Read songe I Bena Kodinda 7 Bible Online

I Bena Kodinda 7 - songe bible

I Bena Kodinda 7

¹Ha mwanda wa myanda yanubanfundjile, bibuwa muntu kukutwa kushingula mwana mukashi.

²Anka, ha mwanda wa (kwihetiga) lukyebanokyebano, ese mulume ekale na mpian’e, n’ese mukashi ekale na mulunda e.

³Mulume anemekye mpian’e bilombane bibuwa, na mukashi namu nka hamune kwi mulunda e.

⁴Mpiana (a muntu) te na matalwa ku mbidi ye na mwinyi, anka mulund’e: anka hamune na mulunda, te na matalwa na mbidi ye, anka mpian’e.

⁵Tanwihelenanga anwe bana bene, anka su anwikuminyishena kihindji, bianudia kwihāna mu nteko na kushila biakudia, na kwilalene dimo, ha mwanda wa kutshina’shi, Satana akenutompa ha mwanda wa kukutwa kwilama kwenu.

⁶Nesamba uno na lukumino, ushī ulombene bu kishila.

⁷Mwanda nadi akusehela’shi, bantu boso bekal’anka bu’mi. Anka muntu ese e na kie kia buntu, mwibahēle Efile Mukulu, au na kie kihaso, au na kingi kihaso.

⁸Binyibiabia nākula kwi bebukuhi na kwi bakashi ba bafwe, Ami’shi: bibuwa abo su abekala’nka bu’mi.

⁹Anka su abakutwa mwa kwikela bisumanga, beibakishene, mwanda kwibakila nkukila kusuasua buwa.

¹⁰Na kwi beibakishene nebakamika, (anka) tanami, ñanka Nfumwetu, eshi, Mpian’a (muntu) tatukanga kwi mulund’e.

¹¹Anka su atuku, ashale bukuhi, su nkulombana na mulund’e. Mulundatatushanga mpian’e.

¹²Anka kwi bangi nākula’nka’mi, ta Nfumwetu, ooo, ami’shi: Su kwi mungi mukwetu mu Kidisitu e na mpian’e shī mukumine, e namu asehela kwikala n’e, tamutushanga.

¹³Na mwana mukashi namu e na mulume shī mukumine, e namu asehela kwikala n’e, tatukanga kwadi.

¹⁴Mwanda mulume shī mukumine, mushidikwe kwi mukashi e, na mwana mukashi shī mukumine ’mushidikwe na mulume e: su tambiabia, biabia bana benu tambatoshibwe; anka binobino mbatoshibwe.

¹⁵Anka su bashī bakumine bakatuka, bakatukye. (Mwanda) mukwetu mu Kidisitu, su mulume su mukashi te mu buhika bwa bi bino, anka Efile Mukulu betwitamine mu kufukama.

¹⁶A biabia, obe mukashi, weuku naminyi su okahasha mulume? Sunga n’obe mulume, ouku naminyi su okahasha mukashi?

¹⁷Anka mubābīle Efile Mukulu kwi muntu na muntu, au na ki’e, au na ki’e, nyi amwibetamina Nfumwetu ku mumntu na untu, batambukile mwanka. Biabiu nyi binasangwila mu dikoñeno bioso bi ’Efile.

¹⁸Kwi (muntu) musailibwe baitaminwe su? Biabia tālulukanga bu shī musadibwe, ooo; a kwi mungi baitaminwe shi musadibwe su? e tasadibwanga.

¹⁹Kusalwa nkwa bisumanga, na kukutwa kusalwa nkwa bisumanga, anka kulama kwa bishila bi ’Efile Mukulu.

²⁰Ese muntu ekale mū’lwa lwitamino lwabetaminwe n’alo.

²¹Boitaminwa bu mpika su? todilanga, anka su bomono mwa kwalulukila bu muluñantu, wekale bwanka.

²²Mwanda’wa baitaminwe mwi Nfumwetu bu mpika, e muluñantu mwi Nfumwetu; nyi mpamune n’awa baitaminwe bu muluñantu, nyi mpika a Kidisitu.

²³Nwibaudibwe na mūlo; tanukālulukanga’nyi bu bahika ba bantu, ooo.

²⁴Anwe bakwetu mu Kidisitu, mwanubaitaminwe, nwikale’mo n’Efile Mukulu, muntu he, muntu he.

²⁵Ha mwanda wa bakashi tumame, nki na kishila kwi Nfumwetu; anka natusha kitshibilo kiande, bu yawa mufwilwe lusa kwi Nfumwetu’shi, ngikale a kishima.

²⁶Binyibiabia na hwandjikisha’shi uno’u wibuwa ha luno lukalo lwa binobino’shi, bibuwa mulume ekale bino.

²⁷We mulamikibwe na mukashi? Tokyebanga kwilamuña. We mulamunwe kwi mukashi? Tokyebanga mukashi.

²⁸Anka s’obamba, twemusole mwanda, ooo; kamame namu su abambibwa, tamusole mwanda. Sunga mbiabia, be bino abakekala na malwa mu mbidi, anka’mi nyi biandjia kwinuhasha (uno mwanda).

²⁹Anka nākula bino bakwetu mu Kidisitu, kihindji kibaheleshwa, kubashala’shi, aba be na bakashi bekale bu bashī na bakashi.

³⁰N’abo abadidi, (bekale) bu bashyabadidi; n’abasehela bu bashyabasehela; n’abo abaulā (bekale) bu bashī bahete’bio.

³¹N’abo abanemena ku bia hanohansenga (bekale) bu bashī bakambe kutwelelela mwanka, mwanda mwikelo wa bahanohansenga aushiminā.

³²Anka nankyeb’ami’shi, nwikale bashī na mpwandjikishe. Yawa shī mubambe alamatshidile ku bintu abinemena kwi Nfumwetu, mwadia kusangesha Nfumwetu.

³³Anka yawa mubambe, alamata ku bintu bia hanohansenga, mwadia kusangesha mpian’e.

³⁴Kwilamuña kwi kwanka n’e kwi mukashi, n’e kamame. Mwana mukashi shī mubambibwe, e alamata ku bintu bia Nfumwetu, biadia kwikala mu hatulwe-a-kishila mu mbadi na kikudi; anka yawa mubambibwe alamata ku bintu bia hanohansenga, mwadia kusangesha mulunda e.

³⁵Kino kiañakula, nākula mwanda wa kusungula kwenu; tamwanda kwinutee eholo, ooo, anka ha mwanda w’akia kihwandjikile’shi, nutul’eshimba kwi Nfumwetu kushī n’akia kwinukutshishwa.

³⁶Anka su (muntu) atentekyesha’shi: nkimukite bilombane kwi mpian’ande ki kamame; su e tadi mukulu, e namu e na lukalo mu binyi bino, akite biakyebe, tasolo mwanda; bebambene.

³⁷Sunga mbiabia, yawa e na kukankamana mwishimba die, e namu te na lukalo lwa mu bino, anka e na bukome bwa kukambila abikyeb’eshimba di’e, e namu bafunu bino mwishimba die’shi: nankamubiki, e, (biabia) bakitshi kalolo.

³⁸Biabia yawa atulu (mwan’e ki kamame) kwibambo akitshi biya, anka yawa shī mutule kwibambo akidi kukita biya.

³⁹Mukashi alamibwe kwi mulund’e mu mafuku oso a muwa wa mulund’e, anka su mulund’e bafu, e ’muluñantu kubambibwa n’ese akyebe, anka mwi Nfumwetu.

⁴⁰Anka su ashala biabia, ami nahwandjikisha’shi akidi kwikala na muloo. Natentekyesha namu’shi, nyi na Kikudi-E-Selelee e Efile Mukulu.