Read songe Bikitshino 8 Bible Online

Bikitshino 8 - songe bible

Bikitshino 8

¹Saulu badi mukumine ha lufu lwe. Ha kiakia kihindji kubebwele kubingwabingwa kwi mooku kikoñeno ki’Efile kibadi mu Yelusalema. Abadi bahalakashwe kosokoso ku mpese yoso ya Yudea na Samadia, anka batumibwa abashele.

²Basha mudingo abashikile kitanda kia Setefane, abamudile mu mashimba bikata.

³Anka Saulu basalakene kikoñeno ki’Efile, badi kwete kutwela mu mashibo oso na kukaka balume na bakashi, na kwibēla mu nshibo ya lukano.

⁴Binyibiabia baba abahalakeshwe abayile kosokoso mu kulungula mwanda w’Efile Mukulu.

⁵Henyihaha Fidiha balalele ku kibalo kia Samadia, bebalungwile mwanda wa Kidisitu.

⁶Bantu abatēle mashimba’bo n’eshimba dimune kwi yaya myanda yibākwile Fidiha, habahushishe na kumona bitundwilo bibakitshine.

⁷Mwanda bikudi bibi bibadi mu bantu bebungi bibatukile, tabiele musase n’eyi dikata, na bebungi abadi na busungu bwa kususa, na balemane abadi abahashibwe.

⁸Mu’kia kibalo mubadi muloo ukata.

⁹Anka mubadi muntu eshina die bu Shimona, badi akitshi kala malenanyi a masende, na kukanyisha bantu ba Samadia, etemuna’shi: Ami nyi mukata.

¹⁰Boso abadi batē mashimba’bo kwadi, kubangile kwi mukile buhela, mpaa na kwi mukile bukata; abo’shi: Uno muntu nyi bukome bw’Efile Mukulu bukata.

¹¹Kwadi e nyi kwabadi batē mashimba ha mwanda bebalengulanga na masende kihindji kikata.

¹²Anka hābakuminyine Fidiha badi alungula mukāndu-wibuwa wa Bufumu bw’Efile Mukulu n’eshina dia Yesu Kidisitu, balume na bakashi ababatshishwe ’mema.

¹³Henyihaha Shimona e na mwinyi bakuminyine namu; hababatshishwe, baikadidile na Fidiha, baka’nyine, bibadi kwete kumona bilengeleshi bikata na bitundwilo bibakitshine.

¹⁴Anka batumibwa abadi ku Yelusalema, habahushishe’shi mu Samadia abahu kutambula Mwanda w’Efile Mukulu, abebatumine Petelo na Yoano.

¹⁵Abo habālalele kwanka, abebatekyele’shi, batambule Kikudi-E-Selelee:

¹⁶Mwanda tabadi mubande kuhona habadi sunga mpa umune; anka babadi babatshishibwe mwishina dia Nfumwetu Yesu.

¹⁷Henyihaha abebatentekele maasa’bo batambula Kikudi-E-Selelee.

¹⁸Biabia Shimona habamwene’shi, mu kutenteka kwa maasa kwa batumibwa Kikudi-E-Selelee bahebwa, bebatambikile nfalanga’shi:

¹⁹Mpei buno bukome namu’shi, kw’ese ankatenteka maasa, atambule Kikudi-E-Selelee.

²⁰Anka Petelo bamulungwile’shi: Mono yobe yilwile n’obe, mwanda botentekyesha’shi, buntu bw’efile Mukulu abūlwa ku mono.

²¹Twe na sunga kihindji kihela kiakuhebwa kantu ka mu uno mwanda, mwanda eshimba diobe tandjilulame ku meso kw’Efile Mukulu.

²²Binyibiabia welangye mwishimba ku buno bubi b’obe, otekye Efile Mukulu su akakulekyela myanda yiohwandjikisha mwishimba diobe.

²³Mwanda nakutundula biodi mwalulukye bu ndulumutshi na kwanyibwa mu bubi.

²⁴Henyihaha Shimona bālulwile’shi: Ntekyelei’nwe kwi Nfumwenu tala sunga nkimune kia biabia bianubākula kiakafika kwandji.

²⁵Binyibiabia habahudisha kwakula bu kamonyi na kulungula Mwanda w’Efile Mukulu, abālukile ku Yelusalema, tabalungula mukāndu-wibuwa ku bibalo bibungi bia Bena Samadia.

²⁶Anka mwikeilu a Yehowa bākwile kwi Fidiha’shi: Ebwe, wende ku luhese lwa Sude, mpaa na kwishinda adiende ku Yelusalema na ku Ngasa. Alo ndwa kabāka.

²⁷Biabia bebwele, enda, talanga, muntu mutungulwe, mwina Ethiopia, sha matalwa e moo, badi kunyima kwa Kandase nfumu mukashi a Bena Ethiopia, badi na bulami bwa mono ye yoso yineme; badi mufikye ku Yelusalema mu kulangwila.

²⁸Habadi kwete kwaluka, e mushale mu ngalafwanda, badi kwete kubala mukanda wa Esaiye mutemuki.

²⁹Henyihaha Kikudi-E-Selelee bambile Fidiha’shi: Efubuile hehi, olamate ku uno ngalafwanda.

³⁰Biabia Fidiha bakamine lubilo kwadi, bamuhushishe kwete kubala ha mutemuki Esaiye, bamwihwishe’shi: Oshingula kino kiobala su?

³¹Bamwalulwile’shi: Neuku na minyi, anka su nyi na umo kundesha. Biabia basendelela Fidiha’shi: Kamina muno, oshale n’ami.

³²Kihindji kia Bifundwe-bi ’Efile kibadi abala nyi nkino’shi: Badi afungwa mu kutahibwa bu mukoko, Na kūmina nya bu mwan’a mukoko atshibwa bwaa; Biabia tamubule mukanwa mwe.

³³Mu kufukūlwa kwe kitshibilo kie kibakashibwa. Akalesha ku musuku we nanyi? Mwanda muwa we ubakatushwa hano ha nsenga.

³⁴Biabia mutungulwe baihwishe Fidiha’shi: Nakusendela a winyi mutemuki besambile’yo nanyi, beakudile’nyi, bakwilanga mungi?

³⁵Henyihaha Fidiha babulwile mu kanwa mwe, babangile ha kinyi Kifundwē’kia kumulungula wa Yesu.

³⁶Biabia habadi abende mwishinda babafikile ku mema; binyibiabia mutungulwe bākwile’shi: Tala mema biadi, akankutshishwa kubatshishwa nkinyi?

³⁷Fidiha bamwalulwile’shi: S’okumina n’eshimba diobe dioso, biabia weuku kubatshishwa; ebālulwile’shi: Ami nakumina’shi, Yesu Kidisitu nyi mwan’Efile Mukulu.

³⁸Binyibiabia bakamikile’shi: Ngalafwanda emane: biabia abo boso bubidi abayikile ’mema, Fidiha na winyi mutungulwe; na kubatshisha bamubatshishe.

³⁹Henyihaha habahwile kwabuka mu mema, Kikudi-E-Selelee a Yehowa bātshile Fidiha, na winyi mutungulwe tamumone’nyi dimo, ooo; biabia bayile mwishinda die, ende asehelanga.

⁴⁰Anka Fidiha badi musananwe ku Asotusa, n’e kwete kuhwadishena balungwile mukāndu-wibuwa mu bibalo bioso, mpaa na kufika ku Kesalea.