesu Kidisitu, winyi badi mulungulwe kwanudi kwibedi.

²¹Nkihwandjikile mwiilu kumutambula mpaa na ku bihindji bia kulumbula kwa bintu bioso, bibakwile Efile Mukulu ku kanwa kwa batemuki be bahatulwe-be-kishila, kasha babangile hanohansenga.

²²Binbibinyi Mosesa bakwile kwi bayaiya’shi: Yehowa Efile Mukulu enu, akenwiboshesha mutemuki a ku bakwenu, anka hamune bu’mi, e nukamwifwakene mu myanda yoso yiakenulungula, su nkinyi su nkinyi.

²³Akukekala’shi, su nanyi, su nanyi shyakefwakena yawa mutemuki akalwishibwa munkatshi mwa bantu.

²⁴Binyi binyi batemuki boso, kubanga ku Samwele, mpaa na kwi-ba abamulondele kumongo, baba abadi abākula, abatemukile hamune ha myanda y’ano mafuku.

²⁵Anwe nwi bana ba batemuki, na ba kihwano kibakitshine Efile Mukulu na banshyenu-kulu, habākwile kwi Abalahama’shi: Mu kekulu kobe bifuko bioso bia hanohansenga abikēlwa mwabi.

²⁶Efile Mukulu hakwibosha mufubi e Yesu, bamutumine kwanudi kwibedi mu kwinuha mwabi wa kwinwalula’nwe boso ku bubi.