Read songe Ii Bena Kodinda 8 Bible Online

Ii Bena Kodinda 8 - songe bible

Ii Bena Kodinda 8

¹Hangi namu bakwetu, tubenūkisha bu-muntu bw’Efile bubahelwe bikoñeno b’Efile bia ku Masedonya;

²mu kutompibwa kukata kwa malwa, bungi bwa kusehela kwabo na bulanda bwabo bukata bubafwimi ku buheta bwa bu-muntu bwabo.

³Mwanda mulombene bungi bw’abia bahananga, ami nyi kamonyi ka uno’shi, babakishekishe bia kuhana kwabo, babahene mashimb’abo bana bene.

⁴Abetusendelele na kwitwiyayila bikata’shi: Nutambule bwinyi bumuntu, na mwanda wa kilombeno kia kufubila balamunweba-kishila.

⁵Na kino namu tambakite’kio mwatubadi bakuluhile’twe, ooo, anka ababadidile kwihana abo bana bene kwi Nfumwetu, na kwatudi’twe, bu amukyebela eshimba di’Efile Mukulu.

⁶Nyi ha uno mwanda watubakyebele Titusa’shi, anka mwababangile, mpamune ahwe mwanudi’nwe mu buno bu muntu namu.

⁷Anka mwanufwimina mu bintu bioso, mu lukuluhilo, na mu kwakula, na mu kiukilo, na mu kusasakata, na mu kifulo kienu kwatudi, nufwimei mu buno bu-muntu namu.

⁸Tañakula bu kishila, ooo, anka ha mwanda wa kushisha mu kusasakata kwa bangi mu biabinyibinyi bia kifulo kienu.

⁹Mwanda anwiuku bumuntu bwa Nfumwetu Yesu Kidisitu’shi, sunga badi mpeta, bealulwile bu mulanda ha mwanda wenu’shi, anwe mu bulanda bwe nwikale bampeta.

¹⁰Ha winyi uno nahana nangunangu yande, mwanda kino nkinuhwandjikile’nwe, bababangile kwibedi kushī anka kukita, anka kwikala n’eshimba dia kwikikita ha’kia kihwa kia kwibedi.

¹¹Binyibiabia hwididilai kwikikita’shi, anka mubaikadile eshimba dia kuuhakana kwa kukyeba, anka biabia nwikale na kuhwididila ’nyi n’abia bia kuhana bia nwi n’abio.

¹²Mwanda su eshimba ndjimene kwanka, biabia kikuminyibwe mulombene bintu bi n’abio muntu, kushī kulombene muntu shi n’abio, ooo.

¹³Mwanda nki mwakule uno kwamba’shi, bangi abatentulwa n’anwe nunemenwe ooo;

¹⁴anka kwikala balombashene’shi, kufwima kwenu ku kino kihindji akukekala kwa kukumbasha mu biabebakutwe, eshi, kufwima kwabo namu kukekale’nyi kwa kukumbasha bianwibakutwe: eshi kwikale kulombashene hamunenka.

¹⁵Anka mwaubafundjilwe’shi: Yawa (basangwile) yibungi (ya mana) te na yisubukye, ooo; na winyi (basangwile) yihela tabakutshilwe.

¹⁶Anka Efile Mukulu atumbulwe benutudile Tetusa n’eshimba di na kinsukunsuku dia lubasu.

¹⁷Mwanda e binyibinyi bakuminyine elango dietu; anka hakukamba kusasakata e bayile kwanudi n’eshimba die na mwi-nyi

¹⁸N’atwe tubatumu n’e mukwetu, winyi mutumbishibwa mu mukāndu-wi-buwa w’Efile mosomoso mu bikoñeno bi’Efile.

¹⁹Tañanka biabia ooo, anka e winyi badi musangulwe namu ku bikofieno bi’Efile kwenda n’etu na buno bu-muntu, bufishībwe kwatudi ku ntumbo ya winyi Nfumwetu, na (kulesha) mwimēne binangu bienu.

²⁰Nwihenge bino’shi, muntu su nanyi su nanyi, takamono mwa kwitutoheka mwanda wa buno (bumuntu) bufwimi bufishībwe kwatudi,

²¹kwikala namu na lwishinko ku bintu bilumbulukye, kushi anka ku meso kwa Nfumwetu, ooo, anka na ku meso kwa bantu namu.

²²Tubatumine n’abo mukwetu, atubamwene musasakate mu bintu bibungi, misusa na misusa, anka binobino e’nyi mukile kusasakata, ha mwanda wa Lukuluhilo lukata luanji n’alo mwanudi

²³Su muntu ehusha’shi: A Tetusa namu nanyi? E muhwane nami a nfubu n’e mufubo wa kwanudi’nwe, su bakehusha’shi: A bakwenu benyi namu mba na minyi? Abo, nyi mikiendji ya mu bikoñeno bi’Efile na ya ntumbo ya Kidisitu.

²⁴Binyibiabia nwibaleshei, na ku mpala kwa bikoñeno bi’Efile, kishisho kia kifulo kienu, na kia kwitumbisha kwetu ha mwanda wenu.