Read songe Bena Loma 7 Bible Online

Bena Loma 7 - songe bible

Bena Loma 7

¹Ta nwiuku’nwe bakwetu’shi, mwanda’mi nakula kwi abeuku mukanda wa-milangilo’shi, mukanda-wa-milangilo aomunu muntu mpaa hakī na muwa?

²Mwana mukashi e na mulund’e mulamwe na mukanda-wa-milangilo kwi mulund’e mpaa hakī na muwa; anka su mulund’e bafu, biabia ebalamunwa ku mukanda-wa-milangilo wa mulund’e.

³Binyibiabia su mulund’e kīatala, e balubula mungi muntu, biabia e atemunwa bu sha lusandji, anka su mulund’e bafu, biabia e balamunwa ku mukanda-wa-milangilo, sunga e balubula mungi mulunda, biabia te na lusandji, ooo.

⁴Henyihaha anwe bakwetu, n’anwe namu mpamune tanudi bafwe ku’wa mukanda-wa-milangilo mwanda wa mbidi ya Kidisitu, eshi, mwanudia kubambibwa kwi mungi, n’e winyi basangwilwe ku lufu, mwatudia kutshisha bikuba kw’Ifile-Mukulu.

⁵Hatubadi tukī mu mbidi, n’abia kusuasua kwa milwisho, bibadi bia ku mukanda-wa-milangilo, bibetukitshishe kuha bikuba bia lufu, anka mu biambidi bietu.

⁶Anka binobino tubalamunwa ku mukanda-wa-milangilo, biatubafwanga ku kia kibadi kitukwetwe, mwatudia kufubila mu buhya bw’eshimba, ta mu bia bia kala, ooo.

⁷A binyibiabia kiatukākula nkinyi? Mukanda-wa-milangilo ngwa milwisho’nyi? ayoyo, leka! leka! ta mbiabia. Ta nadimwiukye milwisho anka ha mukanda-wa-milangilo; ta nadimwiukye kwikala na meso a tone a malaka su mukandawa-milangilo ta nguakule’shi, ta nwikalanga na malaka.

⁸Anka milwisho yibakwatshile mwanda anka ha mulangilo wa kunkitshisha bihaso bioso bia malaka: Su mukanda-wamilangilo ta wi kwanka, biabia miiwisho ngifwe.

⁹Mwanda’mi nadi atala kala hashī badi mukanda-wa-milangilo, anka habafiki mulangilo, milwisho namu yibabuku, ami namu nafwile;

¹⁰Winyi mulangilo ubadi wa kumwena muwa, neumwene ñanka’lo lufu.

¹¹Anka milwisho, yibakwatshile mwanda anka ha mulangilo yibandjimbile, na kwihaa, yibañihayile.

¹²Biosobi mukanda-wa-milangilo wiulamunwe-kishila, na kishila namu hamunenka nyi nkilamunwe-kishila, na kululama, na buwa bwinyi.

¹³A henyihaha kilumbulukye namu akinalulukila ta ndufu su? ooo, leka! leka! ta mbiabia; Anka milwisho mwayidia kumwekyela bu milwisho yi moo, ha kukitshisha lufu, anka ha’kia kinyi kilumbulukye, eshi, anka ha mulangilo winyi, milwisho mwayidia kwikyela kulwisha kukambe.

¹⁴Mwanda’twe atwiuku’shi, mukanda-wa-milangilo ngwa kikudi-E-Selelee; anka’mi nyi a bia mbidi muhanyinwe ku milwisho.

¹⁵Akia kiankitshi ta nyikitundula; kiankyebe ta nkita kianka, ooo, anka kiandji mushikwe nyi kiankitshi.

¹⁶Binyibiabia su nakitshi akia kia nshī mukyebe, biabia nakumina ku mukanda-wa-milangilo’shi, ngulumbulukye.

¹⁷Henyihaha ta nami uno akitshi kianka, ooo, anka milwisho yikale mwimi.

¹⁸Mwanda neuku’shi, mwimi (nyi kwakula’shi, mu mbidi yande) ta mwikale sunga nkimune kibuwa; mwanda eshimba dia kukyeba nyi n’adio, anka mwa kwikikitshina’kia kilumbulukye, ta nsangula’mi.

¹⁹Akia kibuwa kiankyebe ta nyikikitshi, anka bubi bwa nshī mukumine nyi bu ankitshi.

²⁰Binyibiabia abia biankitshi kia nshī mukyebe, ta nami akitshi kianka, anka milwisho yikale mwimi.

²¹Ñanka’ko nasangula kia kundungula’shi, aha hankyebe kukita kilumbulukye, bubi bwi n’ami.

²²Mwanda’mi nasangala mu mukanda-wa-milangilo w’Efile-Mukulu anka mulombene muntu e munda mwande.

²³Anka namono kingi kishila mu biambidi biande, takalu ngoshi na kishila kia kwishimba kwande, akinkakila, ’nka mu buhika bwa mu kishila kia milwisho, nyi ki mu biambidi biande.

²⁴Aibabo! biosobi nyi muntu akwinyongola. A nanyi akundamuna mu mbidi ya lufu luno?

²⁵Biabia natumbul’Efile-Mukulu mu Yesu Kidisitu Nfumwetu. Henyihaha ami na mwinyi kwishimba nyi mu buhika bwa ku kishila ki’Efile-Mukulu, anka ku mbidi tandji a ku kia milwisho.