Read songe I Bena Kodinda 15 Bible Online

I Bena Kodinda 15 - songe bible

I Bena Kodinda 15

¹Dimon’nyi bakwetu, nenukisha mikāndu-yi-buwa yinenulungwile, yingi namu yanubatambwile, na kwīmanyinyina mwanka.

²Nyi kwanubahandjila su anulamatshidila mu binyi binenulungwile, anka su nubakuminyine bisumanga.

³Mwanda’mi kwibedi nenuhele kiakia kianatambwile namu, mu bafwidile Kidisitu milwisho yetu mulombene Bifundwe bi’Efile;

⁴Bashīkilwe namu, abuka h’efuku dia kasatu mulombene bifundwe bi’Efile.

⁵Na mu bamwenenwe kwi Kefasa, kumongo kwi benyi b’ekumi na babidi.

⁶Kumongo’nyi bamwekyele kwi Bakwetu ba mu Kidisitu bakile nkama yitano kihindji kimune; bangi babo bakile bungi bakiabatala mpaa na binobino, anka bamo mbalaletulo (twa lufu.)

⁷Biabia biakikamweka kwi Yakoba, akamwekyela’nyi kwi batumibwe boso.

⁸Na kunfudilo kwa boso bamwekyele namu kwandjimi, bu mutandjibwe muhulumukye.

⁹Mwanda’mi nyi mukile buhela a ku batumibwa, nki muhwandjikile kutemunwa bu mutumibwa, mwanda nadi asābula kikoñeno ki’Efile.

¹⁰Anka nyi kwandji mwikele na bino, nyi ku bumuntu bw’Efile Mukulu: na buntu bwe bwanampelwe’mi ta mba bisumanga, ooo; anka nakile bakwetu boso kutuhwita ’mufubo: anka ta nami na mwinyi, ooo, nyi mbu-muntu bw’Efile Mukulu bubadi n’ami.

¹¹Binyibiabia su bibadi ami, su mbaba, nyi anka mwatubalungwidile ntukāndu-wibuwa, nyi mwinyi mwanubakuminyine.

¹²Biabia su Kidisitu alungwilwa’shi, e babukile ku lufu, a nkinyi bangi be munkatshi mwenu abamba’shi: Takwi lusangukilo lwa bafwe?

¹³Anka su takwi lusangukilo lwa bafwe, biabia Kidisitu tamusangulwē, ooo;

¹⁴na su Kidisitu tamusangulwe, biabia bulungudi bwetu bw’Efile mbwa bisumanga, na lukumino lwenu namu ndwa bisumanga.

¹⁵Ee, binyibinyi (biabia) atwe namu tubasañanwa bu tumonyi tw’Efile twa madimi; mwanda tubatemwine ha mwanda w’Efile Mukulu’shi: Babushishe Kidisitu, e ashī mubushe (ku lufu) su abikala (mbinyibinyi) bafwe tababushibwa.

¹⁶Mwanda su bafwe tababushibwa, biabia Kidisitu tamubushibwē.

¹⁷Na su Kidisitu tamubushibwe (biabia) lukumino lwenu ndwa bisumanga; anwe namu nukī anka mu milwisho yenu.

¹⁸Henyihaha abo namu abahōne mu tulo (twa lufu) mu Kidisitu, biabia abalwila.

¹⁹Su twi na lukuluhilo mu Kidisitu anka mu kino kihindji kia muwa w’etu, twi bakile bantu boso na kwinyongola.

²⁰(Anka E Kidisitu basangwilwe mu bafwe, e takikuba kia kwibedi kia baba abalele tulo (twa lufu.)

²¹Biabia ha mwanda w’alo lufu lubatwelele kwi muntu, (biabia) lusangukilo lwa bafwe lubatwelele kwi muntu.

²²Mwanda mwatufwilā atwe boso mwi Adama, mpamunenka namu mwatukamwena muwa, atwe boso mu Kidisitu.

²³Anka boso mwa belondena ku muntu ku muntu; Kidisitu nkikuba kia kwibedi; kunyima, abo ba Kidisitu ha kufika kwe.

²⁴Henyihaha (akukafiki) kunfudilo, hakatulu bufumu kw’Efile Mukulu, n’Shyie (namwinyi); hakahudisha butontshi boso, na matalwa oso na bukome boso.

²⁵Mwanda wadi n’au ngwa kubikala, mpaa na hakahu kwashina boso bakumushikwa.

²⁶Mushikwene n’ami a kunfudilo akashimishibwa nyi ndufu.

²⁷Mwanda e batontele bintu bioso mushi mwa ngwa ye. Anka hakwakula’shi; Bintu bioso mbitudibwe, kibamwekyelele’shi, yawa batudile bintu bioso mushi mwe, ta n’e namwinyi eamba.

²⁸N’ahakekala bintu bioso bikokyeshibwe kwadi, biabia namu Mwana na mwinyi akakokyela kwi yawa batontele bintu bioso mushi mwe’shi, Efile Mukulu ekale a bioso na mu bioso.

²⁹Su tambiabia, abo ababatshishibwe ha mwanda wa bafwe, abakakitshi naminyi? Su bafwe tabasangukā, a nkinyi ababatshishibwā ha mwanda wa bafwe?

³⁰N’atwe namu nkinyi kiatudi bemene lufu ngub’ese?

³¹Nasuminā’nwe bakwetu ha mwanda wa kwitumbisha kwenu kwandji n’ako mu Kidisitu Yesu Nfumwetu’shi, ami nafwiyā kwifuku n’efuku.

³²Sū’mi nyi mulond’anka kihikwa kia bantu, nalwile na nyama ku Efisesa, ki’anka mwena’mo nkinyi su bafwe tabasangulwā ku lufu? (Biabia) tudye, tutome, mwanda maloba atukafu.

³³Tanudimbibwanga; kwitembeshena kwi bubi akunyangishā bihikwa bibuwa.

³⁴Hasukilai ku kululama kweshimba, tanusolanga namu mwanda, mwanda bamo tabe na kiukilo ki’Efile Mukulu; nākula uno mwanda kwinukwatshisha būfu.

³⁵Anka bamo abakanihusha’shi: A bafwe abasangulwa naminyi? Abakafiki na kihaso kia mbidi kinyi?

³⁶Obe mutshikame, akia kiokuna, takibumbā kiasanguka anka su akifu.

³⁷Na kinyi kiokunā tokunā mbidi’shi, nyia yikekala’nka’yo, ooo, nyi ñanka lubio, su ndwa ngano, su ndwa kingi kihaso kia lubio.)

³⁸Anka Efile Mukulu nyi e yiheyā mbidi, mwakyebel’eshimba die, ku lubio na mbidi yalo, ku lubio na mbidi yalo.

³⁹Mwita woso tawi hamune, ooo, anka kwi mwita wa bantu, kwi mwita wa nyama, kwi ungi’nyi wa mishiha, umo’nyi wa tonyi.

⁴⁰Kwi mbidi ya mwiilu, kwi mbidi ya hanohansenga namu, anka ntumbo y’ayo ya mwiilu yi hayo, na ntumbo y’ayo ya hanohansenga yi hayo namu.

⁴¹Kwi ntumbo yimune ya nguba, na yingi ntumbo ya mweshi, na yingi’nyi ngia nyenyenyi; mwanda luenyenyi lumune ndwilekene na lungi lwenyenyi mu ntumbo.

⁴²Nyi anka biabia namu na lusangukilo lwa bafwe mpamune. Yibakunwe yinyangye, ayikasangulwa yishī yinyangye.

⁴³Yibakunwe ya būfu, ayikasangulwa ta ngia ntumbo; yibakunwe ya butūba, ayikasangulwa ta ngia bukome.

⁴⁴Yibakunwe ya mwiyile mbidi, ayikasangulwa ta mbidi ya Kikudi. Kwi mbidi yi mwiyile mbidi, kwi mbidi’nyi ya mwiyile kikudi.

⁴⁵Biabia nyi mwaubafundjibwe’shi: Muntu a kwibedi, Adama, bahangilwe a kikudi akitala. Winyi a kunfudilo badi kikudi akihana muwa.

⁴⁶Ank’akia kia kwibedi takibadi kia kikudi, ooo, nyi nkia mwiyile mbidi.

⁴⁷Muntu a kwibedi nga hanohansenga, anka muntu akabidi, e nyi Nfumwetu a Mwiilu.

⁴⁸Anka mwikele ba hanohansenga, mbāhanohansenga, na bu mwikele ba mwiilu biabia namu mba mwiilu.

⁴⁹Anka mwatudi befwane kīfwano kia kanohansenga, mpamunenka atukefwana kīfwano kia mwiilu.

⁵⁰Binyibiabia kiañakula anwe bakwetu nkino’shi: Mwita na mase tabiuku kuhyana bufumu bw’Efile Mukulu; sunga kinvangyo takiuku kuhyana kishīkinyangye.

⁵¹Talangai, nenulesha kifībwe: Atwe boso tatukalala tulo (twa lufu) ooo, anka atukālulwū’twe boso.

⁵²Mu kahindji n’āka, bu kuhohola kw’eiso, ahakēlwa mpungi ya kunfudilo: mwanda mpungi ayikākula, na bafwe abakasangulwa bashī banyangye, n’atwe atukālulwa.

⁵³Mwanda yino ayinyangā, wa yidi nayo ngwa kufwala yishyayinyangā, na yino ayifwiyā wa yidi nayo ngwa kufwala yishyayifwiyā.

⁵⁴Biabia yino ayinyangā hayikafwala yishyayinyangā, na yino ayifwiyā hayikafwala yishyayifwiyā, biabia aukakumbashwa winyi mwisambo ubafundjilwe’shi: Lufu lubaminwa na kwilobesha.

⁵⁵A lufu, ngobesha yobe yi kwi kunyi? A lufu, munungi wobe wi kwi kunyi?

⁵⁶Anka munungi wa lufu nyi mbubi, na ntshitshiba ya bubi nyi mukanda-wa-bishila.

⁵⁷Anka Efile Mukulu atumbishibwe, n’e etuheya ngobesha mu Nfumwetu Yesu Kidisitu.

⁵⁸Biabia, anwe bakwetu bakuminyibwe, nwikale bakankamane, kushī kusanasana, nukishekishe bikata bukyelebukyele mu mufubo wa Nfumwetu, mwanda anwiuku’shi, kutuhwita kwa mifubo yenu tankwa bisumanga mu Nfumwetu, ooo.