Read songe Bena Loma 15 Bible Online

Bena Loma 15 - songe bible

Bena Loma 15

¹Binyibiabia atwe basha bukome nyi bibuwa’shi, tunemenwe lotolo lwa bashī bukome; ta twitoshanga’nka atwe bana bene, ooo.

²Atwe boso, twikal’atwitoshena, au kwishimba dia mukwabo, au kwishimba dia mukwabo, na myanda yibuwa mwa kwikushīsha.

³Mwanda Kidisitu ta mwitosha e na mwinyi kwishimba die, ooo, anka mwakidi kifundjilwe’ shi; Ntoheko y’aba abakutoheka yibampōn’ami.

⁴Mwanda bintu bioso bibafundjilwe kwibedi, bibadi bifundjilwe ha mwanda wa kwambula kwetu’shi, atwe mu mufwaka, na kisēngyelo bia Bifundwe, tukekale na lutengyelo.

⁵Binobino Efile-Mukulu a mufwaka na kisengyelo benuhe’shi, nwikale n’eshimba dimune anwe boso, muntu na mukwabo, muntu na mukwabo, mulombene Kidisitu-Yesu.

⁶Eshi, nwikale mumunenka, na ku kanwa kumune kwa kutumbisha Efile-Mukulu, nyi Shye a Nfumwetu Yesu Kidisitu.

⁷Binyibiabia nwitambushene anwe bana bene, anka mubenutambudile Kidisitu ku ntumbo y’Efile-Mukulu.

⁸Bino nakula’mi’shi, Yesu Kidisitu badi mufubi a kisale ha mwanda wa biabinyibinyi bi’Efile-Mukulu’shi, ashimatshishe ha myanda ya milayilo yibalayile kwi bayaiya.

⁹Na mīlo namu yikale aitumbisha Efile-Mukulu ntumbo ha mwanda wa lusa lwe, anka mwa kibafundjilwe’shi; Nyi ha nkakutumbisha munkatshi mwa Mīlo, na kuyimbila eshina diobe.

¹⁰Hangi namu awakula’shi: Sehelai anwe Mīlo na bantu be.

¹¹Kabidi na hangi namu’shi, tumbishai Yehowa anwe Mīlo yoso: Na bantu boso bekale abamwele bīla.

¹²Dimo’nyi, Esaiye eshi: Akukekala Mushi wa Yese, aukebwēla kumunana ku Mīlo; mwadi e, Mīlo ayikamukuluhila.

¹³Binobino Efile-Mukulu a lutengyelo enuushe na tuseho toso, na kufukama kwa mu lukumino’shi; nukumbane mu lutengyelo mu katshintshi ka Kikudi-E-Selele.

¹⁴Anka’mi winyi nyi musumīne hanudi anwe bakwetu, bianubaulu bumuntu, bianuushibwa na kiyukilo kioso, nwiukye na mwa kwilañena malango anwe bana bene.

¹⁵Sunga mbiabia bakwetu, nakidi kunyinga ha kwinufundjila luhese lumune kwinutentekyesha dingi, ha mwanda wa buntu bwampelwa kw’Ifile-Mukulu.

¹⁶Eshi, nyikale mufubi a Kidisitu Yesu ku Mīlo, kufubila mukāndu-wibuwa w’Efile-Mkulu’shi; milambu ya Mīlo yikale yikuminwe, ha kulamunwa kikishila ku Kikudi-E-Selele.

¹⁷Henyihaha nyi na mwa kwilungula mu Kidisitu Yesu mu bia binemene ku luhese lw’Efile-Mukulu.

¹⁸Mwanda’mi ta nkatomboka kwakula abia bintu, su mbinyi su mbinyi, anka bibakitshine Kidisitu kwandji’mi mwanda wa kikokyeshi kia Mīlo, hanka ha mwanda na ha bikitshino;

¹⁹kwanka mu katshintshi ka bitundwilo na bilengyeleshi bikata bi moo, ku katshintshi ka Kikudi-E-Selele; hakukita’shi, kubangila ha Yelusalema, na kwifunya, mpaa na kufisha ha Ididikuma, nahu kwakudidila mukāndu-wibuwa wa Kidisitu.

²⁰Eyo, biabia tanyingile kulungula mukānduwibuwa, hashī ahatemunwa Kidisitu, ooo, mwanda wa kwamba’shi, tala nakebaka habangye mukwetu kala:

²¹Anka mwa kibafundjilwe’shi; Kwī’ba bashī balungulwe myanda ye, aba abakamono, n’aba bashī bahushe, abakashingula.

²²Aha ha mwanda nadi mubambibwe misusa yi bungi kufika kwanudi.

²³Anka bino, kwi yino mpese takuki kihindji kiandji mulekye, ooo, biabia namu biandjidi bimoo bino biliwa bingi, kufika kwakwa kwanudi;

²⁴anka hankebwela lwendo lwande lwa ku Esepainye, su mpa kinyi, su mpa kinyi, nkafikye kwanudi. Mwanda hankahikula, natengyela kwinumona, na kwanudi’nwe nukantule kwanka, su mpa kubadila kihindji, natoshibwa kwishimba kwanudi’nwe.

²⁵Anka bino nēnde ku Yelusalema mu kufubila ku balamunwe bakishila mifubo.

²⁶Mwanda akio kibebatosha ku mashimba, aba be mu Masedonya, n’aba be mu Akaiya kuhunga biabuntu kuha balanda be munkatshi mwa balamunwe-bakishila be mu Yelusalema.

²⁷Pa uno’u mbatoshibwe, n’abo benyi bamahu abo. Mwanda su Mīlo yibehitshika mu bintu biabo bia bu-kikudi e selelee, biabia mbalombane n’a bo kwibalubwila bintu bia bu-mbidi.

²⁸Binyibiabia haikuhudisha kino, na hanahwile k’ōbesha kwabadi kino kikuba, nankakidi hanudi, na ku Esepainye kwinye.

²⁹Neuku’shi, hakufika kwakwa kwanudi, nankafiki mu kuushibwa kwa mwabi wa mukāndu-wibuwa wa Kidisitu.

³⁰Bino nenusendel’anwe bakwetu, ha mwanda wa Nfumwetu Yesu Kidisitu, na ha mwanda wa kifulo kia Kikudi-E-Selele eshi, nwinyishene bimoo, hamunenka n’ami, mu nteko kw’Ifile-Mukulu ha uno mwanda wande’shi,

³¹biandjia kulamunwa kwi’ba basha bukolwa ba mu Yudea, na mifubo yande namu yandji n’ayo ya ku Yelusalema yikuminwe kwi balamunwe-bakishila,

³²eshi mwandjia kufikila kwanudi na tuseho ku kia kikyebe eshimba di’Efile-Mukulu, na mwandjia kwishinka hanudi’nwe.

³³Bino Efile-Mukulu a kufukama ekale n’enu boso, Amena.