Read songe Bena Loma 6 Bible Online

Bena Loma 6 - songe bible

Bena Loma 6

¹A binyibiabia kiatuakula kinyi? Twikala’nka mu milwisho’shi, buntu bwa bisumanga bufwimine hanka su?

²Ayoyo, leka! leka! ta mbiabia; abiabia’twe babafwidile ku milwisho atukekala mwanka bi kunyi?

³Ta nwibeuke’nyi, mwatudi bafwimine muno, atwe babatshishibwe mu Yesu Kidisitu, tubabatshishibwe mu lufu lwe?

⁴Henyihaha tu bashīkwa n’e, anka kwa lubatshisho lwa mu lufu; eshi, anka musangwilwe Kidisitu ku lufu kwa ntumbo ya Yaiya, n’atwe namu mpamune tuyile mu buhya bwa muwa.

⁵Mwanda su tubakunyinwe hamune n’e mu kihwandjikisho kia lufu lwe, biabia na mu kusanguka kwe kwinyi mpamune.

⁶Hakwiuka bino’shi, bu-muntu bwetu bwa kala bubaihaibwe ha nkulusu n’e’shi, mbidi ya kulwisha yikatukīdile’shi, atwe ta tukekala’nyi dimo mbuhika bwa milwisho, ooo.

⁷E bafwile, babingishwa ku milwisho.

⁸Biabia, su tubafwile na Kidisitu, atukumina’shi, tukekala n’e namu na muwa,

⁹hakwiuka’shi, Kidisitu basangwilwe ku bafwe, e ta kiakamono’nyi lufu dimo, ooo, biabia lufu’nyi ta ku ki na ha lwi lumumune’nyi bu nfumu e, ooo;

¹⁰Lwinyi lufu lubafwile, bafwidile ku milwisho, alo namu ndumune mpaa, anka muwa wadi n’ao mwikele n’ao kw’Ifile.

¹¹Ñanka biabia n’anwe bana bene mwikale anwitemuna’shi, twibafwile ku milwisho, biosobi twi na muwa kw’Ifile-Mukulu mu Kidisitu Yesu Nfumwetu.

¹²Binyibiabia ta nwilekanga milwisho kumuna bu nfumu mu mbidi yenu ya lufu, eshi, mu kukokyelanga mu kutona kwa meso a malakā’ko, ooo.

¹³Sunga nkuhana biambidi yenu ku milwisho bu bia ngoshi bishī yilulame; anka nwihane anwe bana bene kw’Ifile, hamune bu abatala babukye ku lufu, na biambidi yenu bu biangoshi bilulame kw’ifile.

¹⁴Mwanda milwisho’nyi tayi kiayikenumuna’nyi bu nfumwenu, ayoyo; anwe’nyi ta nu ki ku mukanda-wa-milangilo, ooo, tanudi ku buntu bwa bisumanga.

¹⁵A biabia namu nkinyi? atukalwisha’shi, kyele ta tu ki ku mukanda-wa-milangilo’nyi, anka ta nku buntu bwa bisumanga? aaa, leka! leka! ta mbiabia.

¹⁶A tanwibeuke’shi, awa anukehana’nwe bana benu bu bahika ba kukokyela, biabia nwi bahika ba’wa anukakokyela; su ba milwisho ya ku lufu, su nkukokyela ku kululama?

¹⁷Anka Efile-Mukulu atumbudibwe, bia bianubadi bu bahika ba milwisho, bino bianubakokyela kwishimba kwinyi ku kia kihaso kia bulambukishi bwa benufishishe;

¹⁸Hakulekyelwa ku milwisho nubālulukile tanudi bu bahika bwa kululama.

¹⁹Nākula bu-muntu mwanda wa lotolo lwa mbidi yenu; anka mwanubehanyine biambidi bienu tambihika biabio binyi bia ku biko bi’eshimba, na bia kushulashula kwa bishila mpaa na ku bia kushulashula kwa bishila; hamunenka na bino binyi, hanai biambidi bienu bu bihika bia kululama kwa kilamunwe, kikishila.

²⁰Biabia hanubadi bu bahika ba milwisho, nabadi balekyelwe na kululama.

²¹A mu bia bintu abinukwatshisha būfu binobino, anubadi anumono bikuba kinyi? mwanda wa kunfudilo kwa’bia bintu, ndufu.

²²Anka binobino nubalekyelwa ku milwisho, nubaluluka, tanudi bu bahika b’Efile, amo nyi mwa tanumwena bikuba bia ku kilamunwekikishila, na kunfudilo namu, muwa wa ikalaika.

²³Mwanda efuto dia milwisho ndufu; anka buntu bwa bisumanga bw’Efile-Mukulu ’muwa wa ikala-ika, mu Kidisitu Yesu Nfumwetu.