Read songe Bena Loma 10 Bible Online

Bena Loma 10 - songe bible

Bena Loma 10

¹Anwe bakwetu, kiankyebela kwishimba diande na luteko lwande kw’Efile-Mukulu mpa bena Isalele ami’shi, bahande.

²Mwanda’mi nebakumina bu-kamonyi biababadi na kinsukunsuku kia kukyeb’Efile-Mukulu, anka tankalombene mu kiyukilo, ooo.

³Mwanda’bo mbahatamine mu ya kululama kw’Efile-Mukulu na mwanda wa kukyebe kushimatshisha kululama kwabo abo bana bene, tambekokeshebo bana bene ku kululama kw’Efile-Mukulu, ooo.

⁴Mwanda Kidisitu nyi nfudilo ya mukanda-wa-milangilo wa kululama kwi bosoboso abakumina.

⁵Mwanda Mosesa bahatulwile kululama kwa mukanda-wa-milangilo’shi, muntu akitshi abia bintu, biabia nyi mwakamwena muwa.

⁶Ank’akwa kululama kwi ha lukumino akwakula bino’shi, Toākulanga mwishimba diobe’shi; a kakamina mwiilu nanyi? (biabia nkwisha Kidisitu).

⁷Sunga’shi, akayikila mu kalunganyembo nanyi? (biabia nyi nkwalusha Kidisitu (dimo) ku lufu.)

⁸Akia kiawākula nkinyi? Uno mwanda ubefubula hehi n’obe, anka mu kanwa mwobe, na mwishimba mwobe; nyi mwanda wa lukumino lwatwakula eshi,

⁹sokula mukanwa mwobe’shi: Yesu ’Nfumwami, na kumukumina mwishimba diobe’shi, Efile Mukulu bamubushishe ku lufu, biabia na kuhanda okahanda.

¹⁰Anka kwishimba nyi akukumina muntu ku kululama, na ku kanwa namu nyi akwakwila ku kihandjilo.

¹¹Mwanda Bifundwe (bi Efile) abiakula’shi: Akukumina kwadi takakwatshishwa būfu, ooo.

¹²Mwanda takwi ha belamunwina, aba habo, aba habo, sunga ngumune ba Bena Yuda na Bena Ngidiki, ooo; mwanda Nfumu abo ngumunenka, Nfumu a boso, na mwinyi sha buheta bwa kuha boso abamutekye.

¹³Biabia muntu ese aitamina h’eshina dia Yehowa akahanda.

¹⁴A binyibiabia abakamwitanyina na mwinyi, aba bashī bakumine mwadi? Abakakumina mwadi na minyi, aba bashī abamuhusha. N’abakahusha na minyi kushī mulungudi?

¹⁵Abakalungula na minyi, su tambebatume? Anka mwakibafundjilwe’shi: (Aaa! Aaa!) buwa’yo aya mikolo yibafisha mukāndu-wibuwa, ayifisha namu nkumo yisangale ya bintu bilumbulukye.

¹⁶Anka boso bashī abakokyela mukānduwibuwa, ooo. Mwanda Esaiye namu akula’shi: A Yehowa, bantu kinyi abakuminyine kulungula kwetu?

¹⁷Binyibiabia mwanda wa lukumino alufikā ha kuhusha, na kuhusha namu mpamunenka ha mwanda w’Efile Mukulu.

¹⁸Anka’ mi nākula’shi: A tambahushe su? Ee, abahushishe binyibinyi; Eyi diabo dibafumankene kosokoso hanohansenga, na myanda yabo kunfundilo kwa nsenga.

¹⁹Anka n’akula’shi: A Bena Isalele, a tambeuke’nyi? Mosesa babadidile bākula’shi; Nankenukolomwena mukao kwi’ba bashī bu-bantu; Nankenufishi-sha nsungu ku mashimba kwenu ku mwīlo ulotakane.

²⁰Anka Esaiye e n’eshimba di moo, akula’shi; Nasañenwe n’aba bashi abankimbi, nafumbukile kwi’ba bashī abangihusha.

²¹Anka kwi bene Isalele, ākula’shi; Ngub’ese na bushima a natandabwile maboko ande kwi bantu bashī abankumina, na bakwalula mpaka.