Read songe Bena Efisesa 4 Bible Online

Bena Efisesa 4 - songe bible

Bena Efisesa 4

¹Henyihaha ami musungi wa Nfumwetu, nenusendela’mi’shi, nutambukye bihwandjikile lwinyi lwitamino lwanubetanyinwe n’alo;

²n’eshimba dia kwihelesha na kuhohela, na kahuñanyi k’eshimba, (na) kwilekeshena anwe bana bene mu kifulo;

³Nusasakate kulama kihwāno kia Kikudi-E-Selelee mu kikwatshisho kia kwitubungishena mu kufukama.

⁴Kwi mbidi yimunenka, na Kikudi-E-Selelee umune nyi anka mwanubetanyinwe mu lukululiilo lumune lwa lwitamino lwenu;

⁵Nfumwetu umune, lukumino lumune, lubatshisho lumune,

⁶Efile Mukulu umune, Yaiya a boso, e hanundu ha boso, te na hāshidi, e mwi’nwe boso.

⁷Anka kwi’twe boso akuhebwa bumuntu mulombene lutshi lwa buntu bwa Kidisitu.

⁸Nyi henyi hanakwila’shi: Habakamīne mwiilu bakunkwishe kibumbu kiabadi bakwatwe, ēnyi bahēle bantu biabuntu.

⁹Ha unō’shi: E bakamine, nyi nkuhatula’shi, e babadidile kwika ku bihindji bikilekile mushi mwa nsenga.

¹⁰E bayikile, nyi e winyi namu bakamīne ’mailu akilekile bula hanundu hoso, mwadia kuusha bintu bioso.

¹¹Bahele bamo kwikala batumibwa, bamo bu batemuki, bamo bu balungudi b’Efile, bamo bu tutshunga, bangi’nyi bu balambukishi:

¹²ha mwanda wa kukumbasha kwa balamunwebakishila, ha mifubo ya bufubi bw’Efile, kwīela mwiilu kwa mbidi ya Kidisitu,

¹³mpaa n’ahatukafikī’twe boso ku kihwāno kia lukumino, na ku kwiukidila kwa Mwan’Efile Mukulu, mpaa na ku bu-muntu mukumbane mwishimba, ku lutshi lwa kishīsa kia kikumbeno kia Kidisitu,

¹⁴eshi, tatwikalanga bu bakinga bakī batoka abasunkumishwa, na kuhahulwa na mpahi yoso ya lulambukisho, ku ndjindji ya bantu, na ku bulamalama bukilekile kwabadi bemene kudimbananga, ooo,

¹⁵anka hakukesamba biabinyibinyi (bi’Efile) mu kifulo, tukudil’anka mwadi e (mu) bintubioso, winyi e nyi mutwe nKidisitu.

¹⁶Kwadi e mbidi yoso ngilungishenwe na kutombashenwa hamune. Nakwikumena ku kiakia akiheya binyingwa bioso, anka mwabifubila aki mwakihunda aki mwakio, akienda akitamishanga mbidi mpaa na kukushibwa kw’ayo mu kifulo.

¹⁷Henyihaha nyi nguno wanyisamba na kulungula bu kamonyi mwi Nfumwetu’shi, bino-bino tanutambukanga bwa mutambukila Badjentaila mu binangu biabo bia bisumanga,

¹⁸abo, mbafitshishwe ku nangunanga yabo, mbalamunwe ku muwa w’Efile Mukulu ha mwanda wa luhatamino lwi mwabadi, ha kukomesha mashimb’abo hoo;

¹⁹Abo hakwikala bashī mpushīsho abehanyine abo bana bene mpaa na ku mudioholo w’eshimba dibi, mwanda wa kukita bia kushūla bioso bi’eshimba na ndakalaka.

²⁰Anka’nwe tanwibāmbule bino kwi Kidisitu,

²¹su nubamuhushishe, na kulambukishwa kwadi e muyile biabinyibinyi bi mwi Yesu’shi;

²²nukashe nyikashi ya muntu a kala, nyi nginyangye muyile lwabi lwa kudimbana;

²³Nulumbulwe dimonyi mu kikudi kia binangu bienu;

²⁴nufwale namu winyi muntu muhya muhangibwe mwikēle Efile Mukulu mu kuluama kw’eshimba na buhatulwe-bwi-kishila bwa binyibinyi.

²⁵Binyibiabia nulekye madimi, nwisambe biabinyibinyi ese muntu kwi mwin’e; mwanda’twe twi bia ku mbidi bi’atwe bana mwinyi.

²⁶Nwikale na nsungu, kushī kusola mwanda, tanuhoneshanga nguba na bukyelo bwenu, ooo;

²⁷Sunga nsatana tanumukingwilanga kihindji.

²⁸Yawa baihanga takumanga kwiba dimonyi; anka atuhwite mu mifubo ya maas’e mu kiakia kitumbulukye’shi, amone bia kuha yawa e na lukalo.

²⁹Tanukuminanga mīsambo yinyangye kutuka mu kanwa mwenu, ooo, anka yaya yilumbulukye ya kwinwielesha mwiilu’shi, yihane bu-muntu kwi bahushi.

³⁰Tanufitshishanga eshimba dia Kikudi-E-Selelee e Efile Mukulu, kwadinyi kwanubakayikwa mpaana kwifuku dia kikūdilo.

³¹Nukashe kwanudi būlo bw’eshimba, na kukyeluka, na nsungu, na maunga, na lubabo, na kifita kioso.

³²Nwisendeleshenei muntu na muntu, na kubofosha mashimba, nwilekeshenenei muntu na muntu, anka bu mubenulekyelele Efile Mukulu ha mwanda wa Kidisitu.