Read songe Bikitshino 4 Bible Online

Bikitshino 4 - songe bible

Bikitshino 4

¹Habadi abākula kwi bantu, batshiite-bakwidi na kimankinda kia mu ntempelo, na Basadusea abafikile kwabadi.

²Abadi na kinfwa ha mwanda abadi abalambukisha bantu, na kwibalungula’shi: Mwi Yesu mwi lusangukilo lwa bafwe ku lufu.

³Abebakwete, abebatudile mu nshibo ya mashika, mpaa na habubatokyele; mwanda nguba tabadi hehi kuhona.

⁴Anka bebungi b’aba abahushishe mwanda w’Efile Mukulu abakuminyine: bungi bwa bana-balume bubadi bu binunu bitano.

⁵Bitabibakitshine h’efuku dia maloba, batontshi babo, na bakulu, na bafundji-ba-mikanda,

⁶na Anasa tshiite-mwakwidi mukata, na Kaifasa, na Yoano, na Alekasanda, na boso ba ku kifuko kia tshiite-mwakwidi mukata abadi bekoñene mu Yelusalema.

⁷Hābebatūle munkatshi, abebehwishe’shi: Anubakitshi kino na bukome kinyi, su mwishina di’anyi?

⁸Binyibiabia Petelo, muule nda na Kikudi-E-Selelee bebalungwile’shi: Anwe batonsthi ba bantu, na bakulu ba Isalele:

⁹Lelo uno su’twe behushibwe ha mwanda wibuwa ubakitshinwe kwi muntu mulemane’shi, ebahashibwa na minyi;

¹⁰Nwiukye uno anwe boso, na bantu boso ba Isalele’shi, nyi mwishina dia Yesu Kidisitu a ku Nasaleta anubabambile ku mutshi uhingishene, winyi ababushishe kw’Efile Mukulu ku lufu, nyi anka kwadi e uno muntu mwimane ku mpala kwenu na bukome.

¹¹E nyi’bwe dibabendelwe n’anwe bebaki, dinyi nyi dibekala mutwe w’ehaka.

¹²Sunga mu dingi tamwi kihandjilo, ooo; mwanda tamwi dingi eshina mushi mwiilu dibahebwa munkatshi mwa bantu diatukahandjila.

¹³Binyibiabia habamwene eshimba di hoo dia Petelo na Yoano, na hakushingula’shi, mbahatamine, tabeuku mikanda, abakanyine, abebashingulwile’shi, abadi na Yesu.

¹⁴Na hakumona muntu badi muhashibwe mwimane n’abo, abakutshilwe bia kwakula.

¹⁵Anka habebalungwile kwishesha ku kimu, abesambile munkatshi mwabo, abo bana bene’shi:

¹⁶Atukitshi bi kunyi kwi bano bantu? Mwanda binyibinyi kilengyeleshi ki moo kibakitshinwe kwabadi kibamwekyelwe kwi boso ababombela mu Yelusalema; n’atwe tatwiuku kwikituna.

¹⁷Anka tunyishe kwibadimuna’shi, balekye kwakula dimonyi mu dino eshina sunga kwi muntu umune, tala wakahalakana munkatshi mwa bantu.

¹⁸Biabia abebetanyine, abebakamikidile’shi: Tanukumanga kwakula, sunga kulambukisha mwishina dia Yesu.

¹⁹Anka Petelona Yoano bebālulwile’shi: Nusangule su nkikile buwa ku mpalakw’Efile Mukulu kwinwifwaken’anwe su Efile Mukulu.

²⁰Mwanda tatwiuku kwakula yingi, anka yaya yiatubamwene na kwihusha.

²¹Binyibiabia habebadimwine dimonyi abebahoswele ha mwanda wa bantu, mwanda tabamone bia kwibamwesha malwa; mwanda bantuboso abadi abatumbisha Efile Mukulu ha mwanda w’akia kibakitshinwe.

²²Winyi muntu habadi mukitshibwe kino kitundwilo kia kuhashibwa, tabadi mukishe bihwa makumi ananka.

²³Na hakwangudibwa, abayile ku kibumbu kiabo, abebalubwidile yoso yabebalungwile kwi batshiite bakwidi bakata na bakulu.

²⁴N’abo habahushishe biabia, abanyishishe mayi abo n’eshimba dimune kw’Efile Mukulu’shi: A Mwanana, obe Efile Mukulu bahangile eilu na nsenga na kalunga ka mema, na bioso bi mwanka,

²⁵Obe bōkwile mukanwa mwa mufubi obe Dafidi’shi: A Badjentaila abafune na nsunga, Na bantu abele binangu bia myanda ya bisumanga na minyi?

²⁶Bafumu ba hanohansenga abebwēle, Na batontshi abekongyele Yehowa na Kidisitu e kumudila lukuku.

²⁷Mbinyibinyi mu kino kibalo Heloda na Ponteuse Pilato, na Bena Isalele abekoñene hamune na Badjentaila kubwela na mwan’obe Yesu muhatulwe-a-kishila winyi, ōbe oboshingile mwimu wa bufumu.

²⁸Mu kukita yoso yibasangwile eyasa diobe na binangu biobe kwibedi’shi: yikitshibwe.

²⁹Binobino, obe, Yehowa tala kulaa kwabo, banda kwituha atwe, bafubi bobe mwa kwakwila mwanda wobe na mashimba a nyingye.

³⁰Mu kōla eyasa diobe dia kuhasha bantu na bitundwilo na bia kukanya bikitshibwe mwishina dia mwan’obe muhatulwe-a-kishila Yesu.

³¹Henyihaha habādi abatekye Efile Mukula, amwa mwābadi bakumbene hamune mubasushile, boso bwabo abadi baule ndā na Kikudi-E-Sele-lee, abakwile mwanda w’Efile Mukulu na kunyinga kushī na moo.

³²Kibumbu ki’ aba abadi bakumine kibadi na mashimba amune, na muwa wabo umune: takubadi sunga ngumune amba’shi: Yino mono ngiande anka’mi na mwinyi, ooo; yibadi yabo abo boso.

³³Biabia batumibwa abadi na bukome bukata bwa kulungula mwanda wa lusangukilo lwa Nfumwetu Yesu; na bumuntu bwimoo bubadi habadi boso.

³⁴Munkatshi mwabo takubadi sung’umune balobeshe bintu; mwanda wa baba abadi basha nsenga, su basha mashibo, abebihene, abafwishishe miulo ya bintu biabahanyine.

³⁵Abeyitule ku ngwa ya batumibwa; abeyiabene muntu ye muntu ye mulombene muntu na lukalo lwe, muntu na lukalo lwe.

³⁶Na Yosefe, baudikilwe kwi batumibwa bu Banabasa, (kuhatula nyi nkwambashi, Mwan’a Kisengyelo) mwina Lewi, a ku nsenga ya Saihulusa.

³⁷Ha kwikala n’efuba, bedihene, bafwishishe mono, beyitudile ku ngwa ya batumibwa.