Read songe Bikitshino 7 Bible Online

Bikitshino 7 - songe bible

Bikitshino 7

¹Henyihaha tshiite-mwakwidi e hanundu ha bakwabo baihwishe’shi: Yino myanda ngia binyibinyi?

²Bamwambile’shi: Anwe bakwetu balume na bayaiya, hushai: Winyi Efile Mukulu a ntumbo bamwekyele kwi nshyetu-kulu Abalahama habadi mu Mesopotamie, kwibedi kwa kubombela mu Halana,

³bamulungwile’shi: Katuka mu nsenga yobe, na ku kifuko kiobe, wēnde ku nsenga yiankakulesha.

⁴Henyihaha bakatukile mu nsenga ya Bena Kaladea, babombele mu Halana: habahwile nshye, Efile Mukulu bamufilwile kwanka, amutula mu yino nsenga yanudi bashale binobino:

⁵E tamuhe mwanka buhyanyi, sunga mpa kwashina ngwa ye, anka bamulayile habadi te na mwana’shi: Nankakuha’yo ta ngiobeyobe na kwi twikulu tobe twatukekulonda.

⁶N’Efile Mukulu bakwile bino’shi: Tunkwatamanwi tobe twanakabombele mu nsenga ya mwinyi; banaketufishe mbuhika, na kwitumwesha malwa bihwa nkama yinanka.

⁷Ku wawa mwilo aukebamunu buhika, ami nakeutshibila kimu, bibākwile Efile Mukulu: kumongo kwa’bio abakakatuka, banfubile mu kino kihindji.

⁸Efile Mukulu bamuhele kilombeno kia kisale; biabia Abalahama batandjile Isaka, bamusale h’efuku dia mwanda; Isaka namu batandjile Yakoba; na Yakoba batandjile banshyetu-kulu b’ekumi na babidi.

⁹Benyi banshyetu-kulu abakwatshile Yosefe kiutu, bamuhana mw’Edjihitu; n’Efile Mukulu badi n’e.

¹⁰Bamwabwile mu bishiotshi bie bioso, amuha mwabi na binangu ku mpala kwa Falo, nfumu a Edjihitu: e bamutentekyele kwikala bu mutonishi-mukata-e-hanundu ha boso mu nsenga y’Edjihitu, na hanundu ha ba mu kihanga kie.

¹¹Henyihaha kihuha kia nsala kibafikile ku nsenga yoso y’Edjihitu na ya Kanana, na malwa e moo; banshyetu-kulu tabadi abamono biakudia.

¹²Anka habaifwakene Yakoba’shi: Ngano yi mw’Edjihitu; batumine banshyetu-kulu kihindji kia kwibedi;

¹³na ha kia kabidi Yosefe beukishe kwi bakwabo; na kifuko kia Yosefe kibeukilwe kwi Falo.

¹⁴Henyihaha Yosefe batumine ba kwitanyina nshye Yakoba, na kifuko kie kioso, bantu makumi musambobidi na batano.

¹⁵Biabia Yakoba bayikile mw’Edjihitu, e bafwile, na banshyetu-kulu;

¹⁶n’abo abatwelwe mpaa na leu Shekema, abaladishwe mu kilele kibaule Abalahama ku mulo wa nfalanga kubana ba Hamola mu Shekema.

¹⁷Anka mwanda kihindji kia mulayilo kibefubwile hehi kiabalayile Abalahama kw’Efile Mukulu, bantu abakule na kufwimia mw’Edjihitu;

¹⁸mpaa n’ahakubebwele mungi nfumu lianundu h’Edjihitu, shī mwiukye Yosefe.

¹⁹E winyi bakitshine ya bulamalama na kifuko kietu, bamwesheshe banshyetu-kulu malwa’shi, basumbule bana babo bandekye’shi, bafwe.

²⁰Haha nyi ha kino kihindji kibatandjilwe Mosesa, badi mwana mushalame, baledibwe mu nshibo ya nshye mieshi yisatu;

²¹habadi musumbulwe hasha, mwan’a Falo mukashi bamusangwile, amulela bu mwan’e na mwinyi.

²²Mosesa badi mulambukishwe na kalolo koso ka Bena Edjihitu, badi na bukome mu bishima bie na bikitshino.

²³Habadi mufishe bihwa hehi bu makumi ananka, mwanda ubafikile mwishimba die kutembela bakwabo Bena Isalele.

²⁴Habamwene umune abo bamweshwa malwa, bamulamwinyine na kōbwela yawa amweshwanga malwa nakwiha mwina Edjihitu:

²⁵Mwanda e badi atentekyesha’shi: bakwetu beukye’shi, Efile Mukulu akebahasha kwiyasa diande; ank’abo tambeukye.

²⁶Binyibiabia h’efuku dibalondele e na mwinyi belesheshe kwabadi hābādi abula ngoshi, badi akyebe kwibasungwa, bebambile’shi: A balumiana, anwe nwi bantu bamune, a kianwitombokyeshena nkinyi?

²⁷A nka yawa badi kwet’akitshi mukwabo bibi bamuhele elundu’shi: A bakutulu bu mutontshi na bu mulumbudi etu nanyi?

²⁸Okyebe kunyihā bu bioyihayile mwina Edjihitu maloba su?

²⁹Henyihaha Mosesa basukile ha uno mwanda, bakekele bu mwenyi mu nsenga ya Midiana, mubatandjile bana balume babidi.

³⁰Habakile bihwa makumi ananka, kubamumwekyele mwikeilu mu kabāka ka ngulu ya Sinai, mwidimi dia kālo mwibūla.

³¹Mosesa habamwene biabia bakanyine kiakia kimonwa: habefubwile hehi kubandjila, kubafikile eyi dia Yehowa’shi:

³²Ami nyi Efile Mukulu a banshobe-kulu, Efile Mukulu a Abalahama, n’a Isaka, n’a Yakoba. Binyibiabia Mosesa basushile moo, tamukume’nyi kubandjila.

³³Henyihaha Yehowa bamulungwile’shi: Kasha bilata bi ku ngwa yobe, mwanda hantu hodi mwimane mpahatulwe-he-kishila.

³⁴Nahu kumona binyibinyi malwa a bantu bande be mw’Edjihitu, nahu kwifwakana mitompolo yabo, nafiki mu kwibahasha; fika binobino nkutume kw’Edjihitu.

³⁵Uno Mosesa ababatune’shi: Abakutulu bu mutontshi na bu mulumbudi nanyi? anka winyi e, nyi abatumine kw’Efile Mukulu’shi: ekale bu mutontshi na bu mukudi ku mboko ya winyi mwikeilu bamwekyele kwadi mwibūla.

³⁶Uno muntu bebatushishe habahwile kukita yakukanya na bitundwilo mu nsenga y’Edjihitu, na ha diadi’Eshiba dimonga, na mu kabāka bihwa makumi ananka.

³⁷Uno n’e winyi Mosesa bākwile kwi Bena Isalele’shi Efile Mukulu anakenubushishe Mutemuki munkatshi mwa bakwenu, hamunenka n’ami; nwimwihushe.

³⁸Uno nyi badi mwikale mu kikoñeno ki’Efile mu kabāka na mwikeilu, winyi bākwile n’e na banshyetukulu mu ngulu ya Sinai. E nyi batambwile bishima bia muwa kwituha’twe.

³⁹E winyi banshyetukulu tambamukokyele, ooo, anka abamubingile kwabadi, na mu mashimba’bo aba’lukile kw’Edjihitu.

⁴⁰Na kwakula kwi Alona’shi: Etukitshine b’efile ba kwitubadidila ku mpala kwetu; mwanda winyi Mosesa betutushishe ku nsenga y’Edjihitu, tatwiuku kibamukitshi,

⁴¹Biabia mu aa mafuku abakitshine kana ka ñombe, abalambwile kitahilo ku winyi nkishi; tabasehela mu mifubo ya maas’abo bana bene.

⁴²Binyibiabia Efile Mukulu bebafutalele, bebahene mu kulangwila kibumbu kia bi mwiilu; bu kibafundjibwe mu mukanda wa batemuki’shi: Anwe ba ku nshibo ya Isalele nubandangudile na nyama yitahwe. Na bitahilo mu kabāka bihwa makumi ananka su?

⁴³Ee, nubātshile nshibo y’ehema dia Moleke, Na luenyenyi lwa nkishi enu Lefana; Bihwandjikisho bianubakitshine bia kulangwila, N’ami nankenukasha alwa luhese lwa Babelona.

⁴⁴Banshyetu-kulu badi na kibombelelo kia bulungudi mu kabāka, anka mwabasangudile winyi bākwile kwi Mosesa’shi: Wekikite anka mwakidi kikele kihwandjikisho kibomono.

⁴⁵Kinyi’kio banshyetu-kulu abalondele abafishishwe na Yoshua, habatweleleha buheta bwa Badjentaila, abadi abenda ababingwanga n’Efile Mukulu kumpala kwa banshyetukulu, mpaa na ku mafuku a Dafidi.

⁴⁶Abatambwile bumuntu ku mpala kw’efile Mukulu, badi atekye’shi: ’Mone hakubombela ha mwanda w’Efile Mukulu a Yakoba.

⁴⁷Anka Solomone bamwibakile nshibo.

⁴⁸Anka winyi Mukilekile bukata tabombelā mu mashibo akitshibwe na maasa, ooo, anka mubakudile mutemuki’shi:

⁴⁹Yehowa’shi: Eilu nyi luhun’a nsulu lwande, Na nsenga yi kitūlo kia ngwa yande, A nkihaso kia nshibo kinyi yianukanyibakila? Na mbalo kinyi yiankeikīsha’mi?

⁵⁰A t’eyasa diande dibakitshine bino bintu bioso’bi?

⁵¹Anwe basha nkomonga, bashi basalwe ’mashimba na matwi, anukingīla Kikudi-E-Selelee kihindji kioso, anka mubakitshinyine banshyenu-kulu, anwe namu anukitshi.

⁵²A mutemuki kinyi shi musabulwe na banshyenu-kulu? n’abayihayile’ba ababadidile kulesha kufika kw’awa Mululame; winyi anubālulukīle tanudi bu basha kihuko na bantomboshi;

⁵³Anwe nubatambwile mukanda-wa-bishila ku bulumbudi bwa bamwikeilu, anka tanwibeulame, ooo.

⁵⁴Habahushishe yino myanda abatahilw’e ’mashimba, bamudila mayoo.

⁵⁵Ank’e muule ndaa na Kikudi-E-Selelee, batale mwiilu swee, bamwene ntumbo y’Efile Mukulu, na Yesu mwimane ku mboko yibalume y’Efile Mukulu.

⁵⁶Bambile’shi: Talangai, namono mailu abashituka na Mwan’a Muntu mwimane ku mboko yibalume y’Efile Mukulu.

⁵⁷Henyihaha abele bila na mayi akata, abashikile matwi abo, abamwihukile boso n’eshimba dimune.

⁵⁸Biabia abamuhātwile hasha ha kibalo, bamwasa mabwe, tumonyi tubatudile mitwelo yabo ku ngwa ya nsongwalume, eshina die bu Saulu.

⁵⁹Henyihaha abashile Setafane mabwe, habadi kwete kusendela’shi: Obe Nfumwami Yesu, tambula kikudi kiande.

⁶⁰Henyihaha bakunamine, banyishish’eyi dikata’shi: Obe Nfumwami, tokebafishanga mu kimu ha uno mwanda; biabia habahwile kwakula bino, bahone mu tulo twa lufu.