Read songe Bena Ngalatea 1 Bible Online

Bena Ngalatea 1 - songe bible

Bena Ngalatea 1

¹Paulu mutumibwa (bushī bwa ku bantu, sunga mpa mwanda wa muntu, mbwa kwi Yesu Kidisitu, n’Efile Mukulu Yaiya, bamusangwile ku lufu,)

²nu bakwetu ba mu Kidisitu boso be n’ami, ku bikoñeno bi’Efile bia Ngalatea:

³Bumuntu bwikale n’enu na kufukama kw’Efile Mukulu Yaiya, na kwi Nfumwetu Yesu Kidisitu,

⁴winyi behene e na mwinyi ha mwanda wa milwisho yetu mwadia kwitumañunwīna ku ba hanohansenga bebubi, muyile eshimba di’Efile Mukulu Nshyetu:

⁵kwadi e (kwikale) ntumbo ya ikala-ika. Amena.

⁶Nakanya mwanubalamunukila bukidi kwadi e benwitamine mu bu-muntu bwa Kidisitu, ku ungi mukāndu-wibuwa.

⁷Winyi uo tangungi, oo, anka kwi bangi abenuhatakasha, abakyebe kwalula mukānduwibuwa wa Kidisitu.

⁸Anka sunga n’atwe, sunga mwikeilu a kwiilu akenulungula ungi mukāndu wibuwa, su ngwa kinyi, su ngwa kinyi, ushī bu mukāndu-wibuwa watubenulungwile kwibedi, ekale mwedibwe muloa.

⁹Anka mwatwinulungwidīle kwibedi, anka biabia nyi bia nyi nulungula dimonyi’shi: Su nanyi su nanyi akenulungula ungi mukāndu-wibuwa wanushī batambule, edibwe muloa.

¹⁰A binobino n’ami akonkwela bantu, su Efile Mukulu? A nakyebā kusehesha mashimb’a bantu su? Su nekala a kusehesha mashimba a bantu, tanyikala mpika a Kidisitu, ooo.

¹¹Anka nenwiukisha’nwe bakwetu’shi, winyi mukānduwibuwa wanenulungwile, tangwa kwi muntu, ooo.

¹²Mwanda nki mwiutambule kwi muntu, sunga nkulambukishwa’o, anka nku kufumbulwa kwa Yesu Kidisitu.

¹³Mwanda’nwe nubahushishe nyikashi ya muwa wande mu kihindji kia kala mu lulangwilo lwa bena Yuda, munadi mukilekile kubingabinga kikoñeno ki’Efile Mukulu, na kwikishīdisha.

¹⁴Namwena mu lulangwilo lwa bena Yuda, nakukila balongo n’ami bebungibamu kisaka kiande, nadi mukilekile kinsukunsuku kia lulungulusho lwa bashyami-kulu.

¹⁵Habaseheshwe eshimba di’Efile Mukulu, bandamunwine munda mwa nyin’ami, na kuñitanyina ku bu-muntu bwe,

¹⁶mu kufumbusha Mwan’e mwandji’mi, mwandjia kumulungwila munkatshi mwa mīlo; henyihaha nkimwihushe na ba ku mbidi na mase, ooo:

¹⁷Sunga tanakamina ku Yelusalema kwi baba babedi ande batumbibwa; anka nayile ku (Arabia,) biabia nalukile ku Ndamasakasa.

¹⁸Henyihaha habahwile bihwā bisatu, nakamine ku Yelusalema kukeukishena na Petelo, twalala n’e’ mafuku ekumi n’atano.

¹⁹Anka bamo ba batumibwanki mwibamone, anka Yakoba mukwabo na Nfumwetu.

²⁰Biabia ha yino myanda yanenufundjila, talai, tandjimbī ’mi na ku mpala kw’Efile Mukulu, ooo.

²¹Kumongo natikile ku mpese ya Sidia na Selesea.

²²Nadi shī mwiukī bwe mpala ku bikoñeno bia mu Yudea bibadi mu Kidisitu, ooo.

²³Ank’abo abadi bahushe bisumanga’shi: Yawa betubingabinga kala, binobino talungula namu lwinyi lukumino lwabadi alwisha.

²⁴N’abo namu abatumbishe Efile Mukulu ha mwanda wande.