Read songe Bena Loma 11 Bible Online

Bena Loma 11 - songe bible

Bena Loma 11

¹Biabia naihusha’shi, Efile-Mukulu basumbwile bantu be su? ooo. Leka! leka! Mwanda’mi namu nyi mwina Isalele a ku twikulo twa Abalahama ku kibumbu kia Bendjamene.

²Efile-Mukulu tamusumbule bantu be babeukile kalakala. A tanwibeuke’shi, akia kiakula Bifundwe kwi Elaidja bibadi asengyela bena Isalele kw’Efile-Mukulu’shi:

³A nfumwami abatahile batemuki bobe, abashindjile bishikilo biobe; anka’mi uno bashala kwanka buhenka bwande, abakyebe na muwa wande.

⁴Ank’Efile-Mukulu namu akibamwalulwile nkinyi? eshi; Nebikila ami na mwinyi binunu musambobidi bia bantu bashī abankunamina kwi Baala.

⁵Na bino namu mpamune’nka abashēle be hanka anka mulombene kusangulwa kwa buntu.

⁶Na su kwanka mpa buntu, biabia takwi ha bikitshino, ooo; su ta mbiabia, biabia buntu bwinyi tambuntu ooo.

⁷Bino’nyi a mbikunyi? Akia kikiakikimbi Isalele tamwikimone; anka basangulwe abo abekimwene, anka baba abashele mashimb’abo abakomeshwe hoo.

⁸Mwakibafundjilwe’shi, Efile-Mukulu bebahel’eshimba dia kubungila tulo, na meso abashīabamono nao, mu matwi namu tabahusha nao, na bino binyi kufisha ku lelo uno.

⁹Dafidi namu akula’shi; Mesa’bo alamunwe bu kifyo, na bu mukumo, n’akia kwibakambila nyi bwabo bwedi.

¹⁰Meso abo afitshishwe midima’shi, tabakamono, bekale batontamishe miongo yabo bukyelebukyele.

¹¹Naihusha bino ami’shi; Abakokwele biabadia kuhona su? ooo, Leka! leka! leka! Anka biabia nyi ha mwanda wa kinya kiabo, kihandjilo kibafiki kwi Badjentaila, mwanda wa kwibakolomona ku mukao.

¹²Ahenyihaha su kinya kiabo kibakitshisha buheta bwa hanohansenga, na kushimina kwabo tambuheta bwa Badjentaila ha kwibālusha namu a na minyi, tahakakidi bukata su?

¹³Ami nesamba kwanudi’nwe Badjentaila aho ha mwanda wa kwamba’shi; Nyi mutumibwa a Badjentaila, natumbisha bufubi bwande;

¹⁴Ami’shi su neuku su nkinyi su nkinyi kia kukwatshisha ba kumbidi kwande mukao eshi, mpashe bamo.

¹⁵Mwanda wa kusumbulwa kwabo su kubalombasha bahanohansenga, aha kulubulwa kwabo na minyi, tatakudia kutala mu lufu su?

¹⁶Su bikuba bia kwibedi bi lamunwe bikishila, biabia abilondo namu bi lamunwe bikishila, su mushi (ngukambe) wilamunwe wi kishila, biabia na ntabi yinyi mpamune.

¹⁷Anka su: ntabi yinyi yibabatwilwe, n’obe, mutshi wa mpafu a mahia, ubalamikilwe munkatshi mwayo, tautambula ku winyi mushi wa kununa mwimu, hamunenka na winyi mpafu;

¹⁸Twelungwilanga ku ntabi! anka su elungwila, obe, twemutwala mushi, ooo, mushi nyi ukutwal’obe.

¹⁹Biabia okyebe kwakula’shi: Ntabi yibabatwilwe, eshi, ami ndamikwe kwanka.

²⁰Eyo! anka hamune; baba batwidile mwanda wa kushī lukumino, obe boimena ha mwanda wa lukumino l’obe. Anka twekalanga n’eshimba dia mbengabenga ayoyo; wekale na moo.

²¹Mwanda su Efile-Mukulu ta mulekyele ntabi yinyiyinyi, obe na mwinyi dimuka su takakulekye namu.

²²Talangai binyibiabia bu-muntu n’eshimba dia bukome bw’Efile, kwi’ba babahonene bukome bubadi hanka; anka kodibe mbumuntu bw’Efile-Mukulu bwi hanka, su ekale mwanka bukyelebukyele mu bumuntu bwe, anka su ta mbino, biabia n’obe n’amu okabatulwa.

²³N’abo benyi kumune, su tambekale bukyelebukyele mu kushī lukumino biabia namu abakalamikwā’mo: Mwanda Efile-Mukulu euku kwibalamika kwanka dimo.

²⁴Su obe biobobatwilwe ku mpafu a mahia mwe, bolamikilwe ku mpafu mulumbulukye, ako nku kihikwa kishī kilombana mwanka hanohansenga; biabia aya ntabi yinyiyinyi ye, yikutwe kukila mwanka ha kulamikwa ayo yinyi ku mpafu ayo su?

²⁵Nyi henyihāha anwe bakwetu, ha nshī mukyebe’shi, nwikale bahatamine ku kino kifībwe, mwanda wa kutshina’shi, nuaketumbika binangu bi’anwe bana bene’shi, kukoma kweshimba nkwa luhese lumune, kubahonene bena Isalele’shi, mpaa na ahakakumbana bihwa bia Badjentaila.

²⁶Biabia bena Isalele boso abakahanda, anka mwakibafundjilwa’shi, A mukatuku mu Siona Mulamwinyi, akukakasha bushī bwin’Efile kwi Yakoba.

²⁷Kino nyi kilombeno kiande n’abo hankebakasha milwisho yabo.

²⁸Binyibiabia mulombene mukāndu wibuwa aba mbamushikwa ha mwanda w’anwe anka mulombene kusangulwa, babadi bakuminyibwe ha mwanda wa bashetu-kulu.

²⁹Mwanda bia buntu bi’Efile-Mukulu tabialuluka, na kwitamina namu anka hamune.

³⁰Mwand’anwe kalaa anka mwanubadi tanwibakokyel’Efile-Mukulu, anka bino nubafwilwa lusa ha mwanda wa bukolwa bwabo:

³¹Ñanka hamune’nka n’abo namu bashī abakokyela’shi, anka hakufwilwa’nwe lusa, abo namu abakafwilwa lusa.

³²Mwanda Efile Mukulu bahu kwibashitshila bosoboso mwanka mu bukolwa bwabo, mwanda wa kwamba’shi, afwila bosoboso lusa.

³³Aaa! Aaa! nyi mbula bwinyi buheta bwa kalolo na kiyukilo ki’Efile-Mukulu! Na kutshiba kwe kwa myanda, a ee! a ee! takwiukibwa, na mu mashinda mwe namu akutshishwa kulondamo!

³⁴A muntu kinyi mwiukye mulombenē’shimba dia Yehowa? N’amulanga namu nanyi?

³⁵Su nanyi akwibedi kumuha e, e namu tamuhelulula dingi?

³⁶Mwanda bintu biosobioso bianka ha mwanda we, kabidi bianka hadi e, n’anka kwadi e. Kwadi e kwanka ntumbo yikale mafuku oso ikala-ika. Amena.