Read songe Bena Fidihai 1 Bible Online

Bena Fidihai 1 - songe bible

Bena Fidihai 1

¹Paulu na Temote bahika ba Yesu Kidisitu, kwi balamunwe bakishila boso be mu Kidisitu be ku Fidihai, na kwi bakulubaledi, na kwi balami ba bintu.

²Bu-muntu bwikale nenu, na kufukama kw’Efile Mukulu Shyetu na kwi Nfumwetu Yesu Kidisitu.

³Natumbulā Efile Mukulu ande hoso hanyinunangushena.

⁴Mu nteko yande yoso mafuku oso, nenutekyela boso n’eshimba dia muloo,

⁵ha mwanda wa kihwano kienu mu mukāndu-wibuwa kasha n’efuku dia kwibedi, mpaa na binobino;

⁶Nyi musumine ha uno mwanda, ami’shi, yawa babangile mufubo wibuwa mwanudi akeukumbasha mpaa na kwifuku dia Yesu Kidisitu.

⁷Nyi mwinyi mwaudi undombene’mi kutentekyesha bino kwanudi’nwe boso, mwandā’mi nyi mu mashimb’enu; mwanda wa mu nkano yande na mu lulamwino na lukankamiko lwa mukāndu-wibuwa, anwe boso nwi mu lwābeno lwa bu-muntu hamunenka n’ami.

⁸Mwanda Efile Mukulu nyi nkamonyi kande, nyi mwa nyinudīla’nwe boso bikata, n’eshimba dia lusa lwa Yesu Kidisitu.

⁹N’ao winyi wantekā’shi, kifulo kienu kifwimi na kufwima mu kiukilo kikumbane, na mu lushingulwilo lwoso’shi,

¹⁰nukatompe bintu bikilekile buwa’shi, nwikale ba kishima, na bashī na mwanda mpaa na kwifuku dia Kidisitu.

¹¹Na kuushibwa na bikuba bia kululama bi kwi Yesu Kidisitu, bia ku ntumbo na ku lulangwilo lw’Efile Mukulu.

¹²Binyibiabia anwe bakwetu nankyebe’shi, nushingule yinyi myanda yinemene’mi yibāluluka biakutambusha mukāndu-wibuwa w’Efile,

¹³nyi mbiabia nkano yande mu Kidisitu ngifumbulwe kwi (basalai) boso ba kwibalasa dia nfumu, na ku bingi bihindji bioso.

¹⁴Na bakwetu bebungi ba mwi Nfumwetu, ha kukankamana ha mwanda wa nkano yande, abo abakishakisha kwakula Mwanda w’Efile kushī kutshina.

¹⁵Bamo namu abalungula (mwanda wa) Kidisitu anka na kiutu na mpaka; na bangi’nyi n’eshimba dibuwa.

¹⁶Bamo abalungula Kidisitu na mashimba elamune, bashī na kishima, abatentekyesha kumbushisha malwa mu nkano yande.

¹⁷Bangi namu (abalungula Kidisitu) mwanda wa kifulo, hakwiuka’shi, nemutudilwe bwa kulamwina mukāndu wibuwa.

¹⁸Binyibiabia a na minyi? Taha kī mwanda, ku mpese yoso, sunga mu bulamalama bwa kwidimba, sunga mu biabinyibinyi Kidisitu nyi alungwilwa, nyi mwa nsehelā, ee, nankasehela’nyi.

¹⁹Mwanda’mi neuku’shi, uno’u aukanalulukila tankihandjilo kiande ha kuteka kwenu, na ha kuhebwa kwa Kikudi kia Yesu Kidisitu,

²⁰mulombene lutengyelo lwande lunyiñamane, na lukuluhilo lwande’shi, sunga mu kahelahela nankekala na būfu, anka’shi, mwishimba moso, anka mwandji mwikele mafuku oso, na bino mpamune, Kidisitu atumbishibwe mu mbidi yande, su mpa muwa, su mpa lufu.

²¹Mwanda’mi kwikala na muwa (nyi) Kidisitu, na kufwa nkumwena mwanka,

²²anka su nekala na muwa mu mbidi, au nyi nkikuba kia kutuhwita kwa mufubo wande; anka wankasangula tañuku wanka.

²³Mwanda ’mi nyi muhatakanwe na myanda yibidi, aku nyi n’eshimba kukatuka, na kwikala na Kidisitu, (ako) nyi nkukilabuwa bukalabale;

²⁴anka kwikala hano mu mbidi namu, mbikambe buwa kwanudi’nwe.

²⁵Na hakusumina mu uno’shi, neuku nankekala, na kushadidila n’anwe boso ha mwanda wa kwinutambusha na muloo wa lukumino.

²⁶Eshi, kwitumbisha kwenu kwa handji’mi kwikale kufwima mu Kidisitu Yesu, ha mwanda wa kufika kwande kwanudi dimonyi.

²⁷Anka mwikelo weno wikale ulombane mu mukāndu wibuwa wa Kidisitu’shi, sunga nankafika kwinumona, sunga nkwikala shī kwanka nenu, nankahusha bia nyikashi yenu’shi, nwibanyiñamane n’eshimba dimune, na kikudi kimune, na kwinyishena hamune ha mwanda wa lukumino lwa mukāndu-wibuwa w’Efile Mukulu;

²⁸na kukutwa kukwatshibwa moo kwi baba batuhishene n’enu, su mu kinyi su mu kinyi; kwabadi’bo namu nyi nkitundwilo kifumbukye hatoka kia kulwila (kwabo,) anka kwanudi’nwe nkia kihandjilo, n’akio nkia kw’Efile Mukulu.

²⁹Mwanda nkihebwe kwanudi ha mwanda wa Kidisitu, tananka’ko kukumina mwadi e, anka kufwambuka namu ha mwanda we;

³⁰hakwikala na ngoshi ya kwituhishena yihamune yianubamwene mwimi, na binobino anuhusha yi mwandji’mi.