Read songe I Bena Kodinda 10 Bible Online

I Bena Kodinda 10 - songe bible

I Bena Kodinda 10

¹Mwanda’nwe bakwetu mu Kidisitu tankyebe’shi nwikale bahatamine, bu bibadi bashyetu-kulu boso mushi mwekumbi, abo boso abakile munkatshi mwa mema-a-kalunga;

²abo boso abadi babatshishwe kwi Mosesa mwikumbi na mu mema-a-kalunga.

³Abadile namu abo boso bidibwa bimune bia mu Kikudi;

⁴abo boso namu abatomene biakutoma bia mu Kikudi; mwanda abatomene ku iubwebwe lumune lwa mu Kikudi lubebalondanga, lwinyi lubwebwe namu lubadi Kidisitu.

⁵Anka Efile Mukulu tamusehele kalolo na bamo bebungi, ooo, mwanda’bo abayile bulumbelumbe mu kabāka.

⁶Biabia yino yoso yibadi bu bihwandjikisho kwatudi, mwanda kwitulesha’shi, tala twakekala na kulakila ku bintu bibubi, anka hamune ’bo abalakidīle.

⁷Tanwikalanga sunga balangwidi ba mankishi hamune na bamo b’abo; mwakibafundjilwe’shi: Baba bantu abashalele kudia na kutoma, abebwele namu tabasha masha.

⁸Tatukitanga namu lukyebanokyebano hamune na bangi b’abo abakitshine’lo ooo, n’abo abnhōne mwifuku dimune’nka binunu maku mi abidi na binunu bisatu.

⁹Sunga nkutompa Kidisitu bu bibatompele bamo b’abo, n’abo abatukishwe na manyoka.

¹⁰Sunga nkununa hamune bamo b’āba abaununwine, n’abo abatukishwe kwi yawa mutukishi.

¹¹Yino myanda yoso yibafikile kwabadi kwikala bu bihwandjikisho, yibafundjibwe mwanda wa kwitudimuna, kunfudilo kwa mahaka a hanohansenga kubafiki kwatudi.

¹²Binyibiabia yawa atentekyesha’shi, nyi mwimane, adimukye tala ahona.

¹³Takwi kitompelo kia kwinutompa, ank’akio akinemenā kwi bantu, anka Efile Mukulu e nga kishima, e takenulekyela mu kutompibwa kukila kiakia kianwiuku kwikala n’akio; anka ha kutompibwa akenukitshina eshinda dia kuhanda, bianudia kwiuka mwa kukankamena mwanka.

¹⁴Binyibiabia anwe bakuminwe bande, sukai ku kulangwila kwa mankishi.

¹⁵Nākula kwibo be bu basha binangu; tshibai yinyi yinesamba.

¹⁶Ekoho dia mwabi diatutumbula ta nkilombeno kia mase a Kidisitu? Na dimpa diatubasulā ta nkilombeno kia mbidi ya Kidisitu su?

¹⁷Binyibiabia atwe bebungi, twi dimpa dimune, na mbidi yimune; mwanda’twe boso atudiyā ku dimpa dimunenka.

¹⁸Tala Bwina Isalele bwa ku mbidi; abo abadiyā ku bitahilo, bakutwe kwikala balombane na kitala kia kitahilo su?

¹⁹A kiañakula’nyi nkinyi? Nākule’shi, kintu kitahilwe nkishi, nyi nkintu su, sunga nkishi winyi e kintu su?

²⁰Ooo, anka nākula’shi, biabia bintu abitahā Badjentaila, abatahilā biso, ta nkwi Efile Mukulu ooo. N’ami tankyebe’shi nwikale na kihwano na biso, ayoyo.

²¹Tanwiuku kutoma ekoho dia Nfumwetu n’ekoho dia biso, ooo; tanwiuku kudia ku mesa a Nfumwetu, na ku mesa a biso, ooo.

²²A tukolomwenā Nfumwetu kwikala na mukau su? Atwibamukile bukome’nyi?

²³Bintu bioso tabi kishila, anka bintu bioso tabitwikasha na muloo; bintu bioso tabi kishila, anka bintu bioso tabikankamisha (muntu,) ooo.

²⁴Muntu tekimbilanga bi’e na mwinyi, ank’ese muntu akimbe bia kusa ngasha bakwabo.

²⁵Kintu kioso akihanwa ku bisalwe, nwikidie, tanwihushanga mihusho, mwanda wa muntu e munda.

²⁶Mwanda nsenga ngia Yehowa, na bintu bioso bi mwanka.

²⁷Su kwi umune ā’ba bashī bakumine enwitanyina (ku bidibwa,) n’anwe namu nwi n’eshimba dia kwenda; bioso abikenutudilwa, su mbinyi su mbinyi nwibidye, kushī kwihusha, mwanda wa muntu e munda.

²⁸Anka su muntu akenulungula’shi, kino nkitahilwe mankishi, biabia tanudianga kianka, ha mwanda wa yawa benulesha’kio, na ha mwanda wa muntu e munda namu.

²⁹Ami nākula’shi, muntu e munda; tangobe ooo, nyi nga mukwenu; mwanda buluñantu bwande mbutshibilwe na minyi, kwi muntu e munda mwa mungi?

³⁰Mwanda su kwi lutumbu, ami nadiyā’bio, a mpa mwanda kinyi nākulwa bibi ha mwanda wa kiakia kiantumbula hanka?

³¹Binyibiabia sung’anudyi, sung’anutomo, sunga nkioso kianukitshi, nwibikitshinei ku ntumbo y’Efile Mukulu.

³²Tanukitanga kia kukokosha su nkwi Bena Yuda, su nkwi Bangidiki, sunga ku kikoñeno ki ’Efile.

³³Anka hamune n’ami namu, natosha mashimba a bantu boso mu bintu bioso, kushī kwikimbila biande’mi na mwinyi, ooo, ank’abio bia bebungi, ami’shi, bahande.