Read songe Ii Bena Kodinda 9 Bible Online

Ii Bena Kodinda 9 - songe bible

Ii Bena Kodinda 9

¹Mwiyile mwanda wa mifubo ya kwi balamunwe-ba-kishila, tantobwa kwinufundjila, ooo,

²mwanda nahu kwiuka mwimēne mashimb’enu bianenutumbisha kwi’bo ba ku Masedonya’shi, be mu Akaya abadi bemēne ha kihwa kibakidi; na kinsukunsuku kienu kibakolomwene bebungi.

³Anka natumine bakwetu’shi, tala kwitumbisha kwetu ha mwanda wenu kwakekala kwa bisumanga mu uno mwanda; anka binakwile’shi, nwikale bemane.

⁴Tala su baba ba mu Masedonya abakafiki n’ami twakenuheta bashī bemēne, atwe (tatwakula’shi n’anwe,) tatwakakwatshishibwa būfu mu kuno kwitumbisha kwa kukankamana.

⁵Binyibiabia natentekyeshe’shi, wandji n’au ngwa kusendela bakwetu ba mu Kidisitu’shi, babadile kwanudi mu kuhadika bia mwabi bia buntu bwenu, bianubalayilwe kwibedi’shi, abio binyi bikale bihwe kulumbulwa, bu bia buntu bwa bisumanga, kushī bu biakwiatshila ku malaka, ooo’.

⁶Anka nākula bino’shi: Yawa aminyi mbio yihela akaumbula yihela; na yawa aminyi yibungi ya miabi, akaumbula yibungi namu.

⁷Mulombene mwa mufunā muntu ese mwishimba die, (balambule anka biabia) kushī na kwinyenga kw’eshimba, sunga nkumukitshisha ha bukoho, mwanda Efile Mukulu asehela muntu alambula na musanku.

⁸Efile Mukulu namu euku kufwimisha bu-muntu boso kwikala mafuku oso balombanyinyine boso, mu bintu bioso, kwanudī’shi, anwe, ha nufwime ku mifubo yoso yibuwa,

⁹bu mwaubafundjilwe’shi: E bahalakeshe kosokoso, E bahele balanda; kululama kwe akukekala ikala-ika.

¹⁰Yawa aheya muminyi mbio na biashi bia kudia akenuha, na kufwimisha mbio yenu yikunwe, na kufwimisha bikuba bia kululama kwenu.

¹¹Anwe namu nubaheteshībwa mu bintu bioso mpaa na ku bia bu-muntu boso, bubetwikasha na lutumbu kw’Efile Mukulu.

¹²Mwanda mwiyile lulumbulwilo lwa mufubo uno wa kwi boso, taluhebwā ’nka ku lukalo lwa bahatulwe-ba-kishila, ooo, anka alufwimina namu bebungi ha ntumbu kw’Efile Mukulu.

¹³Ku kutompibwa kwa luno lulumbulwilo lwa mufubo abatumbisha Efile Mukulu ha mwanda wa kikokyeshi kia lukumino lwenu lutemunwe, ku mukāndu-wibuwa wa Kidisitu, na ha mwanda wa kwābishena kwenu kwa bumuntu kwabadi, na kwi (bantu) boso.

¹⁴Na ku luteko lwabo ha mwanda wenu, bakwete kwinutuhwita mu kifulo, ha mwanda wa bumuntu bukilekile bw’Efile Mukulu hanudi.

¹⁵Efile Mukulu atumbulwe ha mwanda wa buntu bwe bukutwe na mwa kwibwakwila.