Read songe Ii Bena Kodinda 7 Bible Online

Ii Bena Kodinda 7 - songe bible

Ii Bena Kodinda 7

¹Binyibiabia anwe bakuminyibwe hatudi na yino milayilo, twitoshei atwe bana bene ku biabutete bioso bia ku mbidi, na bia ku kikudi tukumbashidilei kuhatulwa-kwa-kishila mu kutshina kw’Efile Mukulu moo.

²Etutambulei mu mashimb’enu; tatwibasoleshe muntu mwanda, ooo, tatwibalwishe muntu; tatwibadimbe muntu.

³Tanyisambila (bino) mwanda wa kwinuhīsha, ooo, mwanda’mi nenulungwile kala’shi’, nwi mu mashimb’etu sunga nkufwa, sunga nkwikala n’enu mu muwa hamune.

⁴Nkomantshima ya mīsambo yande ngikata kwanudi, na kwinutumbisha kwande nkukata ha mwanda wenu. Naushibwa na kusengibwa, nyi na kusehela kukilekile mu malwa etu oso.

⁵Mwanda hatubafikile mu Masedonya, mu mbidi mwetu tamubadi mufukame, anka tubakalakeshwe ku mpese yoso, ngoshi yibetufunyishe, munda tamwitususu,

⁶Sunga mbiabia, Efile Mukulu aseng’āba bakalakashwe, betusengyele ha mwanda wa kufika kwa Titusa,

⁷Tankwa’nkā’ko kufika kwe, ooo, anka mwanda wa kusengibwa kwabasengyelwe mwanudi, habetulungwile mwanwitukyebela bikata, na lukalo lwenu, n’eshimba dienu dikibobo kwandji’mi’shi, nakilekile kusehela.

⁸Mwanda sunga nenufitshishe ku mashimba na mukanda wande, tanaluluka’mi, ooo, sunga nālulukile (kala), mwanda nashingula’shi, winyi mukanda ubenufitshishe mashimba kihindji kihela.

⁹Binobino nasehela kushī ha mwanda wa kufitshishwa kwa mashimb’enu, ooo, anka ha mwanda nubafitshishwa mpaa nubēlanga; mwand’anwe nubafitshishwe ku kihaso kia bwin’Efile’shi, tanwakashimishwa, kwatudi, sunga mu kinyi sunga mu kinyi.

¹⁰Mwanda kufita kweshimba kwa bwin’Efile akwikashā kwilanga ku kihandjilo kushī na kwalula mwishimba, anka kufita kweshimba kwa bahanohansenga akwikashā lufu.

¹¹Mwanda, talangai, kintu kino namu kianubafitshishe mwiyile bwin’Efile, a tandwishinko lwimō lubakitshinwe mwanudi, ee, na kwibingisha kw’anwe bana bene; ee, na kukalakashwa mwishimba, ee, na moo namu, ee na kukyeba kukilekile, ee na kinsukunsuku kimoo, ee na kōbola. Mu bintu bioso nwibeleshe bu babingishibwe mu (uno) mwanda.

¹²Binyibiabia sunga nenufundjile (mukanda,) nki mufunde ha mwanda wa yawa basōle mwanda, sunga mpa mwanda wa yawa bamwene malwa (a ha uno mwanda), ooo, anka’shi, lwishinko lwatudi n’alo alukamweka kwanudi ku meso kw’Efile Mukulu.

¹³Biabia tubadi basengibwe mu kusengibwa kwenu: ee, tubasehelele bikilekile mwanda wa muloo wa Titusa, mwanda eshimba die dibayikishwa kwanudi’nwe.

¹⁴Mwanda su netumbishe kwadi e, su mpa kinyi su mpa kinyi, nki mukwatshishibwe būfu ooo; anka mwatubesambile n’enu mu bintu bioso bia binyibinyi, anka biabia nyi kwilungula kwetu, kwatubelungwile ku mpala kwa Titusa kubamwekyelelwe kwa biabinyibinyi.

¹⁵Na kifulo kie kia munda nkikambe kukilakila bingi kwanudi’nwe, hakutentekyesha kukokyela kw’anwe boso, bu bianubamutambwile na moo na kususa.

¹⁶Nasehela’shi, nyi na lukuluhilo mwanudi mu (bintu) bioso.