Read songe Bikitshino 5 Bible Online

Bikitshino 5 - songe bible

Bikitshino 5

¹Anka kubadi muntu eshina die bu Ananaisa na mpian’e Safaila, abahene kintu kiabadi n’akio,

²abafile kihindji kia mulo, mpian’e badi mwiūkye, bafwishishe kingi kihindji, bekitudile ku ngwa ya batumibwa.

³Anka Petelo bakwile’ shi: A Ananaisa, a nkinji Satana bausha eshimba diobe kudimba Kikudi-E-Selelee, na kufia kingi kihindji kia mulo w’efuba?

⁴Hadibadi kwanka, tadibadi bu diobe be? na hobohu kwidihana tadikalanga’nka mwamuleyebela eshimba diobe be? A nkinyi kibokumina uno mwanda kwikala mwishimba diobe? twemudimbe bantu’be nyi Efile Mukulu.

⁵Biabia Ananaisa hakuhusha bino bishima, bahonene hashi, afwididila; abahushishe yino myanda abakwetwe na moo ukata.

⁶Basongwalume abebwele bamwanya, bamutwala, batuka n’e hasha mu kumushika.

⁷Habakile kihindji su mbu nsa yisatu, mpian’e namu batwelele, tamwiukye kibakitshinwe.

⁸Petelo bamwihwishe’ shi: Ndungule su nubahene nsenga ku mulo ukampanda? E bamwalulwile’shi: Ee, anka ku biabia.

⁹Henyihaha Petelo bamwambile’shi: A nkinyi kianubalombana hamune kutompa Kikudi kia Yehowa? Tala, ngwa yiabashikanga mulunda obe ngia yi ha kibelo, ayikakutwala, yitukye n’obe hasha.

¹⁰Binyibiabia bahonen’anka hanka ku ngwa ye, afwididila: biabia basongwalume abatwelele, bamusañene mufwe, abatukile n’e, bakamushika hehi na mulunda e.

¹¹Binyibaibia kikoñeno kioso ki’Efile Mukulu kibakwatshilwe na moo ukata, na kwi bangi abahushishe yino myanda namu.

¹²Na ku māsa a batumibwa kubakitshinwe bitundwilo, na bia kukanya bibungi munkatshi mwa bantu, (n’abo boso abadi n’eshimba dimune mu kishikamino kia Solomone.

¹³Biabia bangi tambakume kwisoba kwabadi, ooo, anka bantu abebatumbishe.

¹⁴Na bakumine abakile kufwimishwa kwi Nfumwetu, bibumbu na bibumbu bia balume na bia bakashi.)

¹⁵Nyi hābafishishe bambabashi ba masungu mu misee, bebaladisha ha nsala na ha mambata’shi, sunga mwesheshi wa Petelo, ha kukila su mbiaudia kubwikila bamo b’abo.

¹⁶Ku Yelusalema kubafikile namu kibumbu kia mu bibalo bibadi ’makunkula, kikwete kufisha bambabashi, n’aba abadi bakwatwe na bikudi bibutete, abahwishishwe abo boso.

¹⁷Henyihaha tshiite-mwakwidi badi hanundu ha bakwabo bebwele, na boso babadi n’e (abadi ba ku luhese lwa Basadusea) abakwetwe na nsungu,

¹⁸abakwete batumibwa, bakebatwesha mu nshibo ya lukano yiabatulā bantu boso.

¹⁹Anka bufuku mwikeilu a Yehowa bashitwile bibi bia ku nshibo ya lukano, bebatushishe hasha’shi:

²⁰Ndai, nukemane mu ntempelo, nukalungule bantu boso bishima bioso bia uno muwa.

²¹Abo hakuhusha biabia, abatwele mu ntempelo na mashik’ēse bwee, tabalambukisha; anka tshiite-mwakwidi e hanundu ha bakwabo, bafikile n’aba badi n’e, bakongyele kikoñeno kia kimu na bakulu boso ba ku bena Isalele, batumine muntu ku nshibo ya lukano kwibafishe.

²²Anka habafikile tuhalai tambebahete mu nshibo ya lukano, abālukile, bakebalungula’shi:

²³Tubasañana nshibo ya lukano ngifungibwe anka hoo, na bansamo namu abadi bemane ku kibelo; anka hakwibishitula tubasangana mwi bisumanga, sunga ngumune.

²⁴Binyibiabia tshiitemwakwidi e hanundu ha bakwabo, na kahitene ka mu ntempelo, na batshiite-bakwidi bakata, habahushishe yino myanda, mashimba’bo abadi akalakala munda su uno mwanda aukekwikala na minyi.

²⁵Henyihaha umune bafikile, bebalungwile’shi: Talangai, benyi bantu benubatwesheshe mu nshibo ya lukano, mbaba bemane mu ntempelo, bakwete kulambukisha bantu.

²⁶Binyibiabia kahitene bayile na tuhalai mu kwibafisha, kushī ha bukoho; mwanda abatshinyi bantu’shi, tala betuasa mabwe.

²⁷Habahwile kwibafisha, bebatudile ku mpala kwa kimu. Biabia tshiitemwakwidi e hanundu ha bakwabo bebehwishe’shi:

²⁸A tatwibenukamikye’shi; tunukalambukishanga mu dino eshina, talangai, nubausha Yelusalema ese na lulambukisho lwenu, anukimbi namu mwakwitufishisha mase a uno muntu kwatudi.

²⁹Henyihaha Petelo na batumibwa abālulwile’shi: watudi n’ao ngwa kukokyela Efile Mukulu he kwi bantu.

³⁰Efile Mukulu a bashyetu-kulu babushishe Yesu anubabambile ha mutshi uhingishene.

³¹E Mwanabuwa, na bu Muhashi, Efile Mukulu bamukamishe ku mboko yibalume ye, ha mwanda wakuhabena Isalele lwilango lwa mashimba na lulekyelo lwa milwisho.

³²N’atwe twi tumonyī’twe twa yino myanda; na Kikudi-E-Selelee hamune, nyi Efile Mukulu bamuhele’ba abamukokyela.

³³Habahushishe uno, abatahilwe ku mashimba, abebadidile lukūku lwa kwibeha.

³⁴Henyihaha kubebwele umune a mu kimu, Mufadisea, eshina die mbu Ngamadiele, mulambukishi a bishila, badi munemekwe munkatshi mwabantu boso, bakamikile’shi: Batumibwa batushibwe kihindji kihela.

³⁵Bebalungwile’shi: Anwe Bena Isalele, dimukai anwe bana bene mwanukyebe kukitshina ha mwanda wa bano bantu.

³⁶Mwanda kwibedi ano mafuku kubebwele Teudasa, badi mwinemekyeshe: Nyi muntu mukata; kwadi, kibumbu kia bantu, bu nkama yinanka kibafumankene; bayihayilwe, na bantu boso abadi bamukokyele abahalakeshwe na kufishwa bu bisumanga.

³⁷Ku nyima kwa uno muntu kubwebwele Yudasa a ku Ngadilea, mu mafuku a lubadiko lwa bantu, e bōngwele bantu be bungi ba kumulonda; e namu bayihayilwe na boso, abadi bamukokyele abahalakene.

³⁸Binobino nenulungula’shi: Katukai ku bano bantu, tanwibakitanga kintu, mwanda su kano kalolo na uno mufubo mbia bantu, biabia abikafiki bu bisumanga.

³⁹Anka su mbi’Efile Mukulu, anwe tanukamono mwa kwibihonesha, tala hangi nwakasañanwa bu abalua ngoshi n’Efile Mukulu.

⁴⁰Biabia abamukuminyine; henyihaha habaitanyinwe batumibwa, na kwibakuhila, abebakamikile’shi: Tanukākulanga dimo mwishina dia Yesu; abebahoswele.

⁴¹Biabia abakatukile ku mpala kwa kimu bakwete kusehela’shi: Twibahwandjikile kumona būfu ha mwanda w’eshina die.

⁴²Biabia abo, kwifuku n’efuku mu ntempelo na mu mashibo oso, tambalekye kulambukisha na kulungula ya Yesu’shi, e nyi Kidisitu.