Read songe I Bena Kodinda 12 Bible Online

I Bena Kodinda 12 - songe bible

I Bena Kodinda 12

¹Bakwetu, ha mwanda wa bia-buntu bia Kikudi-E-Selelee, tankyebe’nwe nwekala bahatamine.

²Anwiuku bu bianubadi Badjentaila, nubadi batwelelele kwi mankishi a tumama, nyi anka mwa nubakunkushibwanga.

³Binyibiabia nenuha bia kushingula’shi, takwi muntu akuakula mu Kikudi-E-Selelee atemuna Yesu’shi, mwedibwe muloa; takwi muntu namu euku kwakula’shi, Yesu nyi Nfumu, anka mu Kikudi-E-Selelee.

⁴Kwi bihaso na bihaso bia bia-buntu, anka Kikudi nkimune.

⁵Kwi bilekeno bia bilumbulwilo bia mifubo, anka Nfumu ngumune.

⁶Dimon’nyi kwi bihaso na bihaso bia mukitshinwā mifubo, anka winyi Efile Mukulu, nyi afubā mu bioso bioso.

⁷Anka kifumbukilo kia Kikudi-E-Selelee nkihebwe kwi ese (muntu) mwadia kumwena mwanka.

⁸Mwanda kwi umune ’muhebwe mwanda wa binangu kwi Kikudi (E-Selelee,) kwi mungi mwanda wa kiukilo kwi winyi Kikudi;

⁹kwi mungi’nyi lukuluhilo kwi winyi Kikudi; kwi mungi dimo’nyi (’muhebwe) bia-buntu bia kuhwishana (masungu) kwi winyi Kikudi.

¹⁰Kwi mungi namu (muhebwe) mwa kukitshina bilengyeleshi; mungi’nyi namu mwa kutemukila bitemu; kwi mungi’nyi namu (muhebwe) lushingulo lwa kushingula bikudi; mungi (muhebwe) bihaso na bihaso bia ndjimi; na kwi mungi’nyi kuhatula kwa ndjimi;

¹¹anka Kikudi kimune afubisha yoso yino; abilā kwi ese (muntu) mwakyebele e na mwinyi.

¹²Mwanda’nka mwikele mbidi ngimune, yi na biakumbidi bibungi namu, na (bino) biakumbidi bioso sunga bibungi, nganka mbidi yimune, nyi anka mwikele Kidisitu namu.

¹³Mwanda kwi Kikudi kimune, atwe boso twi babatshishibwe mu mbidi yimune, sunga twi Bena Yuda, sunga (twi) Badjentaila, sunga twi bahika, sunga twi baluñantu, atwe boso namu tubatomeshibwa mu Kikudi kimune.

¹⁴Mwanda yinyi mbidi tayi kiakumbidi kimune, anka bibungi.

¹⁵Su lwā aluakula’stii, Mwanda’mi nkīyasa, ami nki kia ku mbidi, ooo; a biabia tandwa kia ku mbidi su?

¹⁶Sung’etwi namu adiakula’shi: Mwanda’mi nkī’iso, nki kia ku mbidi; a biabia, ta ndia ku mbidi su?

¹⁷Su mbidi yoso yishima yibayikele eiso (ank’adio, yishī matwi) a biabia, kuhusha kwi kwi kunyi? Su yibayikele ayo yoso anka kuhusha, a biabia kulula kwi kwi kunyi?

¹⁸Anka binobino Efile Mukulu batule biakumbidi bioso mu mbidi, bu mubakyebele eshimba die.

¹⁹Su kubadi anka kiakumbidi kimune, biabia mbidi namu yibadia kwikala kwi kunyi?

²⁰Anka binobino bi biakumbidi bibungi, ñanka mbidi yimune’nka.

²¹Eiso namu tadiuku kwakula kwiyasa’shi: Nki n’obe lukalo, sunga mutwe dimonyi namu kwi ngwā’shi: Nki n’obe lukalo.

²²Ayoyo, kukila biabia, abia biakumbidi bia mbidi bi bu bikambe butūba, abio mbikebibwe bikata.

²³N’abia biakumbidi bia mbidi, biatuhwandjikisha’shi: Bi na kinemo kihela, kwa bidi’bio nyi kwatutenteka kinemo kikilekile; na biakumbidi bietu bishī buwa, biosobi abio bibuwa bukilekile.

²⁴Mwanda bietu bibuwa tabi na ki’abikyebe; anka Efile Mukulu bafumankeshe mbidi hamune, bakambile kuhana kinemo ku luhese lwakishī badi.

²⁵Eshi, takukekala kwilamuña mu mbidi; anka biakumbidi bioso bikale abilelena kilelo kimune.

²⁶Na su kiakumbidi kimune kiamona malwa, (biabia) biakumbidi bioso abimono malwa n’akio; su kingi kiakumbidi namu kibanemekwa, biakumbidi bioso abisehela n’akio.

²⁷Biabia nwi mbidi ya Kidisitu, nwi biakumbidi ye, muntu he, muntu he.

²⁸Efile Mukulu namu batudile bamo mu kikoñeno (ki’E); kwibedi batumibwa, diakabidi batemuki, diakasatu balambukishi, kumongo ta mbilengyeleshi, kumongo’nyi biabuntu bia kuhwisha masungu, kumongo’nyi biakukwashia, na basha kulumbula, na bihaso bihaso bia ndjimi.

²⁹A boso mbatumibwa su? boso mbatemuki su? a boso mbalambukishi su? a boso mbakitshi ba bilengyeleshi su?

³⁰Boso be na bia-buntu bia kuhwisha masungu’nyi? A boso’nyi abākulii na (yingi) ndjimi su? Boso abamonā mwa kuhatulwila’ (yo) su?

³¹Anka kimbididilai bia-buntu bikididile bikwabo; sunga mbiabia ami nenulesha eshinda adikile binyibiabia buwa.