Read songe Bena Efisesa 5 Bible Online

Bena Efisesa 5 - songe bible

Bena Efisesa 5

¹Henyihaha nwikale bu balondji b’Efile Mukulu, bu bana batomibwe kifulo;

²nutambukil’anka mu kifulo, bu mwitufudile Kidisitu kifulo, e namu betwihanyine tadi bu mulambu na bu kitahilo kw’Efile Mukulu kwikala bu mahembwe e mwenyi.

³Anka bukyebanekyebane, na kushūla koso kwa bishila, su malaka, tabikalanga abitemunwa munkatshi mwenu, ooo, nyi mulombene balamunwe-bakishila,

⁴sunga bikako bia būfu, sunga mīsambo ya kuhotakana, sunga muu wi bubi, tambihwandjikile, anka kutumbula na kutumbula.

⁵Mwanda’nwe anwiuku yino’shi, sunga nga bukyebanekyebane, sunga sha biko mwishimba, sunga sha lwabi, sunga mulangwidi-a-mankishi tagbe na kia bakahyana mbufumu bwa Kidisitu n’Efile Mukulu, ooo.

⁶Tanudimbibwanga na muntu e na myanda ya bisumanga; nyi mpa mwanda wa yino myanda bukyelo bw’Efile Mukulu abufikā ha bana ba bashī na kukokyela.

⁷Binyibiabia tanuhwananga n’abo hamune.

⁸Mwanda’nwe kalakala nubadi mufito, ankā binobino nwitata mwi Nfumwetu: tambukai bu bana b’etata:

⁹mwanda kikuba ki’etata nyi mu myanda yibuwa, na kululama kw’eshimba na (mu biabinyibinyi,)

¹⁰na kutompa ayo yikuminyibwe na Nfumwetu.

¹¹Tanwikalanga na kuhwano na bikitshino bishī na bikuba bia mufito, oo, anka kwibitosha.

¹²Mwanda wa myanda ayikitshin’abo ku bufyefye ngia būfu, sunga kwiyitemune.

¹³Anka mwanda yoso ayitoshībwa ngifumbulwe kwitata; mwanda nyi etata adifumbushā myanda yoso.

¹⁴Binyibiabia akula’shi: Hasuka obe muladi a tulo, buka mu lufū, na Kidisitu akakumunyik’etata.

¹⁵Biabia tambukai na lwishinko kushī hamune bu balotakane, ooo, anka bu basha binangu;

¹⁶Numone mwakumwena ku bihindji mwanda mafuku ngabi.

¹⁷Binyibiabia tanwikalanga na kulotakana, anka nushingule amukyebela eshimba dia Nfumwetu.

¹⁸Tanukolwanga nfinyo, mwanka nyi mwi bufundakanyi, anka mwikute Kikudi-E-Selelee.

¹⁹Nwiakushen’anwe bana bene mu’ ñono ya milangwilo, na mu ñono ya ku Kikudi, kuyimbanga na kukitshisha ñono (bu ya lusese) ’mashimb’enu kwi Nfumwetu,

²⁰na kutumbula bukyelebukyele ha mwanda wa bintu bioso kw’Efile Mukulu Yaiya mwishina dia Nfumwetu Yesu Kidisitu,

²¹na kwikokyeshena anwe bana bene mu kutshina kwa Kidisitu.

²²Bakashi, kokyelai balume benu bu kwi Nfumwetu.

²³Mwanda mulume nyi mutwena mukashi, anka mwikyele Kidisitu mutwe wa kikoñeno ki’Efile. E namu nyi muhashi a mbidi.

²⁴Anka mukokyele kikoñeno ki’Efile kwi Kidisitu, anka biabia bakashi namu bakokyele balume babo mu bioso.

²⁵Balume (namu,) nutome bakashi benu kifulo, anka mutomene namu Kidisitu kikoñeno ki’Efile kifulo, behēne kwakidi e na mwinyi’shi,

²⁶mwadia kwikilamunwina tankishila, na kwikisula mema a bishima bibakwilwe.

²⁷Mwadia kwikīlubwila tankikoñeno kia ntumbo, kishī n’ebashi, sunga ndukanya, sunga nkimo kintu ki biabia; anka’shi, kikali kilamunwe-ki-kishila na kishi na matohe.

²⁸Nyi anka biabia balume namu biabadia kwikala na kifulo kwi bampiana babo, hamune bu mbidi yabo banabene. E, e na mpian’e kifulo mwifule kifulo e na mwinyi.

²⁹Mwanda takwi muntu sunga ngumune e na mushikwa ku mbidi y’e na mwinyi, ooo, anka ēidishā bibuwa na kwiilela anka hamunenka amukitshinā Nfumwetu kwi kikoñeno ki’Efile.

³⁰Mwanda twi biambidi bia ku mbidi ye.

³¹Nyi mpa uno mwanda aukalekye muntu nshye na nyina winyi hamune, akalamatshidile kwi mpian’e; abo boso bubidi abakekala bu mbidi yimunenka.

³²Uno ngufibwe ukata, anka nesambila mwikyele Kidisitu na kikoñeno ki’Efile.

³³Sunga mbiabia, ese muntu namu ekale na mpian’e kifulo, hamune’bo ba na mwinyi, muntu na mpian’e muntu na mpian’e; mpiana namu anemekye mulund’e.