Read songe Ii Bena Kodinda 6 Bible Online

Ii Bena Kodinda 6 - songe bible

Ii Bena Kodinda 6

¹Henyihaha atwe abafubā n’E hamune, tubenusendela’shi, tanutambulanga bu-muntu bw’Efile Mukulu bisumanga, ooo.

²(Mwanda bākwile’shi: Nankuhushishe ha kihindji kiltuminyibwe, na mwifuku dia kihandjilo na kukwashishe. Talai, binobino nyi nkihindji kikuminyibwe kibuwa, talai, lelo nyi efuku dia kihandjilo.)

³Tanukitanga kia kukokosha su mu kinyi su mu kinyi’shi, tala mifubo yetu y’Efile yatohekwa.

⁴Anka mu myanda yoso tutumbishibwe atwe bana bene bu bafubi b’Efile Mukulu, mu lwishinko lukata, mu bia malwa, mu nkalo ya bintu, mu bishiotshi,

⁵Mu mikombela, mu kwelwa mu lukano, mu biondondo, mu kutuhwita mwa mifubo, mu kutengyela na mu kushīlu kwa bidibwa;

⁶mu kutoka kwa mashimba, mu kiukilo, mu kahufianyi k’eshimba, mu bu-muntu, mu Kikudi-E-Selelee, mu kifulo kishī kia kudimba.

⁷Mu mwanda wa biabinyibinyi, mu bukome bw’Efile Mukulu; mu bifwalwa bia ngabo bia kululama kw’eshimba, ku mbokoyibalume, naku yibakashi.

⁸Ku kinemo na ku shī kinemo, ku ntumbo yibi na ku ntumbo yibuwa; bu badimbi ba madimi, biosobi twi babinyibinyi;

⁹bu bashī beukibwe, biosobi twibeukibwe bikata; bu bakufwa, anka talai, twi na muwa; twi bu balangwe, anka tatwibayihaibwe;

¹⁰bu abenyengā mwishimba, biosobi twi na kusehela bukyelebukyele; bu balanda, biosobi atuhetesha bebungi buheta, bu bashī na kintu, biosobi twi basha bintu bioso.

¹¹Anwe Bena Kodinda, makanwa etu ababulwa kwanudi mashimb’etu abatamishibwa.

¹²Tanwibabondjibwe mwi’twe, ooo, nubabondjibw’anka munda mwenu.

¹³Binyibiabia, ha mwanda wa bwedi bulombene mwanka (nesamba hamune bu kwi bana bande), mashimb’enu atamishibwe namu.

¹⁴Tanwilungenanga hamune na bashī bakumine, ooo, mwanda kululama kw’eshimba na bubi kihwano nkia ha kinyi? Sunga etata na mufito abihwana na minyi?

¹⁵Sunga Kidisitu na Beleale abahwanyina ha kinyi? Sunga ngiawa mukumine na shī mukumine a mbahwanyine ha kinyi?

¹⁶Na ntempelo y’Efile Mukulu na mankishi kilombeno nkia kinyi? Mwand’atwe twi ntempelo y’Efile Mukulu a muwa; anka mwakibakwidilwe’shi: Nankabombela munda mwabo, nakutembela mwanka, n’ami nankekala Efile Mukulu abo; abo namu abakekala bantu bande.

¹⁷Binyibiabia katukai munkatshi mwabo, nwikale belamune, nyi mubakwidile Yehowa; tanukumanga namu ku kishidikwa (kishila,) biabia ami nankenutambula.

¹⁸Nankekala bu Nshenu kwanudi, n’anwe namu anukekala bu bana bande balume, na bu bana bande bakashi, nyi mubakwidile Yehowa a bukome boso.