Read songe Ii Bena Kodinda 10 Bible Online

Ii Bena Kodinda 10 - songe bible

Ii Bena Kodinda 10

¹Biabia, ami Paulu na mwinyi, nenusendela ku kuhohela na kasendeleshi ka Kidisitu, biandji munkatshi mwenu nyi mwiheleshe, anka hakwikala shī kwanka nyi n’eshimba kwanudi:

²anka nenusendela’shi, hankekala munkatshi mwenu, tankekala n’eshimba na lwinyi lukuluhilo lwanatentekyesha kukankamana n’alo kwi bangi abetutentekyesha bwābatambukila mwiyile bia ku mbidi.

³Mwanda sunga atutambuka mu mbidi, tatulwila ngoshi mwiyile bia ku mbidi, ooo.

⁴(Mwanda bilwilwa bietu bia ngoshi bi shī bia ku mbidi, ooo, anka mbia ntshitshiba kw’Efile Mukulu bia kushindula bihempe),

⁵na kuhonesha mpwandjikishi, na bintu bioso bi bula biimene kutuhishena na binangu bi’Efile Mukulu, na kufisha binangu bioso mu buhika bwa kikokeshi kwi Kidisitu.

⁶Na ha kwikala mwimēne kōbola bukolwa boso ahakakumbana kikokeshi kienu.

⁷Anwe anutala’nka ha mbidi ha bintu? Su nanyi su nanyi ekuluhil’e na mwinyi’shi: Nyia Kidisitu, (biabia) etentekyeshe enamwinyi dimonyi uno mwanda’shi, mulombene e bu a Kidisitu, anka biabia atwe namu twi ba Kidisitu.

⁸Sunga’mi nadi akukamba kwilungula mwanda wa matalwa etu abetuhēle Nfumwetu mwa kwiēla mwiilu, kushī mwanda wa kwinushindula, (biabia) tankakwatshishwa būfu, ooo.

⁹Eshi, tala nankekala bu e nutshinyisha ku mikanda (yande).

¹⁰Mwanda’bo abakulashi: Mikanda ye yi moo, na bukoho, anka ku mbidi ye su yi kuno kwatudi’twe ngitūba, na mīsambo (ye) ayibendjibwa.

¹¹Yawa e bino atentekyesha kino’shi, anka mwatudi bekele mu mwanda wa ku mikanda, hatushī kwanka, biabia namu (atukekala) na bikitshino hatwikala kwanka.

¹²Mwanda’twe tatukumu kwibadikishena mwatuhunda, sunga nkwihwandjikisha na bamo b’bo bakwitumbisha abo bana bene, ooo; anka’bo hakwitondena abo bana bene, kwi’bo bana bena, na hakwihwandjikisha abo bana bene munkatshi mwabo, tabe kalolo.

¹³Anka’twe tatukelungwila bintu kukisha ha lutshi, anka mulombene lutshi lwa mudianyino lwa betwabile kw’Efile Mukulu, nyi ndutshi lufikye mpaa na kwanudi.

¹⁴Mwanda tatukamba kwilomba bu’twe bashyabafiki kwaudi; mwanda tatuhwile kufika kwakwa kwanudi namu mu mukāndu-wibuwa wa Kidisitu.

¹⁵Tatwilungwila bintu kukila lutshi lwetu mu mifubo ya bangi, ooo, anka hakwikala na lukuluhilo’shi, ahakatamishwa lukuluhilo lwenu, atwe atukekala batamishibwe kwanudi, mulombene mudianyino wetu ukilekile.

¹⁶Ha mwanda wa kulungula mukāndu-wibuwa ku mpese yi ku mpala kwenu, kushī kwilungwile ku luhese lwa mungi muntu mu bintu bilumbulwe kala bitulwe mu maboko etu.

¹⁷Anka yawa etumbishā, etumbishe mwi Nfumwetu.

¹⁸Mwanda ta ngiawa etumbish’ē na mwinyi ’mukuminwe ooo, anka yawa atumbishibwa kwi Nfumwetu.