Read songe Bikitshino 9 Bible Online

Bikitshino 9 - songe bible

Bikitshino 9

¹Henyihaha Saulu badi kiafunu milayilo na lufu, kwi bana ba-bukishi ba Nfumwetu, e bayile kwi tshite mwakwidi e hanundu ha bakwabo,

²kumuteka mikanda ya kwenda n’ayo ku Ndamasaka mu bitumbwilo’shi: Su nankamono ba mu dino eshinda, sunga mbalume sunga mbakashi, nkebafishe bafungibw’e ku Yelusalema.

³Binyibiabia habadi tēnde, bafikile hehi na ku Ndamasaka, kahindji n’āka kubamumunyikile etata dia mwiilu dimwifunye.

⁴Biabia e bahōne hashi, bahushish’eyi adimulungula’shi: A Saulu, a Saulu, a nkinyi kiokwete kumbingila bingila?

⁵Biabia, bamba’shi: A Nfumwami, a n’obē’ nanyi? Biabia Nfumwetu’shi: N’ami Yesu okwete kubinga. Kibukoho’be bitahwa kutuna.

⁶E badi kwete kususa na kukanya, amba’shi: A Mwanana, okyebe nkukitshine kinyi? Nfumw’e namu’shi: Ebwe, wende, otwele mu kibalo, akikakulungulwa biodio kukita.

⁷Biabia aba bantu babayile n’e, abayimene nyaa, bakwete kuhush’eyi anka tambamone muntu.

⁸Henyihaha Saulu babukile hashi, na hakubula meso, tamumone muntu; anka bamukunkusha kwiasa, abamufishishe ku Ndamasaka.

⁹Badi mafuku asatu kushī kumona, sunga nkudia su nkutoma.

¹⁰Talai, mu Ndamasaka mubadi mulondji, eshina die mbu Ananaisa; Nfumwetu bamulungwile mu kimonwa eshi: Ananaisa. E namu’shi: N’ami’no Mwanana.

¹¹Nfumwetu bamulungwile’shi: Ebwe, wende mu luhata alutemunwa bu Lululame, wehushe mu nshibo ya Yudasa muntu eshina bu Saulu, mwina Tasuse, mwanda e kwete kuteka Efile Mukulu.

¹²E namu bamwene mu kimonwa, muntu ēshina die bu Ananaisa, kwete kutwela mu kutenteka eyasa hadi, mwadia kumwena meso.

¹³Henihaha Ananaisa bālulwile’shi: A Mwanana, tampushishe kwi bebungi abikitā uno muntu bibubi kwi bahatulwe bobe be kishila mu Yelusalema.

¹⁴Haha’nyi dimo ngiawa e na matalwa a ku batshiitebakwidi bakata a kushitshika n’ao boso abetanyinā h’eshina diobe.

¹⁵Anka Nfumwetu bamulungwil’eshi: Banda kwenda, mwanda e musangulwe n’ami kutwala eshina diande ku mpala kwa mīlo na banfumu, na kwi bana ba Isalele.

¹⁶Mwanda nankamulesha mwakafwambukila mu bintu bibungi ha mwanda w’eshina diande.

¹⁷Biabia Ananaisa bayile, akatwela mu nshibo mu kumutenteka maasa’shi: Mukwetu Saulu, Nfumwetu nyi Yesu, mwekyele kodi mwishinda, hwekalang’ofiki, nyi ntumine mwodiokumwena meso na kuushwa na Kikudi-E-Selelee.

¹⁸Kahindji n’āka ku meso mubahone bibadi bu bibwabwa; babule meso, bamwene, ēbwaa, babatshishwe na kubatshishwa.

¹⁹Habadile bidibwa, banyingile. Henyihaha Saulu bashelele mafuku na balondji b’Efile babadi ku Ndamasaka.

²⁰Biabia kahindji n’āka talungula mwanda wa Kidisitu mu bitumbwilo’shi: E, nyi mwan’Efile Mukulu.

²¹Anka boso hakumuhusha abakanyine, baihusha’shi: Au ta ngwi’nyi balwishanga babaitanyinanga dino eshina mu Yelusalema? A babafwile muno nank’abo’shi: nkebafishe bānye ku batshiite-bakwidi bakata.

²²Anka Saulu badi kwete kutama mu bukome, bahatakeshe Bena Yuda babombele mu Ndamasaka, badi kwete kwibashisha’shi, uno nyi Kidisitu na mwinyi.

²³Habakumbene mafuku ebungi, Bana Yuda abamudidile lukuku lwa mwakumwihayila,

²⁴anka Saulu beukile kubembela kwabo, abadi abatala ku bibi bufuku na kanya mwa kumwihayila.

²⁵Henyihaha balondji abamwatshile bufuku, abamwikishe ku lubumbu mu kisele.

²⁶Habafikile Saulu ku Yelusalema, batompele kwilamika ku balondji; ank’abo boso abadi abamutshinyi tambamukumine’shi, e mulondji.

²⁷Anka Banabasa bamwatshile, bamufwishishe kwi batumibwa, bebalungwile mubamwenene Nfumwetu mwishinda, besambe n’e na mubamulungudile, n’eshimba di bukome mwishina dia Yesu ku Ndamasaka.

²⁸E bashelele n’abo, badi kwete kutwela na kutuka mu Yelusalema.

²⁹Bakwile n’eshimba di bukome mwishina dia Nfumwetu Yesu, belele mpaka na ba Yudea ba Ngidiki, anka’abo abadi abakindakena mu kumwiha.

³⁰Anka habeukile bakwabo biya biabia abamwalaleshe ku Kesalea, na kumutumina ku Tasuse.

³¹Henyihaha bikoñeno bi’Efile moso mu Yudea na mu Ngadilea na mu Samadia, bibahohelele biya; babadi bakankamane; na ha kutambuka mu moo wa Nfumwetu na mu lusengyelo lwa Kikudi-E-Selelee, abafwimine na kufwima.

³²Bitakubakitshine, habadi Petelo akidi mu mpese yoso, balalele namu kwi bahatulwe-be-kishila ababombele mu Leda.

³³Basañene kwanka muntu eshina die bu Eneasa; badi mulale ku lusala lwe bihwa mwanda; badi mufwe mbidi.

³⁴Biabia Petelo bamulungwile’shi: Eneasa, Yesu Kidisitu akuhasha; būka, wale lusala lobe. Biabia kahindji n’āka babuku.

³⁵Na boso ababombele mu Leda na Salone abamumwene, abālulukile kwi Nfumwetu.

³⁶Binyibiabia mu Yoha mubadi mulondji eshina die bu Tabita, kuhatula kwa’dio nyi Dokasa. Uno mwana mukashi badi mukambe na bikitshino bibuwa na kuhana kwa buntu.

³⁷Bitakubakitshine mu aa mafuku e bakumba busungu, bafwile, habahwile kumutumpa, abaladishe kitanda kie mu nshibo ya kwiilu.

³⁸Na ha mwanda Leda badi hehi na ku Yoha, habahushishe balondji’shi: Petelo e kwanka, abatumine balume babidi kwadi kumusendela’shi, afikye kwatudi kushi kushingakana.

³⁹Henyihaha Petelo bebwele bayile n’abo. Habafikile, abamukamishe mu nshibo ya kwiilu; bakashi boso ba bafwe abaimene hehi bakwete kudila, na kulesha binkutu na mitwelo yibakitshine Dokasa habadi ki n’abo.

⁴⁰Anka Petelo bebatushishe boso, bakunamine hashi, tatekye; bealulwile kwi kitanda’shi: A Tabita, buka. Henyihaha babulwile meso e, na habamwene Petelo, bashalele.

⁴¹Biabia bamuhele mboko ye bamwibwesheshe, habaitanyine bahatulwe-be-kishila na bakashiba-bafwe, bamulubwile kwabadi tātala.

⁴²Binyibiabia ubeukilwe moso mu Yoha, na bebungi abakuminyine mwi Nfumwetu.

⁴³Bitabibakitshine, e nkwikala mafuku ebungi mu Yoha kwi Shimona mulumbudi a misekya.