Read songe Bena Loma 13 Bible Online

Bena Loma 13 - songe bible

Bena Loma 13

¹Oso muntu akokyele bakata ba matalwa bebamune, mwanda ta kwi a matalwa ashī kw’Efile; bamatalwa boso be hanka mbasangulwe n’Efile.

²Binyibiabia, muntu ese atuhishena na bamatalwa, biabia ahela na kisangulwe ki’Efile, su nanyi su nanyi, n’abahela abakefishisha kuhishwa kwa’bo bana bene.

³Mwanda abamunu bibundji ta be n’abia bia kukwatshisha moo kwi sha bikitshino bibuwa, ooo, anka kwi’wa na bi bubi. Okyebe’shi, nyikale shī na moo kwi bamatalwa su? Kita bia bilumbulukye na ntumbo yinyi okatumbishwa.

⁴Mwanda e ’mufubi ’Efile kodibe a kukukitshina buwa. Anka s’okitakiaki bubi, ikalanamoo, mwanda e ta twala luhete lwa ngoshi bisumanga, ooo; e nga mifubo y’Efile-Mukulu, nyi ’mobodi a nsungu kwi’wa akitshi bubi.

⁵Henyihaha nyi ha mwanda winulombene’shi, nukokyele; ta ñanka ha mwanda wa nsungu, ooo, ñanka na ha mwanda w’eshimba ditoka dia binangu munda.

⁶Nyi ha uno mwanda w’anudia kulambula milambu namu, mwanda’bo mba mifubo y’Efile-Mukulu mbate mashimba bukyēlebukyēle anka ha kino kintu.

⁷Binyibiabia lambulai kwi’ba boso nyi mwakidi kiyile, mulambu wende ku bamulambu, efuto kwi sh’efuto, moo namu anka kwi’bo abatshinwa moo, kinemo kwi bakunemekwa kinemo.

⁸Tanuahulanga muntu mahu, sunga ngumune, ooo, anka nwifudishenei kifulo, mwanda afulu mukwabo kilulo bakumbasha ha mukandawa-milangilo.

⁹Ha uno mwanda mpa kwakula’shi; Twekalanga na lusandji, twehanga muntu, toibanga, twanyakenanga mukwenu, toteng’eshimba ku bintu bia mukwenu; na su kwi ungi mulangilo, su mulangilo kinyi, bioso mbifumankashwe ha kino kikumbakashe kimune’shi; okafule mukwenu kifulo hamune bu’be na mwinyi.

¹⁰Kifulo takikita kia kulwisha kwi mukwenu, ooo, binyibiabia kifulo nkia kukumbasha kwa mukanda-wa-milangilo.

¹¹Na biabia hakwiuka kihindji na bia kibafiki bino ha kubuka mu tulo, mwanda binobino kihandjilo kibeshesha hehi n’aha hatubakuminyine.

¹²Bufuku tabukyebe kutoka, kanya takadi hehi; tusumbulei binyibiabia bikitshino bia mufito, tufwale bifwalwa bia ngoshe bi’etata.

¹³Tutembei na bilombene mwitata; kushī mu kwitatula na kukolwakolwa, sunga mu bia ha lusala lwinyi, sunga mu bia bukitekite, sunga na bia kwielesbena mpaka na kiutu.

¹⁴Anka fwalai Nfumwetu Yesu Kidisitu, tanukebikilanga anwe bana bene bia kumbidi abihwila ku meso atone abio.